Теледидардан Президент өкілеттілігін тоқтататыны туралы шешім қабылдағанын айтқанда, күтпеген жағдай болғандықтан, тосырқап қалдым. Мыңжылдықтардан құралған тарихы бар жас мемлекетіміздің іргесін қалап, тәуелсіздігін тұғырына қондырып, өркендеп дамуы үшін аянбай тер төккен әр күні көз алдымда өткендіктен қимастық сезімім алдымен оянды. Нұрекеңді үлкен саясатқа енді ғана араласа бастаған жас күнінен жете танығанымды, әзіліміз жарасып, бірге жүргенімді, сыйласып досым болғанын мақтаныш етемін. Президенттің зиялы қауымнан қашық болған кезі жоқ, қашанда ел қадірлеген азаматтармен ақылдасып, кеңесіп-келісіп отырды. Қазақстан халқының қолдауын сезіне отырып, елді сенімді түрде алға жетеледі. Оның тәуелсіздікке дейін де және одан кейін де көшбасшы ретіндегі қасиеті, даналығы, жеті рет ойлап, бір рет кесетін сарабдал саясаты елімізді көп қиындықтардан алып шықты. Үлкен батылдықты қажет ететін жерлерде іркілмей, ірілік танытты. Еліміз үшін өте маңызды шешімдер қабылданды. Елін сүйген Елбасыны елі де құрмет тұтты, сенім артты, сүйеніші болуға жарады. Соның арқасында посткеңестік елдердің арасында Қазақстанның абыройы мен беделі жоғары болмаса, шүкір, ешбір елден кем қалған жері жоқ.
Басқа салаларды айтпағанда, өнерді жанымен сүйетін Н.Назарбаев руханиятқа келгенде тартынып, қаржы үнемдеп қалды деп ешкім де аузы барып айта алмас еді. Елімізде қаншама халықаралық деңгейдегі шоқтығы биік өнер бәйгелері, театр фестивальдері, классикалық өнер додалары алма-кезек өткізіліп, халқымыздың мәдениетінің өсіп-өркендеуі, әлемдік дамудан кенже қалмай, терезесі тең болып, көшке ілесуі үшін қолынан келген бар жағдайды жасады. Осының арқасында өнер мен мәдениеттегі таланттарымыз танылып, олар дүние жүзінің ең атақты сахналарын бірінен соң бірін бағындырып жатыр. Мұны тек соқыр адам немесе ниеті бұзық адам ғана көрмейді.
Көп этносты Қазақстанның ерекшелігін ескере отырып, дұрыс жүргізген саясатының негізінде елімізде тұрақтылық пен ұлтаралық, дінаралық татулық салтанат құрды. Ендігі тілек талай тар жол, тайғақ кешулерден, от пен судан халқымызды аман-есен алып келе жатқан Алла тағалам Нұрекең мемлекеттің негізгі саясатына айналдырған осы бірлік пен берекеден ажыратпаса екен деп тілеймін. Тыныштық пен татулық – біздің зор байлығымыз. Әлемнің әр бұрышында жаңа жанжал оты тұтанып, бүлікке батып, мазасыз күй кешіп жатқанда, мемлекет үшін тыныштықтың басты құндылық екеніне біздің көзіміз бүгін анық жетіп отыр. Тереңнен ойлайтын Президент ұзақ толғанысынан соң осындай шешім қабылдаған болар деп ойлаймын. Нұрекеңнің еңбегіне алғыс қана айтамыз. Ел орнында, халық өз өмірін сүріп жатыр, ендеше алаңдайтын ешнәрсе жоқ. Тек алға басып, қалыптасқан өз жолымызбен жүре бергеніміз абзал болар.
Сәбит ОРАЗБАЕВ,
Қазақстанның халық әртісі, Мемлекеттік сыйлықтың лауреаты
