Бірлік деген ұлы күш
Сенбі, 19 мамыр 2012 8:35
Елімізде тұратын ұлттар мен ұлыстар өкілдерінің басын қосқан Қазақстан халқы Ассамблеясының ХІХ сессиясы «Қазақстандық жол: тұрақтылық, бірлік, жаңғырту» тақырыбында өтті. Онда Мемлекет басшысы, Қазақстан халқы Ассамблеясының Төрағасы Нұрсұлтан Назарбаев сөз сөйлеп, жаңару кезеңінің басты құндылықтары мен әлеуметтік, экономикалық даму қадамдарын тағы бір саралап берді. Этносаралық, конфессияаралық татулыққа, қоғам бірлігін қамтамасыз етуге үлкен үлес қосып келе жатқан саяси институт алдына тың міндеттер жүктеді.
Сенбі, 19 мамыр 2012 8:35
Елімізде тұратын ұлттар мен ұлыстар өкілдерінің басын қосқан Қазақстан халқы Ассамблеясының ХІХ сессиясы «Қазақстандық жол: тұрақтылық, бірлік, жаңғырту» тақырыбында өтті. Онда Мемлекет басшысы, Қазақстан халқы Ассамблеясының Төрағасы Нұрсұлтан Назарбаев сөз сөйлеп, жаңару кезеңінің басты құндылықтары мен әлеуметтік, экономикалық даму қадамдарын тағы бір саралап берді. Этносаралық, конфессияаралық татулыққа, қоғам бірлігін қамтамасыз етуге үлкен үлес қосып келе жатқан саяси институт алдына тың міндеттер жүктеді. «Қазақстандық толеранттылықты нығайту – бәрінен бұрын, Қазақстан халқы Ассамблеясын нығайту мен дамыту. Бізге Ассамблеяның өңірлердегі жұмысын сапалық тұрғыда күшейту қажет. Оларда тәжірибелі және беделді кадрлар жұмыс істеуі керек», деп атап көрсетті Елбасы.
Облыстық Қазақстан халқы Ассамблеясының XVII сессиясын ұйымдастырушылар Президенттің талабын жан-жақты ескергені байқалды. Облыс әкімі, облыстық Қазақстан халқы Ассамблеяның төрағасы Серік Біләлов өз баяндамасына бірліктің берекелі бесігіне айналған, әлімсақтан қалыптасқан өңірлік ұлтаралық татулық пен достықтың тамырлы тәжірибелерін арқау ете отырып, тұрақтылық, бірлік, жаңғырту ұғымдарын үндестіру, үйлестіру, мемлекетіміздің тірегі саналатын қасиетті құндылықтарды орнықтыру мәселелеріне кеңінен тоқталып өтті. Облыста экономикалық, әлеуметтік салалар бойынша атқарылып жатқан ауқымды шаралар мен үдемелі үдерістерді тілге тиек етті. Индустрияландыру картасы аясында 2014 жылға дейін 30 инвестициялық жоба жүзеге асатын болады. Олардың құны 43 миллиард теңгені құрайды. Осылайша Жолдау қағидаттарына ерекше басымдық беріліп, тұрғындардың өмір сапасын, тұрмыс-тіршілігін жақсарту қашанда басты міндет болып қала береді, деді аймақ басшысы.
Жиында тілдің үштұғырлығы, оның ішінде барша қазақстандықтарды біріктіретін мемлекеттік тіл жайы, Елбасы ұсынған Малайзия тәжірибесін кеңінен пайдалану төңірегінде тұщымды ойлар өрбіді. Облыстық ассамблея құрамындағы “Видергебурт” неміс этномәдени бірлестігі мен Қазақстанның орыс, славян және казак ұйымдары жергілікті қауымдастығының өзге ұлт өкілдеріне қазақ тілін үйретудегі тәжірибесі қолдау тапты. Жастардың білім алуы, лайықты қоғамдық жұмысқа араласуы, еңбек етуі, қолжетімді баспанаға ие болуы, спортпен шынығуы мәселелері хақында да келелі ойлар айтылды. 11 этномәдени бірлестік құрамында жастар клубтарының құрылуы әлі де аздық етеді. Бұл орайда “Жас Отан” жастар қанатын алда іргелі істер күтіп тұр.
Сессияда сөйлеушілер ішінде халықаралық «Қазақ тілі» қоғамы облыстық ұйымының төрағасы Кәрібай Мұсырманның үні жалынды шықты. Тіл жанашыры алқалы кеңестерде қазақша сөйлеуді қалыпты дәстүрге айналдыратын кез жеткенін, тілдік орта осындай қадамдардан басталатын, облыс әкімі Петропавл қаласы мен аудандарда қазақ мектептерінің санын көбейтуге тапсырма бергенін, ендігі белсенділік өзімізге, алдымен қазақтарға байланысты екенін еске салса, мемлекеттік тілдің мәртебесін көтеруге қатысты ұсыныстарды Петропавл қалалық ардагерлер кеңесінің төрағасы Григорий Кухарь, №17 ұлттық өркендеу мектеп-кешенінің армян тілінің мұғалімі Сильва Асланян да қуаттады. Әзербайжан этномәдени бірлестігі жанындағы жастар клубының жетекшісі Тамам Мамедова жастарды мемлекеттік тілді меңгеруге үндеді. Парламент Мәжілісінің депутаты Егор Каппельдың сөзі Елбасы тапсырмаларын орындау баршамыздың міндетіміз деген пікірлермен сабақтасты.
Сессиядан кейін бірқатар азаматтар Президенттің Жарлығына сәйкес “Қазақстан халқы Ассамблеясының қоғамдық “Бірлік” алтын медалімен марапатталды. Алғыс хаттар табыс етілді. Сессияға қатысушылар облыс тұрғындарына арнап үндеу қабылдады.
Облыстық Қазақстан халқы Ассамблеясы төрағасының орынбасары болып “Видергебурт” неміс этномәдени бірлестігінің төрайымы Эльвира Ковзель сайланды.
Өмір ЕСҚАЛИ,
“Егемен Қазақстан”.
Солтүстік Қазақстан облысы.