Елбасы жүлдесін сарапқа салды
Өткен жексенбі күні Орал қаласында Қазақстан Президенті жүлдесі үшін самбо күресінен және жауынгерлік самбодан әлем кубогы кезеңі мәреге жетті. Әлемдік аумақтағы осынау байрақты бәсекеге он жеті мемлекеттің командалары қатысты. Олардың арасында АҚШ, Германия, Ресей секілді алып елдердің өкілдері бар. Ерлер арасындағы күштілердің күштісін анықтау үшін 135 спортшы белдессе, әйелдер арасында 56 самбошы әлем кубогы кезеңі үшін шаршы алаңға шықты. Сонымен бірге, 33 спортшы жауынгерлік самбо бойынша бәсекеге түсті.
Өткен жексенбі күні Орал қаласында Қазақстан Президенті жүлдесі үшін самбо күресінен және жауынгерлік самбодан әлем кубогы кезеңі мәреге жетті. Әлемдік аумақтағы осынау байрақты бәсекеге он жеті мемлекеттің командалары қатысты. Олардың арасында АҚШ, Германия, Ресей секілді алып елдердің өкілдері бар. Ерлер арасындағы күштілердің күштісін анықтау үшін 135 спортшы белдессе, әйелдер арасында 56 самбошы әлем кубогы кезеңі үшін шаршы алаңға шықты. Сонымен бірге, 33 спортшы жауынгерлік самбо бойынша бәсекеге түсті.
Әлемдік деңгейдегі жарқын да әсем ірі спорттық шараның Орал өңірінде өткізілуі тектен-тек деуге болмайды. Өйткені, мұнда спорттың дәл осы түрі бойынша тәлімді де өнегелі мектеп қалыптасып үлгерді. Мұның өзі облыс самбошыларының қазақстандық деңгейде ғана емес, сонымен бірге, әлемдік ауқымда да жоғары жетістіктерге жетуіне әсерін тигізді. Атап айтқанда, әлемдік самбо саңлақтары қатарында Ақжайықтан шығып, жеңіс туын желбіреткен Асқар Шайхиев, Мүсілім Оңдағанов, Қоныс Жетпісов және Ерболат Байбатыровтың есімдерін атаған жөн.
Ауқымды спорттық шараның құрметті қонақтары қатарында республикалық, еуропалық және әлемдік самбо федерацияларының президенттері Шәкизат Әмзиев, Олег Аврамкин, Василий Шестаков және Сергей Елисеевтің болуы сайыс мәртебесін көтере түскені анық.
Жарыс қорытындысында жүлделі орындарды Қазақстан, Ресей және Грузия құрама командалары бөлісті. Әртүрлі салмақ дәрежелері бойынша әлем кубогының иегерлері Болатбек Райымқұлов, Ерболат Байбатыров және Бағдат Жарылғасов болды. Жауынгерлік самбо бәсекесі нәтижелері бойынша Президент жүлдесін Медет Сағындықов, Талғат Кенжеғарин және Рустамбек Жереншиев жеңіп алды.
Темір ҚҰСАЙЫН.
Орал.
––––––––––––––
Суреттерде: әлем кубогы кезеңінен көріністер.
Суреттерді түсірген Рафхат Халелов.