2016 жылы Ресейдің Санкт-Петербург қаласында өткен бокстан жастар арасындағы әлем чемпионатының жеңімпазы, ел біріншілігінің бірнеше дүркін чемпионы, 2017 жылғы Қазақстан Президенті кубогының иегері және кәсіпқой бокстағы WBC Youth World Super Welterweight (Жастар арасындағы әлем чемпионы) Жастар жылы аясында отандық туризмді ел ішінде және шетелде насихаттайтын болады.
Қазақстандық бокстың жаңа жұлдызына аталмыш сертификат Астана қаласында орналасқан «BEIBARYS» демалыс базасында табысталды. Бұл жерде жас спортшы атпен, қарда жүргіш көлікпен, ит жегілген арбамен серуендеу, сондай-ақ аса танымал Counter Strike компьютерлік ойынындағы дәл «de dust 2» картасының көшірмесі болатын полигонда пейнтбол ойнау және басқа белсенді демалыс мүмкіндіктерімен танысты.
«Былтыр біз танымал отандастарымыз арқылы еліміздің туристік әлеуетін насихаттау мақсатында Қазақстан туризмі елшілері бағдарламасын іске қосқан болатынбыз. Ондағы мақсат – елімізге және шетелге танымал тұлғалар арқылы отандық туризмді насихаттау мен оның дамуына үлес қосу. Биыл Жастар жылының ашылу салтанаты кезінде Елбасы жастар туристік клубтарын жаңғырту қажеттілігін ерекше атап өтті. Сондықтан жас боксшы, еліміздің көк туын дүние жүзіне абыроймен көтеріп жүрген Садриддин Ахмедовпен толықтыруды жөн көрдік. Сертификат табыстау орны ретінде демалыс базасын таңдау кездейсоқ емес, себебі Садриддин елші ретінде белсенді туризм түрлерін жастар арасында насихаттайтын болады», деді «Kazakh Tourism» ҰК» АҚ басшысы Рашид Күзембаев.
Ал Садриддин Ахмедов туризм елшісі атану өзі үшін күтпеген жаңалық және үлкен жауапкершілік екенін айтады. Сондай-ақ ол ендігі уақытта спортпен қатар еліміздің туризм саласының одан әрі дамып, жақсаруына жауаптымын дейді. «Боксшы ретіндегі басты мақсатым – Көк туымызды биік ұстап жүру болса, елші ретіндегі мақсатым – Қазақстан туризмін дамытуға сәл де болса өз үлесімді қосу», деді Садриддин Ахмедов. Сонымен қатар кәсіпқой боксшы өзінің демалысын қайда өткізетіні туралы да айтып берді. «Жекпе-жек өткізер кезде және оған дайындық барысында көбінесе шетелде боламын. Сондықтан елге жеткенше асығамын, яғни өз елімде демалғанды жөн санаймын. Жуырда ғана достарыммен Бурабайда демалып қайттым», деді ол.
Еске сала кетейік, бұған дейін танымал қазақстандық әнші Димаш Құдайберген алғашқы болып туризм елшісі атанған еді. Осыған орай былтыр Қытай, Оңтүстік-Шығыс Азия және кейбір Еуропа елдеріндегі жанкүйерлер мен музыка сүйер қауым арасында оның ерекше танымалдығын ескере отырып, жанкүйерлер қозғалысының 10 елден келген жетекшілерінің қатысуымен «Димаш Отаны» атты алғашқы промо-тур ұйымдастырылды. Бұл турдың бағдарына үш қала: Астана – Алматы – Ақтөбе кірген болатын.
«Kazakh Tourism» ұлттық компаниясының туризм елшілері қатарында Садриддин Ахмедов пен Димаш Құдайбергеннен бөлек, танымал ұшқыштар Талғат Мұсабаев, Юрий Батурин және тағы басқа бірнеше елші бар.
Ұлттық компания басшысының айтуынша, биыл туризм елшілері институты белсенді түрде кеңейтіледі деп жоспарлануда. Сонымен қатар елшілердің қатысуымен Қазақстан туризмін ел ішінде және шетелде насихаттау бойынша бірқатар жобаны іске асыру жоспарда бар.
Әли БИТӨРЕ,
«Egemen Qazaqstan»
