Елімізге белгілі спорт журналистері қатысқан алқалы жиында спорт саласында қалам тербеп жүрген тілшілердің біліктілігі және оны жетілдірудің тетіктері сөз болды. Мәселен, елімізге танымал спорт журналисі Қыдырбек Рысбек қазіргі журналистердің және спорт комментаторларының тіл тазалығын сақтамайтынын, спорт терминдерін дұрыс қолданылмай жүргенін тілге тиек етті. Ал «Егемен Қазақстан» газетінің шолушысы Бекен Қайратұлы ұлттық спорт түрлерін жай спорт ретінде емес, жауынгерлік өнер ретінде қарастыру керек екенін айтты. «Қазақстан барысы» қазақ күресін дамыту қорының баспасөз хатшысы Назерке Сұлтанбек PR, яғни спорттық жарыстарды қалай насихаттау керектігін, еліміздегі ірі-ірі спорттық жарыстарды жарнамалау барысына кеңінен тоқталып, өз ойын ортаға салды.
Осы ретте «Қазақ спорты» газетінің бас редакторы, ЕҰУ журналистика және саясаттану факультетінің оқытушысы Дүрәлі Дүйсебай болашақ спорт журналистерін даярлау барысы жөнінде әңгіме қозғады. «Жалпы, ЕҰУ спорт журналистерін сапалы даярлауға ұмтылып жатыр. «Комментатор шеберлігі», «Спорт шолушысы», «Спорт журналистикасына кіріспе» деген пәндерді оқыдық. Қазір содан тәлім алғандар осы саланы жазып жүр. Жеке салалық журналистика ретінде мамандар даярлау – алдағы күннің еншісінде».
Сонымен қатар ғылыми-тәжірибелік конференцияға Ұлттық Олимпиада комитеті Спорт дирекциясының директоры Елсияр Қанағатов, Спорт және дене шынықтыру істері комитетінің баспасөз хатшысы Раухан Тоғымбаева, «Қазспорт» телеарнасының директоры Павел Цыбулин, спорт журналистері Нұрғазы Сасаев, Дина Тұрарқызы, «Қазспорт» телеарнасының продюссері Асхат Сағынаев, «Қазспорт» телеарнасының тілшісі Ермек Төренияз және еліміздің өзге де өңірінен келген журналистер қатысып, өздерінің пікірлерін, ұсыныс-тілектерін білдірді.
Мадияр ҚҰДИЯРҰЛЫ
