Өңір активімен кездесуде Премьер-Министр М.Мырзалинге облыс әкімі қызметіндегі жұмысы және өңірдің әлеуметтік-экономикалық дамуына қосқан үлесі үшін алғыс білдірді. М.Мырзалиннің басшылығымен облыста жаңа әлеуметтік нысандар салынып, оның ішінде туризм саласында ірі инфрақұрылымдық жобалар іске асырылды.
«Мемлекет басшысы тағайындаған барлық қызметтерде Мәлік Кеңесбайұлы жоғары сенімді ақтай білді», деді А.Мамин және оған жаңа қызметінде табыс тіледі.
Өңірдің жаңа басшысын таныстырған А.Мамин осы күнге дейін Е.Маржықпаев Көкшетау қаласының әкімі болып жұмыс істеп келгенін айтты. Аршалы, Зеренді аудандарының әкімі, Ақмола облысы әкімінің орынбасары ретінде қызмет етіп, өңірдің дамуына зор үлесін қосқанын жеткізді.
«Қазір облыстың алдында Елбасының «Әлеуметтік қамқорлық» жаңа әлеуметтік шаралары аясында ауқымды міндеттер тұр. Азаматтардың әл-ауқатын арттыруға, халықтың әлеуметтік-экономикалық жағдайы мен тұрмыс сапасын жақсартуға бағытталған нақты шараларды жүзеге асыру қажет», деді А.Мамин.
Сонымен қатар агроөнеркәсіптік кешеннің одан әрі қарқынды дамуын жеделдетіп, туристік әлеуетін дамыту бойынша нақты жұмысты ұйымдастыру қажет.
«2020 жылы Көкшетау қаласында Қазақстан мен Ресей Өңіраралық ынтымақтастығы форумы өтеді. Облыс осы маңызды іс-шараның жоғары деңгейде өтуін қамтамасыз етуі керек», деп тапсырды Премьер-Министр.
Соңында А.Мамин облыс активімен бірлесіп әкім ретінде Е.Маржықпаевтың өңір алдына қойылып отырған барлық тапсырмалардың сапалы орындалуын қамтамасыз ететініне сенім білдірді.
