Ол негізін салған әншілік мектеп ерекше орындаушылық шеберлікті қажет етеді. «Көкірегінен әсем әннің көк мұхитын шайқаған, ей, Ғареке! Қасиетті қазына жыр, байтақ ән», деп Төлеген Айбергенов жырға қосқан қазақ музыка мәдениетінің құбылысы Ғарифолла Құрманғалиевтің туғанына биыл 110 жыл. Мұхит мұрасын насихаттаушы, ғажайып әнші-композитордың құрметіне арналып Атырауда республикалық байқау өтті.
«Ақжайықтан ән оздырған» деп аталған әншілер байқауына еліміздің түкпір-түкпірінен дәстүрлі өнерді дәріптеушілер қатысты. Атырау облыстық әкімдігінің қолдауымен облыстық мәдениет, архивтер және құжаттама басқармасы, Дина Нұрпейісова атындағы академиялық қазақ халық аспаптар оркестрі ұйымдастырған шара екі күнге созылды.
– Елбасы «Ұлы даланың жеті қыры» атты мақаласында «Ұлы даланың ұлы есімдері», «Дала фольклоры мен музыкасының мың жылы» жобаларын айрықша атап өтті. «Болашаққа бағдар: рухани жаңғыру» бағдарламасы да ұлттық өнерді ұлықтау бағытындағы игі істерге арқау болып отыр. Бұл шара Мемлекет басшысының осы бағдарламаларын жүзеге асыруды мақсат етеді, – деді байқаудың ашылу салтанатында облыстық мәдениет, архивтер және құжаттама басқармасының басшысы Саламат Сабыр.
Қазақстанның еңбек сіңірген қайраткері, Батыс Қазақстан облыстық Ғ.Құрманғалиев атындағы филармонияның әншісі Қатимолла Бердіғалиев бастаған қазылар алқасы дүбірлі өнер додасына қатысушыларға баға берді. Байқау нәтижесінде жүлделі бірінші орынды маңғыстаулық Нұрым Асқаров пен батысқазақстандық Данияр Елеусінов жеңіп алды.
Бақытгүл БАБАШ,
«Egemen Qazaqstan»
АТЫРАУ
