Алдымен аудан орталығы Ақмолдың іргесіндегі қырманға ат басын тіреген журналистер қызыл бидайды ұшырып, кептіріп, таза бидайды көлікке артып жөнелтіп жатқан жұмысшылардың қызу жұмысына куә болды.
– Тамыздың басынан бастап қырманның астық төгетін алаңдарын бүтіндеп, әзірлеп қойғанбыз. Бидайдың сапасы жақсы, жұмыс жоспар бойынша жүріп жатыр, – деді қырман басшысы.
Биыл аудан бойынша 202 мың гектардан астам алқапқа бидай, басқа да дәнді дақылдар, майлы дақыл түрлері егілген. 289 гектарға картоп, тағы 185 гектарға басқа да көкөніс түрлері егіліпті.
Журналистермен егістік басында жүздескен Целиноград ауданының әкімі Малғаждар Тәткеев:
– Тамыз айының соңында жаңбыр жауып кетіп, егін оруды 10-12 күнге тоқтатуға тура келді. Дегенмен қазір ауа райы жақсы, жұмыс қарқынды жүріп жатыр. Бітік егіннің құлауы, далада босқа шашылып қалуы сияқты оқиға болған жоқ. Осы қарқынды сақтасақ, 19-20 күн ішінде орақ науқанын аяқтаймыз, – деді.
Жанар-жағармай мәселесі бойынша да қолбайлау боларлық мәселе туындамапты. Күзгі дала жұмыстарына арналған 3900 тонна дизель отыны бекітілген бағамен бөлініп, уақтылы жеткізілген.
Қазір Целиноград ауданы бойынша 543 комбайн алқаптан күн сайын 10 500 гектардың егінін орады екен. Одан бөлек 126 трактор мен 116 автокөлік те тынымсыз жұмысқа жегілген.
Ауыл шаруашылығы министрлігі биыл республика бойынша 20 миллион тонна шамасында бидай жинауды межелеп отырғанын айта кетейік. Оның 9 миллион тоннасын экспорттау жоспарланған. Орылған бидайды сақтайтын қамбалардың жалпы сыйымдылығы 26,7 миллион тоннаны құрайды.
Арнұр АСҚАР,
«Егемен Қазақстан»