Партияның барлық бағдарламаларын жіті көңілмен саралап, ақыл таразысына салсаңыз, адамдарға нақты қамқорлық жасап, болашаққа сара жол ашуды көздейді және әрдайым адамгершілікке, кісілікке үндейді. Көкшетау қаласындағы Абай Мырзахметов атындағы университеттің жанындағы, құрамында университет оқытушылары, жас ғалымдар мен жүздеген студент топтасқан партияның бастауыш ұйымы бағалы бағдарламалардың жүзеге асуына өз үлестерін қосуда. Осыдан екі жыл бұрын облыстағы бастауыш ұйымдардың арасында өткізілген байқауда екінші орынға ие болдық.
Негізінде, партия ел сеніміне әбден ие болған ұйым. Өйткені оның бар мақсаты − тәуелсіз еліміздің тұғырын биіктету. Оқу орны болғандықтан, жастардың бойына адамгершілік, кісілік ұрығын себу өте маңызды. Біздің бастауыш ұйымның хал-қадерінше қамтып отырған шаруасының бір парасы осы бағытта. Негізі партияның «Ардагерлерді ардақтайық», «Кедергісіз болашақ» тәрізді бағдарламалары жанымызға тым жақын. Біздің бастауыш ұйым ел ішінде партияның алға қойып отырған мақсат-мұраттарын жан-жақты түсіндірумен қатар, нақтылы істерімен де ерекшеленеді. Мәселен, әрбір оқу жылы қарсаңында «Мектепке жол» акциясына белсене қатысу игі дәстүрге айналған.
Ұлы Отан соғысының ардагерлері де басты назарда. Өткен жылы ардагерлерге материалдық көмек көрсетілді. Жаңа жыл қарсаңында Сандықтау ауданындағы балалар үйіне барып, тағдыр тәлкегіне ұшыраған жеткіншектерге жаңа жылдық сый-сияпат жасалды. Киім-кешек, оқу құралдары тәрізді заттай көмек көрсетілді. Жеке адамдармен қатар, облыс орталығындағы кейбір түйінді мәселелерді шешуге де атсалысудамыз.
Застанционный кентіндегі су құбырларын жөндеуге қаржылай көмек көрсеттік. Осы кентте тұратын Марина Бехтольд есімді зейнеткерге үш миллион теңгеге баспана сатып әпердік. Сондай-ақ Дина Мұхамедиярова есімді көп балалы анаға бір миллион теңгеге вагон және 4 тонна көмір жеткізіп беріп, ананың ақ алғысына ие болдық.
Көп балалы аналарға қамқорлық көрсету – азаматтық парыз. Өйткені олар еліміздің ертеңгі болашағын баптау үстінде. Оқу орнында білім алып жатқан студенттер арасындағы әлеуметтік-тұрмыстық жағдайы қиындары да еш уақытта назардан тыс қалмайды. Олардың да қатардан кем қалмай, жаңа заманның талабына сай білім алып шығуына қамқорлық жасаудамыз. Осындай ізгі істерге ұйытқы болып отырған бастауыш ұйымның әр ісі студенттерімізге үлгі-өнеге. Өнегелі жастар өрісін кеңге жаятынына сеніміміз де мол.
Сағынтай ЕЛУБАЕВ,
партия ардагері, Абай Мырзахметов атындағы Көкшетау университетінің президенті, Ұлттық ғылым академиясының академигі
