Жастарға жалындаған жарасады
Сәрсенбі, 21 қараша 2012 7:09
Өткен дүйсенбі күні Шығыс Қазақстан облысының әкімі Бердібек Сапарбаев «Жас Отан» жастар қанатының II съезіне қатысқан 88 делегатпен кездесті. Оған жоғары оқу орындарының ректорлары, басқарма, департамент басшылары, бұқаралық ақпарат құралдарының өкілдері қатысты.
Сәрсенбі, 21 қараша 2012 7:09
Өткен дүйсенбі күні Шығыс Қазақстан облысының әкімі Бердібек Сапарбаев «Жас Отан» жастар қанатының II съезіне қатысқан 88 делегатпен кездесті. Оған жоғары оқу орындарының ректорлары, басқарма, департамент басшылары, бұқаралық ақпарат құралдарының өкілдері қатысты.
– Бүгін сіздермен кездескеніме қуаныштымын, – деп бастады әңгімесін өңір басшысы, «Нұр Отан» ХДП Шығыс Қазақстан облыстық филиалының төрағасы Б.Сапарбаев. – Елбасы «Жас Отан» жастар қанатының жаңа стратегиясы жайлы ойларын білдіріп, рухы күшті, жалындаған жастардың бастамаларына әрдайым жолдың ашық екендігін айтып берді. Мемлекеттің дамуы, өркендеуі жастарға байланысты. Қазіргі таңда Қазақстанды бүкіл әлем таниды, қарыштап алға басып келе жатқан еліміз әлемдегі дамыған 50 мемлекеттің қатарына қосылу жолында ізденістер танытуда. Қандай мемлекет болса да оның алға басып, өркендеуі үшін алға қойған мақсаты мен міндеті болатыны белгілі. Міне, сонда ғана көздеген жетістікке жете аласыз. Қазіргі таңда өңірде 18 мыңнан астам «Жас Отан» жастар қанатының мүшесі бар. Облыстың 19 аймақтық филиалында, үкіметтік емес ұйымдарында жаңа стратегия талқыланғаны мәлім. Жастар съезінде Елбасы Н.Назарбаев жастарды жұмыспен қамту мен жұмысқа орналастырудағы проблемалар, сапалы білімнің қолжетімділігіне қол жеткізу, денсаулық сақтау, тұрғын үй мәселелері туралы ой бөлісті. Сонымен қатар, қазақстандық жастардың мәдени дамуы мен бірлігі жолындағы келісім үлгісін нығайту, жастар арасындағы кәсіпкерлікті дамыту мен Мемлекет басшысының зияткер ұлт құру туралы идеясын іске асыру, Отанымыздың шынайы патриоттарын тәрбиелеу жөнінде де жаңа міндеттер қойылды, – деп сөзін жалғастырды өңір басшысы.
Енді, өңірде атқарылып жатқан істерге тоқтала кетсек.Үстіміздегі жылдың 10 айында жұмыссыздық 5 пайыз төмендеді, бұл республикалық көрсеткіштен төмен. «Жаңа технология» бойынша 613 миллиард теңгенің 39 жобасы жүзеге асырылмақ. Бір ғана «Азия Авто» көлік құрастыру зауытын алайық. Келер жылы кәсіпорынға 1539 адам жұмысқа қабылданбақ. Оның ішінде инженер, шебер, басқа да мамандық иелері бар. Ал бұл мамандықты алып шыққан жастар алысқа бармай-ақ, өз жерінде еңбек етуі тиімді емес пе. «Электронды еңбек биржасы» арқылы жастардың қалаған мамандығы бойынша жұмысқа орналасуға мүмкіндік тумақ. Ол барлық аудандарда болады. Жоғары оқу орындарына ҰБТ кезінде жастар төмен баға алып жатады. Неге? Бұдан қорытынды шығару үшін кешенді тестілеуге әзірлік жөніндегі орталық ашылмақ. Ол жерде мектеп бітіруші түлектер әзірленіп қана қоймай, сынақтың қыр-сыры жайлы мәліметтер ала алады.
Өңір басшысының айтуынша, Шығыс Қазақстан облысының грант мөлшері жыл сайын өсіп келеді. Мәселен, 2007 жылы көбінесе ауыл жастарына басымдық беретін 180 жасқа тегін оқыту гранты бөлінсе, қазір оның саны 820-ға жеткен. Ал келер жылы талапты түлектерге деп 900 грант бөлінген. Білім алып жатқан жастарды жатақханамен қамтамасыз ету де назарда.
Қазіргі жастар денсаулығы мықты, спортты серік еткен, тепсе темір үзетін, жалындаған, рухы күшті, алға қойған мақсаттарын орындамайынша тыным таппайтын қасиеттерімен ерекшеленіп тұруы тиіс. Ол үшін облыста барлық жағдай жасалған. Бұл күндері өңірде 2784 спорт қондырғысы жұмыс істеп тұр, 291 мәдениет үйі бар. 2013 жылы барлық аудандар мен қалаларда жасанды футбол алаңдары іске қосылмақ.
Семей мемлекеттік педагогикалық институтының студенті, «Жас Отан» жастар қанаты Семей филиалының атқарушы директоры, съезд делегаты Еркебұлан Балтабеков өңір басшысының өздерімен кездескеніне алғысын айтып, Семей атом полигонындағы ядролық қарудан бас тарту жөніндегі Елбасының көрегендік саясатын қолдайтынын, осыған байланысты Семей мен Курчатов қалаларында жастардың бірқатар игі шараларды өткізгенін жастар форумында айтқанын тілге тиек етті.
– Съезден арқаланып қайттым. Елбасы жастар форумында жоғарыдан төменге, яғни қаладан ауылға қарай бет бұрып, жастар орталығын құру, олардың белсенді әрекет жасаулары жөнінде айтты. Жарма ауданының жастары да бұл бағытта біршама жұмыстарды атқарып жатыр. Біздің Жастар үйінде 7 адам қызмет етеді. 12 миллион теңге қаржы бөлінді. Бұл қаржыны тиімді жұмсап, бір жылда жүзге жуық шара өткіздік. Алдағы уақытта да жармалықтар еліміздің көркеюіне өз үлестерін қоса береді, – деді кездесуде сөз алған Жарма ауданындағы Жастар үйінің директоры Маржан Бақытқызы.
– Маржан өте орынды айтты. Бір ауданға 12 миллион көп қаржы емес. Басқа аудандарда да Жастар үйі белсенді жұмыс істеуі тиіс. Жақында облыстық мәдениет басқармасы басшыларына Жастар радиосын және Интернет-телевизия ашу жөнінде тапсырма жүктедім. Бұдан былай белсенділердің өз ойын радиода немесе интернет-телевизияда білдіруіне шек қойылмайды, – деді өңір басшысы.
Бұдан кейін сөз алған белсенділер «Жас Отан» жастар қанатының қоғам өміріне белсене араласуы, проблемалар мен кемшіліктерді бірлесіп шешу, өңірдегі маңызды бастамаларды қолдау, оған үн қосу жайлы пікір білдірді. Облыс әкімі Бердібек Сапарбаев кездесу соңында жастарға оқуда алда, еңбекте үздік болуға тілек білдіріп, ел игілігі жолында аянбай тер төгуге шақырды.
Оңдасын ЕЛУБАЙ,
«Егемен Қазақстан».
Шығыс Қазақстан облысы.
