Өнер отауында елімізге ғана емес, одан тыс жерлерге аты мәшһүр белгілі дирижерлері: «Астана Опера» театры бас дирижерінің орынбасары, Қазақстанның еңбек сіңірген қайраткері Абзал Мұхитдинов, Қазақ ұлттық өнер университетінің «Вокалдық өнер және дирижерлау» кафедрасының доценті Ерлан Бейсембаев, Н.Тілендиев атындағы мемлекеттік академиялық фольклорлық-академиялық «Отырар сазы» оркестрінің дирижері Жалғасбек Бегендіков, Қазақ ұлттық өнер университетінің профессоры, «Дарын» жастар сыйлығының лауреаты, Қазақстанның еңбек сіңірген қайраткері Дәурен Ғылымов, Гнесин атындағы «Душа России» орыс халық аспаптар оркестрінің бас дирижері Владимир Шкуровский бас қосты. Алғашқы күні қонақтар Ө.Сұлтанғазин атындағы Қостанай мемлекеттік педагогикалық университетінде студенттермен кездесті. Онда өнер жайлы кеңінен әңгіме өрбіді.
Негізі биылғы дирижерлер форумы облыстық филармониядағы камералық оркестрдің 15 жылдығына арналып ұйымдастырылды. Сондықтан форумның алғашқы күні қостанайлықтарға камералық оркестрдің концерті ұсынылды.
– Қостанайда түрлі саланың – классикалық, орыс және қазақ ұлт аспаптары оркестрлерінің дирижерлері бас қосып отырмыз. Қостанай облыстық филармониясының бұл форумы өте маңызды шара дер едім. Өнер бөліскенде дамиды. Мұнда әр дирижер өз тәжірибесін, өзінің жаңалығын көрсетеді. Осындай кездесулерден жаңа бастамалар, жаңа байланыстар пайда болады. Бүгін Мәскеуден Владимир Шкуровский Қазақстанға келді, ал біз ертең Ресейге барамыз, осылай тәжірибе алмасамыз. Бұл форум Қостанайдағы өнер ұжымын, ондағы талантты музыканттар үшін де пайдалы, оларды ізденістерге итермелейді, – деді белгілі дирижер, Қазақстанның еңбек сіңірген қайраткері Абзал Мұхитдинов.
Көрермендер қашанда өнерге сусап отырады. Камералық, орыс ұлт аспаптары, қазақ ұлт аспаптары оркестрлерінің орындауында классикалық және орыс, қазақ композиторларының және халық шығармалары орындалды. Ең бастысы, дирижерлер форумы облыстық филармониядағы таланттарды қанаттандырғаны анық.
– Дирижерлер форумының жақсы әсері мол. Біздің музыканттар бір серпіліп қалды, өнер шеберлерінен олардың үйренері көп. Сонымен қатар біздің филармония оркестрлерінің репертуары жаңарып, қызықты шығармалармен толыға түсті. Өнердің өрінде жүрген дирижерлердің келуі біздің ұжым үшін шеберлік мектебінен бір де кем емес. Ал қостанайлық өнер- сүйер қауымның қуанышы бір бөлек, – дейді облыстық филармонияның директоры Назымбек Молдахметов.
Дирижерлердің былтыр өткен алғашқы форумында қостанайлықтар Өзбекстанның халық әртісі Фарух Садықовтың, Қазақстанның еңбек сіңірген қайраткері Арман Жүдебаевтың, Қазақ ұлттық өнер университетінің профессоры Әнуар Нүсіпбаевтың, ресейлік атақты дирижерлер Сергей Безбородов пен Владимир Лавришиннің өнерін тамашалаған еді. Олармен филармония ұжымында кеңесті әңгімелер өткізілген болатын. Мұндай пікір алмасулар биыл да өтті.
Форумның қорытынды концертінде облыстық мәдениет басқармасының басшысы Ерлан Қалмақов форумға қатысқан, қонақ болған өнер шеберлеріне облыс әкімі атынан алғысын жеткізді.
Нәзира ЖӘРІМБЕТ,
«Egemen Qazaqstan»
ҚОСТАНАЙ
