Отырыста Ауған соғысы ардагерлеріне және ардагерлік ұйымдарға қатысты бірқатар өзекті әрі маңызды мәселелер талқыланды. Жиын салтанатты марапаттау рәсімімен басталды. Қазақстан Республикасы Президентінің Жарлығына сәйкес және Елбасы атынан Мәжіліс депутаты, «Нұр Отан» фракциясының мүшесі, QAZAQSTAN ARDAGERLERI қауымдастығының төрағасы Бақытбек Смағұл Ауған соғысының үш ардагеріне «Құрмет» орденін табыстады.
Олар «Ауғанстан ардагерлері кеңесі» төрағасының орынбасары Бейсенғали Арыстамбеков (Алматы облысы Қарасай ауданы), «Боевое братство» филиалының төрағасы Бауыржан Мұхамедиев (Қарағанды облысы Балқаш қаласы) және «Ауғанстан және жергілікті соғыстар ардагерлерінің одағы» төрағасының бірінші орынбасары Серік Оспанов (Астана қаласы).
Басқосуда QAZAQSTAN ARDAGERLERI қауымдастығының төрағасы Ауған соғысының ардагерлері Елбасы Н.Назарбаевтың «Қазақстандықтардың әл-ауқатының өсуі: табыс пен тұрмыс сапасын арттыру» атты Қазақстан халқына Жолдауында алға қойған «Мектептерде әскери-патриоттық тәрбиенің рөлін күшейту» міндетін жүзеге асыруға атсалысып, жас ұрпақ бойында туған жерге деген махаббат пен бабадан қалған батырлық қасиетін дарытуға үлес қосатынын айтты. Ол сонымен қатар «Ауғанстаннан кеңес әскерлерінің Шектеулі контингентінің шығарылуының 30 жылдығына» орай арнайы медаль шығару туралы шешім қабылданғанын да тілге тиек етті. Мерейтойға арналған медальмен қатары 18 мыңнан асатын барлық Ауған соғысының ардагерлері марапатталмақ.
– Бүгінде Ауған соғысының ардагерлері Елбасының биылғы 5 қазандағы Жолдауында айтылған «Сарбаз» балалар-жасөспірімдер бірлестігін құрып, мектептерде әскери-патриоттық тәрбиенің рөлін күшейту міндетін орындауға белсенді қатысуда. Әскери-патриоттық тәрбие беру ісінде осы жылдар ішінде әрқайсымыз өз саламызда, өз өңірімізде біраз нақты іс тындырдық, мол тәжірибе қордаладық. Біз атқаратын жұмыс әлі көп. Енді бұл жұмысты бірлесе әрі үйлесімді негізде жүргізуге тиіспіз, – дейді Бақытбек Смағұлұлы.
QAZAQSTAN ARDAGERLERI қауымдастығы өткізген еліміздегі Ауған соғысы ардагерлері ұйымдарының кезектен тыс конференциясында барлық ұйым басшылары «Қазақстанның интернационалист-жауынгерлерінің ардагерлік ұйымдарының Орталық Кеңесін құру» туралы шешім қабылдады.
Аталған кеңес өскелең ұрпақты әскери-патриоттық рухқа тәрбиелеу, Ауған соғысы ардагерлерін әлеуметтік қолдау, сондай-ақ Қорғаныс министрлігі ұсынған, мүдделі мемлекеттік органдардың бірлескен бұйрығымен бекітілген «Ауғанстаннан кеңес әскерлерінің Шектеулі контингентінің шығарылуының 30 жылдығына арналған іс-шараларды өткізу жөніндегі негізгі жоспар» бойынша ары қарайғы жұмыстар мен іс-қимылдарды үйлестіретін болады. Бұл жұмысқа басшылық ету QAZAQSTAN ARDAGERLERI қауымдастығына жүктелді.
