Медицина • 16 Қараша, 2018

Өмірге құштарлықтың ерен үлгісі

91 реткөрсетілді

Жасы отызға да толмаған жас кәсіпкер Нұрболат Қа­ра­басов­тың өмірін қай­сар­лықтың, өмірге деген құш­тарлықтың ерен үл­гісі дер едік.  

Біздің ке­йіп­керіміз 1989 жылы туған қа­зіргі Түр­­кістан облысы, Са­ры­ағаш ауданының тумасы. Мектепті тезірек біті­ріп, жоғары оқу орнына тү­сіп, ата-анама қолғабыс ет­сем, биік белестерді ба­ғын­­­­дырсам деген асқақ ар­ман­­­­­дардың жетегінде жүр­ген бозбаланың өмірі аяқ ас­тынан күрт өзгеретінін кім біл­ген?! 

Ол 2006 жылдың 14 ақ­па­нында көлік апатына ұшы­рап, мүгедектер арбасына­ та­ңылды. Алаңсыз албырт жас­тықтың тәтті кездерін енді көре бастаған шағында бұл оқи­ға оған үлкен соққы болды. Кеу­де омыртқасының жұлын жа­рақатының салдарынан де­несінің төменгі жағының то­лық парализациясы диагнозы қойылып, Нұрболат бірінші топ­та­ғы мүгедектер қатарына қосыл­­­ды. Ол қай­ғылы жағдайға ұшы­ра­ғанда небәрі 16 жаста еді. ­Дә­рігерлер қойған ауыр диаг­ноз, арбаға таңылған тағ­дыр... Барлық қуанышты күндері көзінен бұлбұл ұшып, көз алдын тек қара түнек басқандай. Тепсе темір үзе­тін кезінде мүгедектер ар­басында отыру ауыр тиді, үйден шыға алмай, төрт қа­бырға ішінде мәнсіз 6 жыл өмірін өткізген.

Нұрболат Берікбайұлы 2015 жылы Талдықорған қаласында «Асар» оңалту ор­талығының ашылғанын кездейсоқ естіді. Сөй­тіп қайт­­сем де еңсемді көтеруім ке­рек деп, осы орталыққа ба­руға шешім қабылдаған. Осылайша арман жетегіне еріп, Жетісу өңі­­ріне барды. Әрине бөтен қа­­ла­ға үйрену жалғыз өзіне қиын соққаны рас. Алайда, таби­ғатынан ақкөңіл, өзгелермен тез тіл табысатын қасиетінің ар­қа­сында жаңа ортада көп дос­тар тапты. 10 жыл арбаға та­ңыл­ғаннан кейін алдымен ең­бек­теп үйреніп, кейін лангет ар­қылы аяғымен тұра бас­тады. Оңал­ту орталығында жүріп қол қусырып отырған жоқ. Қосымша жұмыстарға атсалысты, қаланың түрлі қоғамдық іс-шараларына қатысып, өз азаматтық позициясын білдіріп, белсенділік танытып жүреді. Қанша қиындықты басынан өткізсе де, бұл өңірге келгеніне еш өкінген емес.

«Тас түскен жеріне ауыр»­ демек­ші, Нұрболат үшін күн­де­лікті қоларбамен жал­ғыз жүру қиын болған­дық­тан, ол өзі сияқ­ты жан­дарға қала ішінде өзді­гінен жүріп-тұруға, тəуелсіз се­зі­нуіне кө­мектесу керек де­­ген ойға ке­леді. «Ер­лік» қоғамдық бірлес­ті­гін­де диспетчердің кө­мек­­шісі, одан кейін «Ав­товолонтерлер» жо­басында диспетчер болып жұмыс істеді. 

2017 жылы Нұрболат Zhasproject жобасы жайында естиді. Оның көкейінде көптен бері жүрген бір идея – мүмкіндігі шектеулі жан­дардың еркін жүріп-тұ­руына мүмкіндік жасау еді. Осы мақсатына қол жеткізу үшін бизнес жоба жасап, жаңа жо­баға қатысу туралы шешім қа­былдады. Қайсарлығы мен еңбек­қорлығының арқа­сын­­да жоба жеңімпазы атанып, «Zhasproject» жастар корпусын дамыту жобасы Үйлестіру агенттігі тара­пы­нан қажетті қаржыға қол жет­­­к­ізді, ойдағы арманын іс­ке асы­­руға кірісті. Ол бұл қар­жыға Қы­тайдан 4 электр қондырғысын сатып алады. 

