Қазақстан • 23 Қаңтар, 2019

Алматы облысында 1332 әйел онкологиялық есепте тұр

76 реткөрсетілді

Аймақта әйелдер арасындағы жатыр мойны обырының қатерлі ісігі дертінің алдын алу шаралары жүріп жатыр. Қазір облыс бойынша 1332 адам онкологтардың есебіне алынған.

Алайда, Алматы аймақтық онкологиялық диспансерінің дәрігерлері бұл көрсеткіш әлі де өсуі мүмкін дейді. Өйткені, аты жаман дерттің алғашқы белгілерін анықтау баяу жүріп жатыр екен. Оған әйелдердің өз денсаулығына салғырт қарап, дер кезінде дәрігерге қаралмауы  мен скринингтен өтуге келмеуі себеп дейді мамандар.

- Алыс ауылдарда тұратын әйелдер дер кезінде скрининг тесттен өтпеуі салдарынан көбіне аурудың 3-4 сатысында ғана дәрігер көмегіне жүгінеді. Нөлдік сатыда, яғни бастапқы кезеңде ауру анықталған жағдайда әйел аурудан толық жазылып кетеді деп сеніммен айтуға болады, -  дейді  Алматы аймақтық онкологиялық диспансерінің директоры Саяхат Олжаев

Өткен жылы осы диспансерде 70 мың әйел скрининг тест тапсырған. Олардың ішінен 812 әйел тіркеуге алыныпты. Бұлардың 38 проценті ғана аурудың бірінші сатысында дәрігер көмегіне жүгінген екен. Өкінішке қарай, былтыр осы дерттен облыс бойынша 63 әйел жарық дүниемен қоштасыпты.

Қалмаханбет МҰҚАМЕТҚАЛИ,

«Egemen Qazaqstan»

Алматы облысы

Баннер
Соңғы жаңалықтар

Ұқсас жаңалықтар