Қар суы мен тасқын суларды жинау үшін су қоймаларын салу және реконструкциялау бойынша 26 шағын су қоймасының құрылысын жүргізу арқылы ауыл шаруашылығы айналымына жаңа 25,5 мың гектар жер енгізу көзделіп отыр. Оның ішінде, Кентау қаласындағы Шошқакөл тоғанын, Сарыағаш ауданындағы Дарбазасай су қоймасын салуға Ауыл шаруашылығы министрлігі Су ресурстары комитетіне инвестициялық ұсыныс берілген. Ал Шошқакөл тоғаны бойынша Ұлттық экономика министрлігінің оң шешімі алынды. Су қоймаларына қатысты комиссия отырысында облыс әкімі тиісті мекемелерге өңірдегі барлық су тоғандарына бақылауды күшейтуді тапсырды. «Суармалы жерлерді қалпына келтіру бағытындағы каналдардың республикалық меншікке өткізілуі қажет. Облыстағы барлық су қоймалары мен тоғандардың жағдайына талдау жүргізілсін. Қатаң тексеріледі. Қар суы мен тасқын суларды жинау үшін жоспарланған 26 шағын су қоймасының жобалық-сметалық құжаттарын мерзімінде әзірлеп, құрылыс жұмыстары басталуы тиіс», деді облыс әкімі Ж.Түймебаев. Сондай-ақ экс-облыс әкімі жаз мезгілінде егін алқаптарында су тапшылығын жою мақсатында арнайы іс-шара қабылдап, облыстың суармалы егістік алқаптарының ұлғаюын қамтамасыз етуді тапсырды.
Бұл ретте су қоймалары облыстық төтенше жағдайлар департаменті тарапынан бақылауға алынған. «Өңірдегі ең үлкен Шардара су қоймасының толу деңгейі 85 пайыз болса, Көксарай су реттегішінде – 50 пайыз. Барлық су қоймалары бойынша күнделікті ақпарат алынып, мониторинг жүргізілуде. Яғни су қоймаларында бос су қоры жеткілікті. Өзендердегі су деңгейі де қалыпты жағдайда. Биылғы жауын-шашын мөлшері нормадан аз. Жалпы су тасқыны қаупі жоқ. Дегенмен, барлық су көздері қатаң бақылауда», дейді Түркістан облысы төтенше жағдайлар департаменті төтенше жағдайлардың алдын алу бөлімінің бас маманы Иса Елеусізов.
Ғалымжан ЕЛШІБАЙ,
«Egemen Qazaqstan»
Түркістан облысы