Мен білетін Болат
Сенбі, 28 сәуір 2012 1:20
«Алып анадан туады», деген жақсы бір нақыл сөз бар. Қазақ халқы ақынға да, батырға да, данаға да, көсемге де кенде емес. Туған елінің бағына туып, бүкіл өмірін сол жолға арнаған атақты адамдар қаншама?! Олар туралы айтылып та, жазылып та жүр. Халық жүрегінен орын алған мұндай жандар қашанда құрметке лайық. Менің айтпағым, қарапайым қазақтың қара шаңырағында дүниеге келіп, жастайынан көптің аузына іліккен, қатардағы жауынгерден генерал-лейтенант дәрежесіне дейін жеткен әскери әріптесіміз әрі досымыз Болат Бақытжанұлы Жанасаев туралы болып отыр.
Сенбі, 28 сәуір 2012 1:20
«Алып анадан туады», деген жақсы бір нақыл сөз бар. Қазақ халқы ақынға да, батырға да, данаға да, көсемге де кенде емес. Туған елінің бағына туып, бүкіл өмірін сол жолға арнаған атақты адамдар қаншама?! Олар туралы айтылып та, жазылып та жүр. Халық жүрегінен орын алған мұндай жандар қашанда құрметке лайық. Менің айтпағым, қарапайым қазақтың қара шаңырағында дүниеге келіп, жастайынан көптің аузына іліккен, қатардағы жауынгерден генерал-лейтенант дәрежесіне дейін жеткен әскери әріптесіміз әрі досымыз Болат Бақытжанұлы Жанасаев туралы болып отыр.
Жастықтың отын жалындатып, үнемі ізденіс пен алға ұмтылған генералдың өмір жолы кімге де болсын үлгі-өнеге. Ол алдына қойған мақсатына жету үшін Политехникалық институттың ІІІ курсында жүрген кезінде оқуды тастап, қиыншылықтарға қарамастан, әскери училищеге түсіп, әскери салаға бет бұрды. Бұл – сол кездегі әрбір жастың тәуекелге бел буып бара бермейтін ерекшеліктерінің бірі. Ол кезде әскер атану, әскери саланы батыл меңгеру – көптеген жастардың арманы еді. Сөйтіп, бойдағы ерік-жігер жас жігітті осындай асу-белестерді бағындыру үшін алға ұмтылдырды. Ақыры мұндай жігерлілік оның бойында командирлік қасиетті қалыптастырды. Уақыт өте келе ең жас басшылардың бірі атанып ел аузына ілікті, көп ұзамай генерал дәрежесіне жетті.
Әлі есімде жасындай жарқылдаған Болаттың бойындағы елді соңына ерте білетін командирлік қасиетті сонау 70-жылдарда білдім. Кеңес өкіметінің дүркіреп тұрған кезеңдерінде біз оқыған училищеге сол кездегі Қазақстан Компартиясы Орталық Комитетінің бірінші хатшысы Дінмұхаммед Ахметұлы Қонаев келіп, училище курсанттарымен кездесіп, жауынгер курсанттардың тұрмыс-тіршілігімен жан-жақты танысты. Пікір алмасты, қордаланған мәселелерді өзіне түртіп алды. Сөзін қорытындылап кетуге оқтала бере: «Қане, кімде қандай сұрақ бар? – деп залға көз жүгіртті. Дәл соны күткендей: «Менде сауал бар еді», деген ашық дауыс саңқ ете қалды. Сөйткен жас курсант Жанасаев аты дардай училищенің мәдениет сарайы жоқ екенін және де училищеде оқитын талантты жастардың сабақтан бос уақытта бір бас қосатын орынға зәру екенін айтты.
Осылайша залда отырған курсанттарды өзіне баурап алған Болаттың өтініші дереу қолға алынып, училищеге зәулім Мәдениет сарайы тез арада тұрғызылды. Өзінің талапшылдығы мен іскерлігін көрсете білген Болат даралана түсті.
Әскери борышын өтеу – әрбір азаматтың Отан алдындағы парызы. Мұны жетік түсінетін Болат Жанасаевтың өмір жолы адам мен тұлға қалыптасуының өнегелі көрінісі болып табылады. Жастайынан әскери өмірдің қыр-сырын меңгерген Болат училищеден соң жас лейтенант шенінде әскери өмірін Германиядағы Кеңес әскери тобында қызмет етуден бастады. Одан 1987 жылы Мәскеудегі М.В.Фрунзе атындағы әскери академияны да ойдағыдай бітіріп шықты. Бір орында тұрақтап қалмай үнемі білімін жетілдіруді аңсайтын жас талап 2008 жылы Мәскеудегі Ресей Федерациясы Қарулы Күштері Бас штабы әскери академиясын да үздік бітірді. Бұл әскери салада қызмет атқаратын кез келген офицердің аңсайтын арманы. Демек, Болат Бақытжанұлының әскери қызметін саралай келе, взвод командирінен Қазақстан Республикасы Қорғаныс министрінің орынбасарына, лейтенанттан – генерал-лейтенантқа дейін өсу кімге де болса өнеге. Осының барлығы Болаттың темірдей тәртіпке бас иіп, әскери жарғыларды бұлжытпай орындауы жақсы азамат болып қалыптасуына көмегін тигізді. Кеңес өкіметі тұсындағы қиын кезеңде ішкі әскер полк штабын басқарып, Ферғана облысында болған жаппай келеңсіздіктерді болдырмауда қоғамдық тәртіпті орнатуға барынша атсалысты. Осындай қым-қуыт әскери өмірмен ғылымды шебер ұйымдастырған Болат кандидаттық диссертациясын қорғады. Бұның бәрі оның өзін-өзі жетілдіріп, үнемі ізденуде жүретіндігін көрсетті.
Әскери өмір ер-жігітті патриоттыққа тәрбиелеп, жас күнінен бастап, халық алдындағы міндетін сезінуге мүмкіндік берді. Ол атақ-даңққа, басқа да марапатқа да кенде емес. Болаттың барынша қарапайымдылығымен көрегенділігі, адами қасиетімен бірден адамды баурап алуы, парасатты тұлғасын биіктеткен үстіне биіктете түседі.
Абай ТАСБОЛАТОВ, Парламент Мәжілісінің депутаты, генерал-лейтенант.