Тағы не бастап отыр деп ойлап қалсаңыз, мұндағы әңгіме 35 жас шамасындағы тұрмысқа шықпаған қыздар төңірегінде болып отырғанын бірден айта кетейік. Жұмысқа біржола ден қойып, салтбасты, сабау қамшылыққа үйренген бойжеткендер де жар сүйіп, отбасы құрудан кенде қалмасын деген шешімге келген бірқатар қытайлық компаниялар қызметкерлеріне қосымша демалыс беруді жөн көрген. South China Morning Post басылымының жазуынша, Ханчжоу қаласындағы екі бірдей компания қарамағындағы 30 жастан асқан қыздарға қосымша демалыс жариялаған. Артынша қалалық мектепте де осындай шешім қабылданып, ұстамды ұстаздар да жеке өміріне уақыт арнауы керек деп тауыпты.
Тұрмысқа шықпаған жиырма бес жастан асқан қыздарды «Шың-нүй» () – «отырып қалған қыз» деп айту қытай салтында да бар дүние екен. Тумысынан еңбекқор келетін қытай ұлтының осы бір қасиеті енді өз бастарына таяқ болып тиіп отырған сыңайлы. Жұмысты жанығып істеп, отбасы құруға асықпайтын әйелдер қауымының жыл сайын артып келе жатқаны осының айқын дәлелі.
Дайындаған Ая ӨМІРТАЙ,
«Egemen Qazaqstan»
