Кешегі күн мәңгілік ел тарихындағы айрықша мәні бар күн болады. Тарихи оқиғаның таңдандырғаны да, таңырқатқаны да рас. Естіген сәтте есімізді жинай алмай қалдық. Сол бір сәтте тәуелсіз елдің алғашқы кезеңінен бастап күні бүгінгі кемеліне келіп, шаршысына толып, әлемнің дамыған елдерімен иық тірестірген тұсына дейінгі тарихи жолға ой жүгіртіп, санамен салмақтағанымызды несіне жасырайық.
Тоқсаныншы жылдардың басында Кеңес өкіметі келмеске кеткеннен кейін бұрыннан бір-бірімен тығыз байланыстағы экономикалық жүйе ыдырап, қиын күндерді басымыздан кештік. Әсіресе ауыл шаруашылығы мүлде тұралап қалды. Қора толған төрт түлік малды бартер деген пәле жұтты. Жанар-жағармайдың бір тоннасын 4-5 тонна алтын астыққа айырбастап жүрдік. Жалғыз біз ғана емес, ұзақ жыл кеңшарларды басқарған ауыл шаруашылығының мүйізі қарағайдай мамандары тығырықтан шығар жол таппай, теңселіп кетті. Міне, осы сәтте ел экономикасының күре тамыры – ауыл шаруашылығына Елбасы Нұрсұлтан Назарбаев жіті назар аударып, Үкімет тарапынан қыруар көмек көрсетілді. Сол көмектің арқасында тұралап қалған ауыл шаруашылығы қайтадан ұжымдаса ұйысып, жоқтан бар құрап, еңсесін көтере бастады. Енді қараңыз, соңғы жылдары Ақмола облысы республика астығының үштен бірін беретін жағдайға жетті. Облыстың қара малының қақ жартысы өнімділігі жоғары асыл тұқымды малға айналды. Құс фабрикасы дейсіз бе, тауарлы сүт фермалары дейсіз бе, бірінен соң бірі бой көтеріп, Елорданы азық-түлікпен қапысыз қамтамасыз етіп қана қоймай, астығымызды, етімізді шетелге шығаратын мүмкіндікке қол жеткіздік. Осының барлығы жасыратыны жоқ, халқын жұмылған жұдырықтай соңынан ертіп, армандай алыс болашақтың берекелі биіктеріне бастай білген Елбасы Нұрсұлтан Назарбаевтың арқасы! Мұны ырысы мол болғанымен, әуресі белден келетін ауыл шаруашылығы саласының қажуды, арып-ашуды білмейтін еңбеккерлері жақсы біледі. Ақтылы мал өсіріп, ақық дән аялаған жұрт дастарқандарын тоқшылыққа айналдыра білген Елбасына айтар алғыстары шексіз. Осы жылдар ішінде келешегін болжай білген кенен ақылды, кемел парасатты Елбасымыз ауыл шаруашылығын әлемнің ең озық мемлекеттерінің табысымен тайталаса алатын тамаша биікке көтерді.
Молшылықтың бастауы Елбасының көреген саясатының нәтижесі. Тұңғыш Президентіміз біздің саланың бүге-шігесін өте жақсы білді. Сол білгенінің арқасында бүгінгі күннің талаптарын түйсініп, алдымыздан сара жол ашты. Қазіргі күні біздің шаруа қожалығымыз бір мың гектар жерге егін егеді. Өзіңіз ойлап қараңыз, бір ғана отбасының иелігіндегі қожалықта бір мың гектар жерге егін егуге қол жеткізу үшін қаншама мүмкіндік тудырылуы керек. Сол мүмкіндікті біздің мемлекетіміз тудырды, Елбасымыз тудырды. Мұны екпін түсіріп, астын сызып айтпай кетуге болмайды. Ауыл шаруашылығының алапат қуатқа ие болуы Елбасымыздың арқасы! Мәңгілік елдің мұратын зәулім көкке көтерген, көздегеніне жеткізген Нұрсұлтан Әбішұлы Назарбаевқа мың алғыс. Ол алғысты жалғыз мен ғана емес, өзі сүйетін елі, өзі сүйетін жері жан тебірентіп айтып жатыр.
Құлан БОЛАТОВ,
«Құлан» шаруа қожалығының жетекшісі
Зеренді ауданы, Ақмола облысы