Таразда бірқатар мектеп басшылары кең кабинеттерін босатуда

Аймақтар • 12 Наурыз, 2019

Таразда бірқатар мектеп басшылары кең кабинеттерін босатуда

Бүгінде Мемлекет басшысының шығындарды оңтайландыру жөніндегі тапсырмасы Жамбыл өңірінде жүйелі жүзеге асуда.

Қазіргі кезде республикадан бастау алған жобаға өңірдегі мектеп директорлары да қолдау көрсетіп келеді. Олар көлемі үлкен кабинеттерін оқушыларға оңтайландырып, босатып беруді бастады. Мәселен, кең кабинеттерін шағын бөлмеге ауыстырған өңірдегі 11 мектеп директорының әрқайсысының жұмыс кабинеттері 40 және 50 шаршы метр аумақты құрайтыны анықталған. Нәтижесінде бірқатар білім ошағының басшылары шағын кабинеттерге көшті.

Мәселен, Тараз қаласындағы Төле би атындағы №8 мектеп-гимназия директорының аумағы 40 шаршы метр болатын кең кабинеті қазір ағылшын тілі және орыс тілі кабинетіне айналған. Бүгінде 2079 оқушы оқитын бұл білім ошағында сынып тапшылығы көптен бері өзекті мәселе болғандықтан, білім ошағының басшылығы осындай оң қадамға барып отыр.

«Қазіргі кезде қаламызда алпыстан астам мектеп бар. Елбасының шығындарды оңтайландыру туралы тапсырмасына орай атқарылып отырған бұл шаруалар әлі де жалғасын табады. Тек жаңадан салынған мектептердегі директорлардың кабинеттері басында жоспарда солай бекітілгендіктен өзгеріссіз қалады» дейді Тараз қалалық Білім бөлімінің басшысы Мүбәрак Жинақбаева.

Мемлекеттік қызмет істері және сыбайлас жемқорлыққа қарсы іс-қимыл агенттігінің Жамбыл облыстық департаменті өңірдегі бірқатар мекемеге мониторинг жүргізген.

«Өңірде барлығы 446 мектеп бар болса, бүгінге дейін департамент 61 білім мекемесіне мониторинг жүргізді. Қазіргі таңда облыс аумағындағы аудандарда жалғасып жатыр. Алдағы уақытта барлық мектепті қамтитын боламыз» деді департаменттің Сыбайлас жемқорлық профилактикасы басқармасының басшысы Дәурен Омаров.

Хамит ЕСАМАН,

«Egemen Qazagstan»

Жамбыл облысы