Даму үшін ынталандыру
Сейсенбі, 8 мамыр 2012 7:26
«Интергаз Орталық Азия» АҚ жұмысшыларының кәсіподағы қызметкерлерді және олардың отбасыларын жан-жақты қамқорлыққа алған
2012 жылдың 1-18 сәуір күндері аралығында «Интергаз Орталық Азия» АҚ еңбеккерлерінің 9-10-11 сыныптарда оқитын балалары мен немерелері арасында математикадан олимпиада өткізілді. Бұл шара «Интергаз-интерсынып» бағдарламасының аясында «Интергаз Орталық Азия» АҚ-тың құрылғанына 15 жыл толған мерекелік шаралар ауқымында өткізілді. Бұл игілікті шараны өткізуге компанияның бас директоры Серік Естай бастамашы болды.
Сейсенбі, 8 мамыр 2012 7:26
«Интергаз Орталық Азия» АҚ жұмысшыларының кәсіподағы қызметкерлерді және олардың отбасыларын жан-жақты қамқорлыққа алған
2012 жылдың 1-18 сәуір күндері аралығында «Интергаз Орталық Азия» АҚ еңбеккерлерінің 9-10-11 сыныптарда оқитын балалары мен немерелері арасында математикадан олимпиада өткізілді. Бұл шара «Интергаз-интерсынып» бағдарламасының аясында «Интергаз Орталық Азия» АҚ-тың құрылғанына 15 жыл толған мерекелік шаралар ауқымында өткізілді. Бұл игілікті шараны өткізуге компанияның бас директоры Серік Естай бастамашы болды.
Бұл жобаны өткізудегі басты мақсат біздің қызметкерлеріміздің балалары арасында математика саласындағы ең талантты да қабілетті оқушыларды анықтау болатын. Олимпиада қорытындысынан кейін бұл балаларға сапалы білім алу үшін барынша жағдай жасау көзделінген.
Олимпиада екі кезең бойынша өткізілді. Бірінші тур бойынша компанияның аймақтағы құрылымдары еңбеккерлерінің балалары әрбір филиалдарда тестілеуден өтті. Сөйтіп, олимпиадаға қатысушылардың жалпы білім деңгейі анықталды. Осы тестілеу барысында анықталған қабілетті де талантты оқушылар екінші – қорытынды турға жіберілді. 2012 жылдың 14 сәуірінде компанияның барлық өңірлік және аймақтық бөлімшелерінен іріктелген 42 оқушы Алматы қаласына келіп олимпиаданың ақтық финалына қатысты. Алматыдағы Қастеев атындағы демалыс базасында бес күн бойы бұл балаларды ЮНЕСКО-дан келген оқытушылар ақтық сынаққа дайындады. ЮНЕСКО мамандары балалардың шығармашылық және жалпы дүниетаным қабілеттерін арттырумен қатар оларды әртүрлі мәдени бұқаралық шараларға тартты. Финалға қатысушылар Алматы қаласының көрікті орындарында, атап айтқанда Көктөбе, Медеу, Шымбұлақ спорт орталықтарын аралады. «Сұңқар» атты қырандар фермасында болды. Олардың әрбір күні спорт жарыстары, мәдени шаралар өткізумен ерекшеленді.
2012 жылдың 6 сәуірінде Қазақстан-Британ техникалық университетінің базасында олимпиада финалы өтті. Сынаққа түскен оқушылардың білім дәрежесін Қазақстан Республикасы жоғары оқу орындарынан келген математика ғылымдары кандидаттарынан, докторларынан және профессорларынан құралған кәсіби деңгейі жоғары әділқазылар алқасы бағалап отырды. 18 сәуірде олимпиаданың салтанатты түрде жабылу рәсімі болып өтті. Оған Қазақстан-Британ техникалық университетінің ректоры, экономика ғылымдарының докторы, профессор Ескендір Бейсембетов және ЮНЕСКО Клубтары Қазақстан ұлттық федерациясының бірінші вице-президенті қатысып, олимпиада жеңімпаздарын құттықтап, сөз сөйледі. Оларға болашақ білім айдынында сәттілік тілеп, бағалы сыйлықтар тапсырды. Олимпиадаға қатысушылардың барлығы бірдей дипломдарға ие болды.
