Алайда журналистерге берген жауабында министр күдіктілердің Қызылорда облысының тұрғындары екенін ғана хабарлап, қылмыскерлердің саны қанша екенін айтпады. Жалпы оқиға бойынша Қылмыстық кодекстің «адам өлтіру» бабымен іс қозғалып, күдіктілерге іздеу жарияланған.
Қайғылы жағдайдан кейін марқұмның туыстарымен сөйлескен уақытта браконьерлер шабуылынан қаза тапқан инспектор Ерлан Нұрғалиевтің ауруханаға жедел емес, кеш жеткізілгендігі белгілі болып отыр.
«14 қаңтар күні шамамен кешкі сағат 6-да ағама браконьерлер шабуыл жасады деген хабар жетті. Мен дереу барлық жедел қызметтерге хабарластым, маған қылмыскерлерді ұстау жоспары жарияланғанын айтты. Ерланның қансырап жатқан жерін анықтау қиын болды, браконьерлер машинаның кілті мен GPS құрылғысын алып кеткен. Ерланның қасындағы жұмыстасы хабарласты. Ол маңда телефон ұстамайды, бір амалын тауып хабарласқан екен. Біз оларды іздестіруді жеделдету үшін тікұшақ ұшыру керек екенін айтып едік, бірақ рұқсат етпеді», дейді марқұмның інісі Нұрлан Нұрғалиев.
Оның айтуынша, санавиация шақырылмаған. Сол себепті Ерлан Нұрғалиевті реанимациясы бар ауруханаға 12 сағатта әрең жеткізген.
«Біз Қарағанды облысы, Қарақайың кентінде машинаны күтіп алдық. Ерланның қолын ұстағанымда ол қорылдап жатты, желке тұсынан жараланғанын көрдім. 80 шақырым жердегі Баршино ауылына жеткенше «санавиация шақырыңдаршы» деп жалындым. Бірақ ешкім құлақ аспады, шақырмады. Сөйтіп Қорғалжынға келдік. Жедел жәрдем машинасы да, реанимация да жоқ екен. Сөйтіп Малиновкаға келгенде жедел жәрдемге хабарластық. Олар да «Қалаға кіреберістен ғана алып кете аламыз» деді. Ауруханаға таңғы 6-да жеттік. Арада қанша уақыт өтті!», дейді мерт болған қорықшының бауыры.
Биыл Қарағанды облысында осымен екінші рет заңсыз киік ату фактісі тіркеліп отыр. Айдың басында Ұлытау ауданында полиция қызметкері заңсыз киік аулады деген күдікпен ұсталған болатын.
Мирас АСАН,
«Egemen Qazaqstan»
