Баланың да, араның да бабын тапқан ана

Қазақстан • 08 Наурыз, 2019

Баланың да, араның да бабын тапқан ана

1127 рет көрсетілді

Жалқауларды жақтырмайтын бал арасы адамды еңбекқорлыққа үндейді, тазалықты талап етеді. Омарташыдан жағымсыз иістер шығып тұрса, аралар оны шағады екен. Жалпы бал арасының адам баласына үлгі етерліктей қасиеті көп, соның кейбірін көп балалы Гүлшад ананың бойынан да тапқандай болдық. Еңбекқор ана ұл-қыздарының да жалқау болғанын қаламайды, қиындыққа мойымай алға ұмтылады, табандылық пен адалдық, жүктелген жұмыс қалтқысыз, уақытында орындалады...

Сегіз ұл-қызы бар Гүлшад ана отағасы Талғат екеуі бал арасын өсірумен айналысып келеді. Балалардың алтауы мектепте, екеуі балабақшада. Ананың айтуынша, балаларға тәулік бойы көңіл бөлу керек, қамқорлыққа алу, заман талабына сай тәрбиелеу сынды ата-аналық міндет те үзіліссіз жүргізілуі тиіс. «Ал енді бал арасы да балаға қарағандай ғой, тазалығы, дәріленуі, қоректендіру, дер мезгілінде жасалуы тиіс күтімі бар. Үлгеріп жатырмыз. Әрине сегіз ұл-қыздың тәрбиесі бірінші кезекте, олар мектепте, балабақшада болған уақытты бал арасына арнаймыз. Балалар оқудан тыс уақытында көмектесіп, еңбек әліппесін үйренуде. Көп балалы анамын деп, тек мемлекеттің көмегіне сеніп, бос отырғым жоқ. Балаларға беріліп жатқан жәрдемақылардың көмегі бар, әрине. Бірақ ұл-қыздарымның ертеңіне сенімді болуы, қатарынан қалмауы үшін қарап отырмай бар мүмкіндікті пайдалануымыз қажет», деді Гүлшад ана бізбен әңгімесінде.

Көп балалы ананың көпшілікке айта бермейтін, жария еткенді қаламайтын бір құпиясы бар. Ілгеріде жасалған операциядан кейін жүре алмай, мүгедек болып қалған. Дегенмен балаларының болашағына алаңдаған ана тағдырдың бұл сынына сынбаған, төзімділік пен өмірге құштарлық демеу болып алға жетелеген. Отағасы Талғат та үй шаруасына көмектесіп, ананың аяққа тұруы үшін барлық жағдайды жасап бақты. Бүгінде Гүлшад ана балдаққа сүйеніп, бар күш-жігерін балаларының да, бал арасының да күтіміне арнап, жағдайларын жасап жүр.

Кейіпкеріміз өмір сүріп жатқан Қазығұрт ауданы Қақпақ ауылдық округіне қарасты Сырлысай ауылының табиғаты тамаша, адамдары еңбекқор. Ауылдың оң жақ тұсы бау-бақша, сол жақ бөлігін биік қыраттар қоршап тұр. Бүгінде ауыл тұрғындары бау-бақшамен қатар бал арасын өсірудің де қыр-сырын меңгере бастапты. Иә, Гүлшад ана да бұрын қазақтың ебі жоқ сияқты көрінетін кәдімгі омарташылықты қолға алған. Бұл орайда оған «Атамекен» кәсіпкерлік палатасының жергілікті өкілдері қолдау көрсетіпті. Несие алу, кәсіп ашу жолдары бойынша кеңес берген. Сөйтіп, Сырлысайдың тұрғыны Гүлшад Вафаева «Ауыл шаруашылығын қаржылай қолдау қоры» жеңілдікпен берген 3 млн теңге несиеге 100 ұялы бал арасын сатып алады. Оған екі отбасылық 50 омартаны (жәшік) тағы қосады. «Несиені былтыр тамыздың басында алдық. Аралар әлі бал бере қойған жоқ. Осы көктемде көкке, таудың гүл бөктеріне жайыла бастады. Биыл бұйырған несібемізді алғалы отырмыз», дейді Гүлшад Фархадқызы.

Гүлшад пен жұбайы Талғат Расулов Сырлысайға Өзбекстаннан 2008 жылы көшіп келген екен. Бал арасын өсірудің қыр-сырын көрші елде меңгерген. Алдымен бірнеше ұялы омарта алған отбасы біртіндеп оның санын 10, 20-ға дейін көбейткен. Ал атажұртқа қоныс аударғанда бал арасын екі ел арасындағы кеденнен алып өтуде көптеген кедергілерге тап болған Гүлшад пен Талғат отбасылық бизнесті біраз уақытқа тоқтатты. «Өзбекстанмен шекарада орналасқан Сырлысай ауылы – жаңадан құрылған елді мекен. Мұнда көшіп келген соң үй салып, балаларды аяқтан тұрғызып алу керек болды. Біраз уақытты осындай тұрмыстық мәселелерді шешуге жұмсадық. Енді міне, қайтадан өзімізге ыңғайлы кәсіпті қолға алып жатырмыз.

Бал арасын өсіру оңай емес. Негізінен өзім айналысамын, сондай-ақ үлкен ұлым Асылбек көмектеседі. Ұлдан кейінгі төрт қызым үй шаруасына қолғабыс жасайды. Қыздардан кейінгі үш ұл әлі кішкентай. Барлығы үй шаруасына араласып, қолдарынан келгенінше көмектеседі», дейді көп балалы ана.

Емдік қасиеті мол балға, әсіресе оның таза табиғи түріне сұраныстың артып отырғанын ескерген Гүлшад ананың ертеңгі күннен күтері көп, жоспар-жобалары да жетерлік. Сапалы бал іздеп, Сырлысайға арнайы атбасын бұратындардың көбейе түсетінінен де үмітті.

Ғалымжан ЕЛШІБАЙ,

«Egemen Qazaqstan»

Түркістан облысы

Күннің маңызды және өзекті жаңалықтарын «Егемен Қазақстан» телеграм каналынан оқыңыз