А.Мамин мәслихат депутаттарына Мемлекет басшысының О.Оразалиннің кандидатурасын Ақтөбе облысының әкімі лауазымына ұсыну туралы хатын оқып берді. Депутаттар ел Президенті ұсынған кандидатураны бірауыздан қолдады.
Оңдасын Сейілұлы Оразалин 1963 жылы дүниеге келген. Ақтөбе педагогикалық институтын, С. М. Киров атындағы Қазақ мемлекеттік университетін тәмамдаған. Мемлекеттік қызметте әртүрлі лауазымдарды атқарған, коммерциялық секторда жұмыс істеген. Атап айтсақ, Ақтөбе облысының Мұғалжар ауданының әкімі, Ақтөбе облысы әкімінің орынбасары. 2017 жылғы наурыздан бастап Президент Әкімшілігі Басшысының орынбасары болып еңбек еткен.
А. Мамин кезектен тыс сессия қорытындысы бойынша Ақтөбе облысының активімен кездесу өткізді. Премьер-Министр Б.Сапарбаевқа өңірдің дамуына қосқан үлесі үшін алғыс білдірді. Жұмыстың 4 жылында облыстың әлеуметтік-экономикалық дамуында елеулі нәтижелерге қол жеткізілді, жаңа индустриялық жобалар іске асырылды, әлеуметтік салаға үлкен серпін берілді. А.Мамин Б.Сапарбаевқа жаңа қызметінде табыс тілеп, Елбасының көрсеткен жоғары сенімін абыроймен ақтайтынына сенім білдірді. Еске сала кетейік, Президент Н.Назарбаевтың Жарлығымен Б.Сапарбаев Ақтөбе облысының әкімі қызметінен босатылып, Еңбек және халықты әлеуметтік қорғау министрі болып тағайындалды.
Премьер-Министр жаңа әкімді таныстыру барысында О.Оразалиннің түрлі жауапты басшылық лауазымдарда, соның ішінде Ақтөбе облысы әкімінің орынбасары қызметінде үлкен жұмыс тәжірибесі бар екенін атап өтті. Соңғы жылдары Президент Әкімшілігі Басшысының орынбасары болып қызмет еткен. Ол өңірлік жұмыстың, сондай-ақ әлеуметтік жаңғыру саласының қыр-сырын меңгерген. А.Мамин жаңа әкімге сәттілік тілеп, облыс активімен бірлесіп, Елбасы алға қойған міндеттердің сапалы орындалуын қамтамасыз ететініне сенім білдірді.
Сондай-ақ Президент тапсырмасымен Премьер-Министр А.Мамин Түркістан облысына барып, облыстық мәслихаттың кезектен тыс сессиясына қатысты.
А.Мамин сессия барысында мәслихат депутаттарына Мемлекет басшысының Ө.Шөкеевті Түркістан облысының әкімі лауазымына тағайындау ұсынысы туралы хатын оқып берді. Дауыс беру қорытындысы бойынша депутаттар Президент ұсынған кандидатураны бірауыздан қолдады.
Өмірзақ Естайұлы Шөкеев 1964 жылы Түркістанда дүниеге келген. Мәскеу экономикалық-статистикалық институтын тәмамдаған. Жоғары жауапты лауазымдарда жұмыс істеген. Атап айтсақ, Оңтүстік Қазақстан және Қостанай облыстарының әкімі, Экономика және сауда министрі, Президент Әкімшілігі Басшысының орынбасары, Астана қаласының әкімі, Премьер-Министрдің бірінші орынбасары, «Самұрық-Қазына» ҰӘҚ» АҚ басқарма төрағасы. 2017 жылғы желтоқсаннан бастап Премьер-Министрдің орынбасары – Ауыл шаруашылығы министрі қызметін атқарған.
Премьер-Министр Түркістан облысының активімен өткен кездесуде Ж.Түймебаевқа атқарған жұмысы үшін алғыс білдірді. Түркістан қаласының алғашқы әкімі ретінде ол облыс орталығын Түркістан қаласына көшіру, жаңа облыстың әкімшілік-аумақтық құрылымын ұйымдастыру, көші-қон мәселелерін, жаңа қаланың ауқымды құрылыс жұмыстарын ұйымдастыру бойынша бірқатар жұмыс атқарды.
А.Мамин облыстың жаңа әкімін таныстыра отырып, Ө.Шөкеевтің Қостанай, Оңтүстік Қазақстан облыстарының және Астана қаласының әкімі ретінде аталған өңірлердің әлеуметтік-экономикалық дамуына үлкен үлес қосқанын атап өтті. Бұдан өзге Премьер-Министрдің орынбасары – Ауыл шаруашылығы министрі ретінде өзін іскер, тәжірибелі басшы және жоғары деңгейдегі ұйымдастырушы ретінде көрсетті. Кәсіби біліктілігі мен жауапкершілігі әлеуметтік маңызды міндеттерді сапалы орындап, Мемлекет басшысының сенімін ақтауға мүмкіндік береді.
«Түркістан облысының дамуы Елбасының ерекше назарында. Мемлекет басшысының бастамасымен қасиетті Түркістан қаласында жаңа үлкен құрылыс басталды», деген А.Мамин, жергілікті атқарушы органдар алдында жаңа қаланың жаңғыруын уақтылы қамтамасыз етіп, бүкіл түркі әлемінің мәдени-рухани астанасы ретінде өркендету және оны қарқынды дамыту, жаңа жұмыс орындарын ашу, азаматтардың әлеуметтік жағдайын жақсарту бойынша зор жауапкершілікті жүктейтін міндеттер қойылғанын атап өтті.
Темір ҚҰСАЙЫН,
Ғалымжан ЕЛШІБАЙ,
«Egemen Qazaqstan»
