Бүгін зауыт «Қазақстан темір жолы» ҰК» АҚ-ға және басқа да кәсіпорындарға темір жол дөңгелектерін жасайды. Жалпы, Екібастұзда темір жолға қажетті құрал-жабдықтардың бәрі жасалады. Жүк вагондарын да жасайтын кәсіпорын бар. Дені 2010 жылы ашылған компаниялар содан бері біраз қиындықтан өтіп келеді.
Енді міне, «Проммашкомплект» ЖШС-на инновациялық өзгеріс енгізілді. Металды балқытып, одан дөңгелектер құйып шығару ісі бірнеше сатыдан тұрады. Жұмысы автоматтандырылған роботтарды операторлар компьютер арқылы басқарады.
Серіктестіктің басшысы Дәулет Сыздықов мәлім еткеніндей, бұл жобаның жалпы құны 54 млрд теңгені құрайды. Оның 36 млрд теңгесі Қазақстанның даму банкі арқылы қаржыландырылған.
«Қазақстанның даму банкі» АҚ ел экономикасының шикізаттық емес және инфрақұрылымдық секторларын жаңғырту және дамыту жөніндегі ұлттық даму институты саналады. Яғни, өндірістік инфрақұрылымды және өңдеу өнеркәсібін дамытуға, сыртқы және ішкі инвестициялар тартуға ықпал етеді. Ол индустриялық-инновациялық даму мемлекеттік бағдарламаларының аса ірі инвестициялық операторы саналады.
Аталған банктің басқарушы директоры Әділ Исмағамбетовтің айтуынша, жобаның жүзеге асырылуы еліміздің шикізаттық емес секторын дамыту үшін өте маңызды. Импортты алмастыру, экспорттық әлеует және ЕАЭО елдеріндегі ұқсас өндірістермен салыстырғанда жоғары өнімділік сияқты үш құрамдасы бар. Темір жол желісі дамыған елдердің Қазақстанға географиялық жағынан жақын орналасқаны да назарға алынған. Бұл да темір жол дөңгелектерінің сұранысын арттырады. Болашақта өнімді шетелдік нарыққа шығару да жоспарлануда.
Негізі кәсіпорыннан жылына 200 мың дөңгелек шығару жоспарланып отыр.
– Мұндай өндіріс орны бұрын Қазақстанда болмаған. Бұған дейін темір жолға қажетті дөңгелектерді импорттап келген едік. Осы тектес өндірістердің іске қосылуын көп күттік. Бұл – еліміздегі индустрияландыру бағытындағы маңызды қадам, – деген болатын Елбасы телекөпір барысында.
Бірер жыл бұрын Екібастұздағы темір жол кластерін жолға қою үшін көлемді электр энергиясы қажет болды. Энергия беретін станса жобасын «Siemens» компаниясы жасап шықты. Мемлекеттік-жекешелік әріптестік аясында былтыр жазда жаңа электр стансасы іске қосылды.
Сол станса қазір «Проммашкомплект» ЖШС-дан бастап, темір жолға қажетті заттар жасап шығаратын «R.W.S. Wheelset», «R.W.S. Concrete», «R.W.S. BINDING» сияқты кәсіпорындарды да электр энергиясымен қамтамасыз етеді.
Фарида БЫҚАЙ,
«Egemen Qazaqstan»
ЕКІБАСТҰЗ
