Солардың бірі – мектеп жанынан мұражай ашуға азаматтарымыз Құмар Нұрғалиев – 150 мың теңге, Таңатар Муфтахиев – 200 мың теңге, Қазталов аудандық мәслихат депутаты Нұрлыбай Жолдыбаев 200 мың теңге көлемінде демеушілік танытса, осы мектебіміздің тағы бір түлегі Мәруаш Мұқанқызы 313 мың теңгенің киімін оқушыларға сыйға тартты.
Осындай игі іс ауылымызда жалғасып жатыр. Жылдың басында мектеп жанында ауыл азаматтарының күшімен мұз айдын ашылды. Дархан Аябалиев пен Самат Сейіткереевтің демеушілігімен аумағы 600 шаршы метр болатын мұз айдыны әдемі қоршалды. Осы айдынның құрылысына Аябалиевтер отбасы 1 млн 200 мың теңге жұмсапты. Бұған дейін де ауылда Тәуелсіздік монументі мен Алтыбақан алаңын тұрғызған атымтай жомарт жандарға ауылдастарының алғысы шексіз.
Аға буынның осындай қамқорлығын сезінген мектеп шәкірттері де үздік жетістіктерімен бізді, ұстаздар қауымын жиі қуантып жүр. 2004-2005 жылы туған ұлдар арасындағы кіші футболдан «Coca-cola-Былғары доп» турнирінің аймақтық іріктеу кезеңінде Талдыапан мектебі ауданда ІІІ орын алып, 17 доп соққан 9-сынып оқушысы Дияс Қалиоллин «Үздік шабуылшы» атанды. Көктерек ауылында кіші футболдан 2008-2009 жылғы ұлдар арасында өткен сайыста талдыапандықтар І орын иеленді. Жақсы ойын өрнегімен көзге түскен 4-сынып оқушысы Нұрәлем Жалмұханов «Үздік ойыншы» атағына ие болды.
1947-1953 жылдары Талдыапан мектебінің меңгерушісі қызметін атқарған Сүлеймен Есетовтің 100 жылдық мерейтойына орай Талдықұдық ауылында 2002-2003 жылғы жасөспірімдер арасында өткен кіші футбол сайысында Талдыапан мектебі жүлделі І орынды қанжығаға байлады. 11-сынып оқушысы Мерлан Жасталапов – «Үздік қорғаушы», 9-сынып оқушысы Диас Қалиоллин «Үздік ойыншы» атанып, арнайы дипломмен марапатталды.
Ал баскетболдан жоғары сынып оқушылары арасында өткізілген «Мектеп лигасы» жарыстарының облыстық кезеңінде жалпыкомандалық есепте қыздар арасында ІІ орын, ұлдар арасында ІІІ орын Талдыапан орта жалпы білім беретін мектебінің оқушыларына бұйырды. Осындай шәкірт дайындаған денешынықтыру пәні мұғалімдері Р.Кенжеғалиев, А.Каргапольцев, Б.Жапаров сынды ұстаздардың ерен еңбегінің нәтижесі деп білеміз.
Ақерке ҒҰБАЙДОЛЛАҚЫЗЫ,
Талдыапан орта мектебінің мұғалімі
Батыс Қазақстан облысы, Қазталов ауданы
