Қазақстан, Қазақ елі – жүздеген ұлттардың ынтымақпен өмір сүруіне жағдай жасап отырған құт мекен. Тағдыр талайымен шаңырағымызға келген осынша этнос өкілдерінің қазақ жұртымен бірге бір қолдың саласындай, бір үйдің баласындай бейбіт қатар өмір сүруіне мемлекетпен қатар, үкіметтік емес ұйымдар да аса мүдделі әрі олардың бұл үдеріске қосып отырған үлесі де ерекше. Әркім өз білгенін жасап, аққу көкке, шортан көлге, шаян жерге тартқан жағдайда береке болмайды. Үкіметтік емес ұйымдардың басындағы кеп те осыған келеді. Оңтүстікте бұл мәселе оңтайлы шешіліп келеді.
Өмірінің саналы шақтарын облыста жауапты салаларда өткерген «Оңтүстік Қазақстан облыстық азаматтық Альянсы” заңды тұлғалар ассоциациясының төрайымы Клара Әліпова облыстық үкіметтік емес ұйымдардың басын бір шаңыраққа қосып, ел игілігі үшін жемісті жұмыс атқарып келеді. Біз ассоциацияның бірлесіп атқарған жұмыстарын сараптап, бағалап көрдік.
«ОҚО азаматтық Альянсы» 2011 жылдың 1 маусымынан бастап еліміз Тәуелсіздігінің 20 жылдық мерейтойына арнап «Шымкент – менің сүйікті қалам» атты акциясын бастаған-тын. Фестиваль аясында «Менің аулам», «Менің Отаным», «Менің үйім», «Менің көшем», «Қаланың ең озық ауданы», «Үй салсаң, тал отырғыз», «Таза су – таза сезім», «Артықты сылып таста» тақырыптарында байқаулар ұйымдастырылды. Шымкент қаласының барлық тұрғындары қатысып, жеңімпаздар қала күніне орай өткізілген іс-шарада марапатталды.
Ұлы Отан соғысындағы Жеңістің 66 жылдығына орай «Ерлік даңқы өшпейді» ұрпақтар сабақтастығы облыстық фестивалінің аясында «Жерлес батырларымызға тағзым», «Жасыл жапырақ» сенбіліктері облыстың барлық аудан, қалаларында өтті. Сенбілік барысында ҰОС жауынгерлеріне арналған 78 ескерткіш, обелискілер тазаланып, 538 ардагердің тұрғын үйлеріне ағымдағы жөндеу, аулаларына тазалық жұмыстары жүргізілді. Сонымен қатар, акция аясында сәуір-мамыр айларында өткізілген сенбіліктерде 5 мыңға жуық қылқан жапырақ, 17 мыңнан аса жеміс ағаштары көшеттері отырғызылды. Соғыс, тыл, еңбек ардагерлеріне «Қазыналы қарттарым» мерекелік іс-шаралары аясында жан-жақты материалдық, моральдық қолдаулар көрсетілді.
2011 жылғы 10 тамыз күні «Қазақстан Республикасының Конституциясы – үкіметтік емес сектор дамуының кепілі» атты ең үздік жарияланымдар конкурсы ұйымдастырылды. Конкурстың ережесіне сәйкес қоғамдық бірлестіктер, БАҚ өкілдері және жеке азаматтар қатысып, арнайы құрылған комиссияның шешімімен жеңімпаз деп танылған қоғамдық бірлестіктер мен БАҚ өкілдері бағалы және қаржылай сыйлықтармен марапатталды.
«26 маусым – Халықаралық есірткімен және есірткінің заңсыз айналымымен күрес күніне» орай облыстық балалардың құқықтарын қорғау департаменті облыстық саламатты өмір салты орталығымен бірлесіп «Есірткісіз әлем» акциясын өткізді.
М.Әуезов атындағы Оңтүстік Қазақстан мемлекеттік университетінің Студенттер ассамблеясының ұйымдастыруымен 1 мамыр Қазақстан халқының бірлігі күніне орай «Ел – ынтымағымен ырысты!» интернационал отбасылар фестивалі өтті. Фестивальге 24 этнос өкілі қатысып, өз өнерлерін ортаға салды.
