25 Қаңтар, 2019

Оралда үй-күйсіз жандарға «сарқыт» берілді

663 рет
көрсетілді
2 мин
оқу үшін

Орал қаласында белгілі тұрағы жоқ жандарға бұл күні таңғы ас мейрамхана мәзірінен бұйырды. Шаһардағы осындай адамдарға арналған бейімдеу орталығына Қазақстан халқы Ассамблеясы өкілдері келіп, 40 адамға тегін ас таратты.

Оралда үй-күйсіз жандарға «сарқыт» берілді

Бұл шара Қазақстан халқы Ассамблеясының биылдан бастап қолға алған «Ұлы дала дәстүрлеріне» негізделген қайырымдылық аясында ұйымдастырылған. Батыс Қазақстан облысы ҚХА «Қоғамдық келісім» КММ басшысы Медхат Қамбетовтың айтуынша, Ассамблея биыл қазақ халқының игі дәстүрлері негізінде «Сарқыт», «Сыбаға», «Шашу», «Асар», «Қамқор», «Тоқымқағар», «Ерулік», «Жылу», «Көрімдік», «Бата», «Бес жақсы», «Кәде» атауларымен жыл соңына дейін қайырымдылық шараларын өткізеді.

- Біздің бастамамызға қаладағы бірнеше мейрамхана үн қосып, қолдау білдірді. Қазір қыстың кезі, түн суық. Бұл жерде белгілі тұрағы жоқ жандардың бассауғалап, қонып кетуіне жағдай жасалған. Тағдыр тәлкегіне түскен бұл кісілерге барынша көмек көрсету, жанашыр болу – халқымыздың ежелден келе жатқан қайырымдылық дәстүрі ғой, - дейді БҚО ҚХА «Қоғамдық келісім» КММ басшысы Медхат Қамбетов.

Акцияның атауы да «Сарқыт» деп өте сәтті қойылыпты. Мейрамхана көбінесе ұлан-асыр той-думан өтетін жер болса, осы тойдан мұқтаж жандарға сарқыт тарату – ғасырлардан келе жатқан қазақы дәстүрдің заманауи көрінісі секілді.

- Біздің Әлеуметтік бейімдеу орталығының тұрақты бөлімінде қазір 60 адам тұрып жатыр. Оларға заңгерлік, дәрігерлік және психологиялық көмек көрсету, құжаттарын реттеу, зейнетақы тағайындау, жұмысқа орналастыру мәселелерімен айналысамыз. Бұған қоса 40 адамға арналған түнемелік орынға күн сайын кешкі 18.00.-ден таңғы 10.00.-ға дейін қонып кету үшін қаладағы қаңғыбас-кезбелер жиналады. «Сарқыт» осы топқа арналған, - дейді орталықтың бөлім басшысы Нұрхат Жайлауов.

Қазбек ҚҰТТЫМҰРАТҰЛЫ,

«Egemen Qazaqstan»

Батыс Қазақстан