21 ақпан FIFA күнтізбесіне сай, кездесулерге арнайы бөлінген күн болмағандықтан, бұл кездесу ресми жолдастық кездесу ретінде тіркелген жоқ. Сондықтан бұл ойынға Ресейдің «Уфа» және «Ростов» клубтарында доп тебетін Еркебұлан Сейдахмет пен Бахтиер Зайнутдинов қатыса алмады. Сонымен қатар «Қайрат» пен «Астана» секілді ұлттық құраманың негізін қалайтын ойыншылары бар командалар да футболшыларының жарақат алып қалуынан қауіптеніп, құрамаға негізгі ойыншыларын жібермеді. Әйтсе де, Михал Билек Молдоваға қарсы өткен ойынға қосалқы құрамдағы футболшылар мен ұлттық құрамаға енбей жүрген бірнеше жас футболшыны шақырды. Молдова құрамасы да жасыл алаңға екінші құраммен шықты.
«Титаник» стадионында өткен кездесуде Қазақстан құрамасы 1:0 есебімен жеңіске жетті. Ойындағы жалғыз голды екінші таймда алаңға шыққан жас шабуылшы Оралхан Өміртаев соқты. Бұл Оралханның ұлттық құрамадағы екінші ойыны және екінші голы. Бұған дейін ол былтыр Ұлттар лигасы аясында Грузияға қарсы өткен ойында гол салған болатын. Қазақстан құрамасының қатарына алына салып, ә дегеннен гол соққан футболшылар саусақпен санарлық. Олар Бақтияр Байсейітов, Нүркен Мәзбаев, Владимир Нидергаус, Виктор Зубарев секілді санаулылар ғана. Енді олардың қатарына Оралхан Өміртаев та қосылып отыр. «Оралхан – Қазақстан футболындағы талантты футболшылардың бірі. Жас әрі жылдамдығы жоғары.
Бұл қасиеттер футболда жақсы бағаланады. Алайда, ол шеберлігін арттыру үшін көп еңбек етуі тиіс», дейді Михал Билек.
Жалпы Молдова құрамасына қарсы ойында ұлттық құраманың бірқатар жетекші футболшылары матчқа қатыспағанымен, бас бапкер Михал Билектің пікірінше құрамаға шақырылған жас футболшылар жақсы ойын өрнегін көрсеткен. «Кейбір футболшылар Молдовамен өтетін ойынға санаулы күндер қалғанда келді. Ұлттық құраманың оқу-жаттығу жиынында жүріп, өз клубтарының ойындарына қатысқандар болды. Мұндай жағдайда толық дайындық жүргізу мүмкін емес. Әр футболшыға талпынысы үшін алғыс айтамын. Матч алдында жігіттердің жеңіске жеткісі келетінін байқадым. Үзілістен соң да ұмтылысын бәсеңдетпеді. Кейбір футболшылар ұлттық құраманың қатарында алғаш рет ойнады. Осындай қиындықтарға қарамастан, оң нәтижеге қол жеткіздік», дейді бас бапкер футбол федерациясының баспасөз қызметіне берген сұхбатында.
Тағы бір айта кетерлігі, Молдоваға қарсы өткен ойында тоғыз футболшы ұлттық құрамадағы алғашқы ойындарын өткізді. Олар: Сағадат Тұрсынбай, Темірлан Ерланов, Марат Быстров (үшеуі де – «Ордабасы»), Бекзат Шадманов («Тараз»), Еркін Тапалов, Рауан Орынбасар (екеуі де – «Жетісу»), Рафкат Аслан, («Ертіс») және Игорь Шацкий, Геворг Наджарян (екеуі де – «Шахтер»).
Қазақстан құрамасы бұған дейін Молдова футболшыларымен төрт рет жолдастық кездесу өткізіп, бір ойында жеңіске жетіп, екі ойында жеңіліп қалған. Ал бір кездесу тең есеппен аяқталған. Енді кешегі ойыннан кейін екі құрама арасындағы жеке кездесу бойынша есеп теңесті. Әр құраманың еншісінде екі жеңіс, екі жеңіліс және бір тең ойын бар.
Ұлттық құрама футболшылары келесі кездесуін 2020 жылғы Еуропа чемпионатының іріктеу кезеңі аясында елордадағы «Астана Арена» стадионында Шотландия құрамасына қарсы өткізеді.
Әли БИТӨРЕ,
«Egemen Qazaqstan»