2011 жылғы 6 шілде күні Шымкент қаласындағы «Орталық» саябақта «ОҚО азаматтық Альянсы» және облыстағы қоғамдық бірлестіктердің ұйымдастыруымен Қазақстан Республикасы Тәуелсіздігінің 20 жылдығына орай «Еңселі ел, меркеңмен!» республикалық акциясын ұйымдастырды.
1 маусым – Балаларды қорғаудың халықаралық күніне орай, облыстың барлық аудан, қалаларындағы мүгедек балаларды оңалту орталықтары мен мектеп-интернаттарында қайырымдылық көмектер мен мерекелік іс-шаралар, спорт түрлерінен жарыстар өткізілді. Сонымен қатар, «Тәуелсіздік – балалар көзімен», «Әлемді балалар көзімен қарасақ», «Мен өмір сүріп жатқан әлем» асфальтқа сурет салу байқауы мен көл жағалауына «Құмнан қалашық жасау» атты байқау ұйымдастырылды. Жалпы іс-шараларға 10 мыңнан астам адам қатысты.
4 маусым – Қазақстан Республикасының Рәміздер күніне орай Шымкент қаласындағы «Тәуелсіздік» монументі мен «Мемлекеттік рәміздер» алаңында «Менің Қазақстаным» патриоттар форумы болып өтті. Іс-шара «Ордабасы» алаңындағы «Тәуелсіздік» монументіне гүл қою рәсімімен басталып, мерекелік іс-шараға жиналған қалың көпшілік жақында ғана пайдалануға берілген баспалдақты көпір арқылы «Мемлекеттік рәміздер» алаңына жиналды.
Іс-шара барысында 10 баланы дүниеге әкелген, өнегелі тәрбие беріп отырған Батыр анаға, егіз балаларды өмірге әкелген аналарға, үлкен өмірге бірге қадам басып, шаңырақ көтерген жас жұбайларға арнайы куәліктер мен кәмелет жасқа толған жастарға Қазақстан азаматының төлқұжаттары тапсырылып, сыйлықтармен марапатталды.
Аудан, қалалар мен облыс аумағында орналасқан барлық әскери бөлімдерде Рәміздер күніне арналған «Бұл біздің – Ту, бұл біздің – Елтаңба, бұл біздің Әнұран», «Мен елімнің патриоты боламын», «Рәміздер – ел рухы, мақтанышы», «Рәміздер – Тәуелсіздік негізі», «Біз тәуелсіздік құрдастары – әрқайсымыз кемінде бір жақсылық жасаймыз», «Мемлекеттік рәміздерді құрметтеу – жастар міндеті» іс-шаралары өтті.
Облыстық ішкі саясат басқармасы мен облыстық діни істер, ішкі істер департаменттерінің арасында «Оңтүстік Қазақстан облысында діни экстремизм, терроризм көріністерінің таралуының алдын алу мақсатында 2011 жылға арналған Шымкент қаласы бойынша орта арнаулы және жоғары оқу орындарындағы кітапхана қорларының діни әдебиеттерімен танысу жұмыс жоспары» бекітіліп, 38 білім беру мекемелеріндегі кітапхана қорларының діни әдебиеттерімен танысу жұмыстары жүргізілді.
Облыс орталығындағы «Абдул Хамид Қаттани» мешітінің жанындағы діни дүкендердегі бейне және аудио таспалар сараптамадан өткізілді.
Облыстағы үкіметтік емес ұйымдардың жұмысын жандандыру және қолдау мақсатында мемлекеттік әлеуметтік тапсырыс шеңберінде «Оңтүстік Қазақстан облыстық үкіметтік емес ұйымдарының ақпараттық-ресурстық орталығының» қызметін ұйымдастыру бойынша іс-шаралар» тақырыбына 1 лот арнады. Конкурс нәтижесінде жеңімпаз деп танылған «Азаматтық Альянс» қауымдастығы облыстың 7 аудан, қалаларында «Ақпараттық-ресурстық орталықтар» ашып жұмыстар атқаруда. Сонымен қатар, облыстық ішкі саясат басқармасының қолдауымен облыс орталығында 2 «Ақпараттық-ресурстық орталық» жұмыс жасайды.
Оңтүстікте үкіметтік емес ұйымдардың арқасында осындай іргелі жұмыстар атқарылып жатыр.
Бақтияр ТАЙЖАН,
Оңтүстік Қазақстан облысы.
Суретте Клара ӘЛІПОВА.