– Бүгінгі таңда 50-ден астам электромобиль мүге­дек жандарға еркін қатынасу мүмкіндігін беріп отыр, демек мен олардың 10 мың ша­­­қырым жолды қиналмай ба­ғын­дыруына мүмкіндік ту­ғыздым деген сөз. Әдетте, қара­пайым қоларбамен адамдар күніне 5-6 шақырым жүретінін ескерсек, күніне 30 шақырымды сағатына 22 шақырым жылдам­дықпен жүрудің қандай жетістік екенін білсеңіздер ғой! Электрлі жетек, яғни электромобиль біз­ге бұрын мүмкін болмаған ке­дер­гілерді бағындыруға жол аш­ты. Бірақ ең маңыздысы жыл­дамдық емес, біз сияқты ар­баға таңылған жандардың төрт бөлменің ортасында қамалып отырмай, далаға өз бетінше шы­ғып серуендеп жүруі. Өзге қатарластары сынды қоғаммен тығыз қарым-қатынаста болудың өзі бір бақыт. Біз де қоғам­­­ның толық мүшесі ретінде жұмысқа араласып, елі­міз­дің болашағы үшін ең­бек еткіміз келеді. Ұлы Абай­дың «Сен де бір кірпіш дү­ниеге, кетігін тап та, бар қа­лан» деп айтқанындай, мен де өз еңбегім арқылы қоғамның дамуына үлесімді қоссам деймін» деп ойымен бөлісті Нұрболат Қа­ра­басов. Нұрболаттың алдағы мақсаты − жобаны еліміздің барлық қала­ларында іске асырып, қо­ларба қолданушыларға жолдағы кедергілерді жою және тең мүмкіндіктермен қамтамасыз ету. 

Нұрболаттың жүрегінде үміт отын жағып, оның өмірге қай­та оралуына, қоғамның бір мүшесіне айналуына себеп болған «Zhasproject» жобасына қысқаша тоқталып кетейік. Аталған жастар корпусын дамыту жобасы – Халықаралық қайта құру және даму банкінің және Білім және ғылым министрлігінің бірлескен жобасы. Үйлестіру агенттігі жобаны 2017-2020 жылдар аралығында жүзеге асы­­­руды жоспарлап отыр. Өт­кен жылдары еліміздің 4 ай­мағын Оңтүстік Қазақстан, Пав­лодар, Қарағанды жә­не Алматы облыстарын қам­­­тыған жоба 589 жобаға қар­жы алыпты. Осылайша

2 мыңға тарта жас азамат өз­­дерінің әлеуметтік жоба­ларын жүзеге асыруға мүм­­кіндік алған. Биылдың өзінде «Zhasproject» Ақтөбе, Қостанай, Қызылорда, Шы­ғыс және Солтүстік Қа­зақ­­стан облыстарындағы мың­нан астам жастың кеудесінде үміт отын жақты. Нұрболат Қарабасов сынды тағдырдан соққы алса да өмірге деген құштарлығы көпшілікке үлгі болатын жастарды қолдайтын жобалар көп болса дейсің мұндайда. 

Аслан ҚАНҒОЖИН,

журналист

Баннер
Соңғы жаңалықтар

Көп балалы ана кәсібін ашты

Аймақтар • Бүгін, 18:08

Кентавр ақынның көркем әлемі

Руханият • Бүгін, 10:26

Елбасы кітапханасы - Байқоңырда

Президент • Бүгін, 10:04

Акварель әлемі

Руханият • Бүгін, 09:41

«Хат қоржын» (21.05.2019)

Қазақстан • Бүгін, 09:36

Балама қуат көзі – ауылда

Аймақтар • Бүгін, 09:32

Ерлік ешқашан ескірмейді

Аймақтар • Бүгін, 09:17

Дайындық қыза түсті

Аймақтар • Бүгін, 09:12

Алғаш рет соя дақылын екті

Аймақтар • Бүгін, 08:48

Ене мен келін

Қоғам • Бүгін, 08:47

АХҚО биржасына қызығушылар көп

Экономика • Бүгін, 08:40

«Уақыттың уақыты жоқ»

Қоғам • Бүгін, 08:37

Тәңірдің түркіге тартуы

Руханият • Бүгін, 08:30

Қоқыс жинау қашан реттеледі?

Аймақтар • Бүгін, 08:22

Ұқсас жаңалықтар