Баспасөз мәслихатын өткізушілердің мәлімдеуінше, жыл басынан бері республикада электр энергиясын өндіру көлемі 74 млрд КВт/сағ құрады, ал тұтыну көлемі 70 млрд КВт/сағат болды. Бұл – өткен жылдың осы мерзіміндегіден 6%-ке жоғары.
Алдағы жылыту маусымына дайындық барысы туралы әңгіме қозғаған Қ. Бозымбаев бұл мәселенің министрліктің тұрақты бақылауында болатындығын атап көрсетті. Бұл іске Үкімет тарапынан да жіті көңіл бөлінуде. 22 тамызда Үкімет отырысында және 27 тамызда Премьер-Министрдің бірінші орынбасары А.Маминнің төрағалық етуімен өткен кеңесте осы мәселе арнайы қаралған.
Энергетика мен Инвестициялар және даму министрлерінің бірлескен бұйрығымен 2018-2019 жылдардағы жылу беру маусымының тұрақты өтуін қамтамасыз ету үшін дайындықты бақылау, жылу маусымын өткізу, электр стансаларын, коммуналдық секторды және халықты көмірмен қамтамасыз етуді қадағалап, істі үйлестіру штабы құрылды. Штаб құрамына министрліктер мен әкімдіктердің жауапты тұлғалары енгізілді. Бұйрық шеңберінде Энергетика министрлігіне күзгі-қысқы кезеңге дайындалу мен өту мониторингін жүргізу және елдің электр стансаларында отынның нормативтік қорын жинақтауды күнделікті қамтамасыз ету бекітілген. Инвестициялар және даму министрлігі апталық негізде көмір өндіретін ұйымдардан көмір өндіру мен тиеуге, көмірді коммуналдық-тұрмыстық секторға және халыққа тиеп-жөнелтуге, ұсынылған өтінімдерге сәйкес көмір тиеу вагондарымен қамтамасыз ету бойынша жұмыстар жүргізуі тиіс.
Бұдан басқа Энергетика министрлігі Инвестициялар және даму министрлігімен, әкімдіктермен және «KEGOC», «Қазақстан темір жолы», «Самұрық-Энерго», «ҚазТрансГаз» ұлттық компанияларымен бірлесе отырып ай сайын барлық энергетикалық кәсіпорындармен селекторлық кеңес өткізу жөнінде ұйғарым жасалды.
Алдағы 2018-2019 жылдардағы күзгі-қысқы кезеңде еліміздің тұтынушыларын тұрақты энергиямен жабдықтау үшін 8 энергоблокты, 56 энергетикалық қазанды және 45 турбинаны күрделі және кеңейтілген ағымдағы жөндеу жоспарланған болатын. Қазір электр стансаларында 4 энергоблок (жылдық көлемнің 50%-і), 32 қазандық (57%) және 24 турбина (53%) жөнделді. Бұл ретте турбиналар мен қазандықтар бойынша жұмыс қарқыны өткен жылғы деңгейден 10%-ке жоғары екендігін атап өткен жөн.
Сонымен қатар еліміздің біртұтас электр энергетикалық жүйесін 2018-2019 жылдардағы күзгі-қысқы кезеңге дайындау үшін жалпы ұзындығы 28 477 шақырым электр желілерін жөндеу жоспарланса, соның 24 мың шақырым желісі жөнделді. Бұл жылдық жоспардың 85%-ін құрайды. Мұның сыртында 4,5 мың қосалқы станса да жөндеуден өткізіліп отыр. Орталықтандырылған жылумен жабдықтау аймағында 500 қазандықтың 439-ы (жылдық жоспардың 88%-і) жөнделді. Жалпы жөндеу жұмыстарын орындау кесте бойынша жүзеге асырылуда.
Электр стансаларының отын қоймаларында 3,3 млн тонна көмір мен 78 мың тонна мазут жиналған, бұл жалпы нормативтік көлемге сәйкес келеді. Жылыту маусымы басталғанға дейін көмір бойынша норматив Көкшетау қаласының МКК «Көкшетау Жылу» №2 қазандығында (20 тәулік норма ішінде 7 тәулік қалған) жасалатын болды.
Орталықтандырылған жылумен жабдықтау аймағындағы қазандықтарында 1,1 млн тонна көмір жинақталды. Бұл жоспардың 84%-і. Ал жинақталған мазут көлемі 25 мың тоннаны құрады. Бұл жоспардың 18%-і
ғана. Осыған орай Солтүстік Қазақстан және Павлодар облыстарында көмір, ал Ақмола және Қарағанды облыстарында мазут дайындау қарқынын арттыру қажеттігі атап көрсетілді.
Баспасөз мәслихатына қатысушылар Қазақстанда 8 айда шамамен 70 млн тонна көмір өндірілгендігін, бұл өткен жылдың осы кезеңімен салыстырғанда 4,6%-ке артық екендігін мәлімдеді.
Сұңғат ӘЛІПБАЙ,
«Егемен Қазақстан»
