Шаршы алаңдағы санаулы минуттар
Бокс десе ішкен асын жерге қойып, қаны қызып сала беретін қызылжарлық жанкүйерлер халықаралық дәрежедегі алғашқы додалы бәсекені тамашалау құрметіне ие болды. Олар соңғы жылдары қарсыластарына дес бермей шаршы алаңның шаңын шығарып жүрген Жанат Жақияновтың жекпе-жегін асыға күткен еді. Түкпірдегі ауылда туып-өскен жерлесіміз Петропавл қаласына келгеннен кейін ғана бокспен шындап шұғылдана бастаған. Мектеп бітірер кезде егіздің сыңары Азамат екеуінің спорттың осы түріне құмарлығы оянған. Бақтарына қарай тәжірибелі бапкер, республикаға еңбек сіңірген жаттықтырушы В. Чернышковқа тап болған.
Бокс десе ішкен асын жерге қойып, қаны қызып сала беретін қызылжарлық жанкүйерлер халықаралық 
дәрежедегі алғашқы додалы бәсекені тамашалау құрметіне ие болды. Олар соңғы жылдары қарсыластарына дес бермей шаршы алаңның шаңын шығарып жүрген Жанат Жақияновтың жекпе-жегін асыға күткен еді. Түкпірдегі ауылда туып-өскен жерлесіміз Петропавл қаласына келгеннен кейін ғана бокспен шындап шұғылдана бастаған. Мектеп бітірер кезде егіздің сыңары Азамат екеуінің спорттың осы түріне құмарлығы оянған. Бақтарына қарай тәжірибелі бапкер, республикаға еңбек сіңірген жаттықтырушы В. Чернышковқа тап болған.
Нағыз жүректілерге ғана тән спорттың осы түрінің қыр-сырын тез меңгеріп алған Жанат 2006 жылы атақты боксшы Ғалым Жарылғапов атындағы халықаралық турнирдің жеңімпазы атанып, С.Қонақбаев атындағы арнайы сыйлықты иеленеді. 2007 жылы Ресейдің Копейск қаласында өткен халықаралық жарысқа қатысып, осымен әуесқой боксқа нүкте қояды. Өмірбаянына қарасақ, кәсіпқой бокспен айналысқанына көп бола қоймаған. Бірақ қысқа мерзімде жинаған атақ-даңқынан ат үркерлік. 2011 жылы Еуропа /EBU-EE/ және Азия /WBC Asia Council Continental/ чемпионы атанған. 17 кездесудің 16-сын жеңіспен аяқтаған. 9 қарсыласын нокаутпен ұтқан. Қазір әлемдік рейтинг бойынша – 18, ТМД-да 3-орында тұр.
Оның таиландтық қарсыласы Лукдиав Тор Буманасың да оңай шағылатын жаңғақ емес екен. Бүкіләлемдік бокс кеңесі /WBC/ жүйесі бойынша 2010 жылы топ жарған. 14 кездесудің 11-інде мерейі үстем болған. Экс-чемпион салмақ өлшеу рәсімінде БАҚ өкілдеріне сұхбат беріп, Жанатты үшінші раундта жайратып салатынын айтып қалғанда, бұлшық еттері бұл-бұлт ойнаған, киіктің асығындай шымыр шетелдіктен іш тартқанымыз рас. Ауылдың қарапайым баласы өзіне тән сабырлы мінезбен бәрін ринг көрсетеді деп сөзін қысқа қайырды. Оның өзіне деген сенімді үні көңілімізді орнына түсірді.
Сол күні облыс орталығындағы «Жеңіс» балалар және жасөспірімдер спорт мектебінің залында шымылдық түрген доданы тамашалауға келген көрермендер қалың қолдай қайысып, ине шаншар орын болмады. «Hatton Promotions», «Ulan Boxinq» промоутерлік компаниялары және Солтүстік Қазақстан облыстық әкімдігінің ұйымдастыруымен өткен сайыс қызылжарлық жанкүйерлердің делебесін қоздырып, намыс отын қамшылап отырды. Беделді бәсеке алдында Қырғызстаннан, Өзбекстаннан, Шымкенттен келген боксшылар қолғап түйістіріп, жарыс көрігін қыздыра түсті.
Міне, шаршы алаңға алдымен таиландтық көтерілді. Ауыздығымен алысқан бәйге атындай әрлі-берлі ойқастап, жер тарпып тұр. «Бүгінгі бәйге менікі» дегендей, сес көрсетіп, мысының басымдығын сездірумен әлек. Жанатымыз ұртына су толтырып алғандай томсырайған қалпы. Жанкүйерлерге бірер бас изегені болмаса, басқадай мезірет білдіре қойған жоқ. Бірінші раунд басталмай жатып Жанаттың гүрзі соққылары таиландтыққа қарша жауды. Алғашқы сәттерде тайландтық қорғанып баққанымен, иектің астынан дәл тиген соққы мұрттай ұшырды. Төреші есеп ашты. Қанша айтқанмен, талай «таяқ жеп өскен» неме намысты екен, есін тез-ақ жиып алды. Көзді ашып-жұмғанша делік. Жанат бір гүрзі соққысын бауырға, екінші соққысын иектің астына жұмсап, тағы кескен теректей сұлатып салды. Ана байғұс жыланша ирелеңдеп, орнынан тұрмаққа талпынып еді, күші келмеді. Зал сілтідей тынған. Аң-таң. Сенер емес. Бір кезде жеңіске көздері анық жеткендей ду ете түсті. «Күш атасын танымайды» деген осы! Сөйтіп, Жанат Жақиянов 53,5 кило салмақ дәрежесі бойынша қос бірдей чемпиондық атақты сақтап қалды. Облыс әкімінің бірінші орынбасары, бокс және кикбоксинг федерациясының төрағасы Айдарбек Сапаров Еуропа және Азияның екі мәрте жеңімпазын жеңісімен құттықтап, облыс әкімінің атынан 1 миллион теңге ақшалай сыйлық ұсынды. Промоутерлік компания жетекшілері Филипп Фондю мен Ерік Жайлауовқа шапан жауып, Алғыс хат табыс етті.
– Шәкіртімнің жеңісіне қалтқысыз сеніп едім. Оған жігерлілік, мақсаткерлік, намысқойлық қасиеттер тән. Ешқашан асып-тасуды білмейді, сабырлы қалпынан айнымайды. Бұл бәсекенің ерекшелігі сол, Жанаттың рейтингі көтерілумен қатар, биылдың өзінде әлем чемпионы атағына таласу мүмкіндігіне ие болды, – деді қуанышын бізбен бөлісуге асыққан 68 жастағы жеке бапкері Александр Лебедев.
Сөз арасында жекпе-жектің «Астана» және спутниктік «Боец» телеарналары арқылы қайталау түрінде жұртшылыққа көрсетілетінін айта кеткен жөн. Жанаттың кезекті сайысы жазда Қызылжар өңірінде өтетін болып шешілді.
Өмір ЕСҚАЛИ.
Петропавл.
–––––––––––––
Суретті түсірген Амангелді БЕКМҰРАТОВ.