11 сынып оқушылары арасында өткен сайыста Айдын Қуанышев жеңімпаз деп танылды. Оның әкесі «Интергаз Орталық Азия» АҚ-ның Алматыдағы электрхимия қорғау «Южный» желілік-өндірістік басқармасының магистральды газ құбыры басқармасында инженер болып еңбек етеді. Айдын Қуанышевқа олимпиада жеңімпазы ретінде Қазақстан-Британ техникалық университетінде оқу үшін арнайы грант тапсырылды. Екінші орынды иеленген Тұрғыт Дүйісовке жоғары оқу орнына түсу барысында 50 пайыз жеңілдік алу мүмкіндігі берілді. Тұрғыттың анасы «Интергаз Орталық Азия» АҚ-тың «Атырау» желілік-өндірістік басқармасының магистральды газ құбыры басқармасында жабдықтау жөніндегі маман болып қызмет істейді. Үшінші орынды Хафиз Давлетьяров иеленді. Оның әкесі компанияның Орал қаласындағы инженерлік-техникалық орталық бөлімшесінде жүргізуші болып жұмыс істейді. Хафизге Қазақстан-Британ техникалық университетіне түсу кезінде 30 пайыз жеңілдік жасалатын болды. Сонымен бірге, барлық топтардың жеңімпаздары iPad, Nokia-9 ұялы телефондары, Samsung Р6200 планшеттері сыйлыққа берілді. Осы жерде атап өтетін бір мәселе, олимпиада жеңімпаздарының барлығы дерлік компания жұмысшыларының балалары. Бұл өз кезегінде олардың болашақтағы білім деңгейін арттырып, жоғары кәсіби маман атануларына компания тарапынан жасалып отырған қамқорлықты көрсетсе керек.
Осы игілікті шараны ұйымдастыруға «Интергаз Орталық Азия» АҚ еңбеккерлерінің кәсіподақ ұйымы және ЮНЕСКО Клубы ұлттық федерациясының мұрындық болғандығын ерекше атап өткен жөн. Кәсіподақ компания еңбеккерлерін ерікті түрде біріктіретін жеке коммерциялық емес, қоғамдық ұйым болып табылады. Компания кәсіподағы Қазақстан Республикасының Конституциясының, Еңбек кодексінің басқа да заңдық нормативтік актілерінің талаптарына және «Интергаз Орталық Азия» АҚ-тың актілеріне, сонымен бірге, өздерінің жеке жарғыларының талаптарына сәйкес жұмыс істейді.
«Интергаз Орталық Азия» АҚ өзінің жеке кәсіподақ ұйымын құруды Қазақстан Республикасының 2007-2009 жылдардағы лайықты еңбек туралы Ұлттық бағдарламасы шеңберінде жүзеге асырды. Ал 2007 жылдың 6 қарашасында ол Қазақстан Республикасының мемлекеттік органдарында ресми түрде тіркелді. 2008 жылдың 4 қазанында «Интергаз Орталық Азия» АҚ – жұмыс беруші және «Интергаз Орталық Азия» АҚ жұмысшыларының арасында Ұжымдық келісім-шарт қабылданды. Қазіргі кезде «Интергаз Орталық Азия» АҚ орталық аппаратында және барлық өндірістік филиалдарында еңбек ететін 5 408 еңбеккер кәсіподақ ұйымының мүшесі болып табылады.
«Интергаз Орталық Азия» АҚ еңбеккерлерінің кәсіподағы еріктілік, тәуелсіздік өзін өзі басқару демократия, ынтымақтастық, заңдылық, тең құқылық және жариялылық негіздеріне сүйене отырып, өз мүшелерінің еңбек, әлеуметтік-экномикалық құқықтары мен мүдделерін қорғайды. Қазақстан Республикасының заңдылықтарына және жұмыс берушінің актілеріне сәйкес өз мүшелеріне еңбек қауіпсіздігі мен жағдайын қорғау мақсатында жан-жақты жағдай жасап, құқықтық көмек көрсетеді.
«Интергаз Орталық Азия» АҚ еңбеккерлері кәсіподағының көптеген міндеттерінің арасында ақпараттық насихат, мәдени ағарту және сауықтыру жұмыстары ерекше орын алады. Сондықтан мұнда осындай олимпиадалар өткізумен бірге дене шынықтыру және спорт шаралары кеңінен өткізіліп, саламатты өмір салты жан-жақты насихатталады. «Интергаз Орталық Азия» АҚ-тың барлық құрылымдары мен филиалдары арасында жыл сайын көптеген спорт түрлері бойынша қысқы және жазғы спартакиадалар өткізу дәстүрге айналған.
Міне, осындай жүйелі жұмыс пен игілікті шаралардың арқасында 2011 жылдың қорытындысы бойынша «Интергаз Орталық Азия» АҚ кәсіподақ ұйымы «ҚазМұнайГаз» ҰК» АҚ-ның барлық кәсіпорындары мен ұйымдарының кәсіподақтары арасында үздік деп танылды.
Алексей ЖУКОВ.
