21 Наурыз, 2019

Мырзатай Жолдасбеков: Еңбегі өлшеусіз ерекше адам

681 реткөрсетілді

Біз тарихи оқиғаның куәсі болдық. Елбасы өзінің прези­дент­тік өкілеттігін тоқтат­ты. Сөй­тіп Конституцияға сәй­кес Қазақстан Республикасы Президентінің өкілеттігін атқару Сенат төраға­­­сына көшетіні туралы Жарлыққа қол қойды. Әри­не, бұл жұрт­тың көбіне кездей­соқ оқиға болды деп ойлаймын. Бірақ шынтуай­тында тарихи оқиға. Нұрсұл­тан Назарбаев Қазақ­станға көп еңбек сіңірді. Анығын айтқанда, Ұлы далада елді талай адам­дар басқарды. Олардың арасында ұлы хандар да, билер де, небір батырлар да болды. Солар Ұлы даланы қорғау үшін бастарын бәйгеге тікті. Бірақ амал нешік, олардың бірі де, тіпті Абылай хан да тәуелсіздікке қол жеткізе алмады. Мәселен, Мұх­­тар Әуезов секілді, Қаныш Сәт­­баев секілді біздің ұстаз­­дары­­­мыз, ағаларымыз тәуелсіздікті көре алған жоқ. Тәуелсіздікті біз көр­дік. Тәуелсіздікке біз жеттік. Нұр­сұл­­тан Назарбаев жетті. Ол өзінің хал­қы­мен бірге, елімен бірге жетті.

Әрине, бастапқыда Қазақстан аты бар да, заты жоқ, Кеңес Одағы тарқағаннан кейін қаңы­рап бос қалған, қираған мемлекет еді. Сол құландыдан, қиран­дыдан мықты тәуелсіз мемлекет орнату үшін жүрек керек еді. Нұрсұлтан Назарбаев­ тәуекелге барды. Сол кезде жұрт жалақы, зейнетақы ала алмай жүрген ызы-қиқы заман болатын. Зауыттардың бәрі тоқтаған еді. Сондай қиыншылықтар­ды еңсере отырып, Елбасы эко­номи­касы зор мемлекет тұрғыз­­ды. Оны одан әрі дамытты. Әлем­­ге таныт­ты. Қазақстан әлем­­дегі озық елу елдің қатарына қосыл­­ды. Бұл, әрине, айтуға ғана жеңіл. 
Мен тәуелсіздіктің алдында, елең-алаңда, сосын тәуелсіз­діктен кейінгі жылдарда, яғни ең ауыр жылдарда сол кісінің жа­нында болдым. Сол кездегі бар ауыртпалықтарды көзіммен көр­дім. Нұрекеннің ұйқы­сыз түндерінің, күлкісіз күн­дері­нің куәсі болдым. Төңірек­тің бәрі көз тігіп отырды. Бірақ сол қиыншылықтарға қай­мық­пады. Мемлекет ісін ойдағы­дай ұйым­дастыра білді. Дәлел­деді. Ұлы далада шын мәнін­де тәуел­сіз мем­лекет орнатты. Бүгінде Қазақстан әлем мойын­даған, есептесетін, санасатын мемлекетке айналды.

Алғашқы қолына билік тиген кезден бастап Нұрекең ядролық полигонды жапты. 1991 жылы жел­тоқсанда Президент сай­лауы бол­ды. Сайланғаннан кейін 16 жел­­тоқсанда тәуелсіздік алдық. Сол тәуел­сіздікті алғаннан кейін бір­ден, Нұрекең мені шақы­рып, қолы­мызға өз билігіміз тиді, ен­ді Дүние жүзі қазақтарының  құрыл­тайын өткізейік деді. Сон­да байқасаңыз, қазынаның түбі тесік еді. Алайда, біз сол кезде Қазақ­тың тұң­ғыш құрыл­тайын өткіздік. Со­дан бері талай құрылтай өтті ғой, бірақ алғашқы құрылтайға бірі жет­пейді. Ол құрылтай елдің аузын­да аңыз болып қалды. 

Біз қала салғанды көрген жоқпыз. Зауыт салғанды, үй сал­ғанды біле­міз. Ал енді үлкен қала сал­ған­ды да көрдік. Елбасы Астананы Ақмо­лаға көшір­ді. Жасырып, жабаты­ны жоқ, ол кезде мен де бұл ше­шім­ге қарсы болдым. Елдің жағ­дайы нашар, неге керек дедім. Сон­да бұл кісі болашақты нақты бол­жаған екен. Бәрін алдын ала біліп­ті. Тәу­бе. Астананы көшірді. Бұ­ған жүрек, үл­кен ақыл керек еді. Ал­да ұлы істер күтіп тұрды. Бәрін ең­­­сер­ді. Адам таңғалатын, істер­ді жү­­зеге асырды. Енді бұл қала Еу­ра­­зия­ның астанасына айналып барады.

Латын әліпбиіне көштік. Бүкіл түркі дүниесінің рухани аста­насы – Түркістанға Оңтүс­тік Қазақ­стан облысының орта­лы­ғын көшірді. Сөйтіп бәріміздің кө­кейі­­мізде жүрген арманымыз­ды жүзеге асырды. Соңғы кез­дері ру­ха­ният­қа ерекше мән бере бас­тады. Олар: «Рухани жаң­­ғыру», «Ұлы дала­ның жеті қыры» секілді мақа­лалар. Енді өзінің орнына таң­даған адамы әбден лайықты деп есептеймін. Қасым-Жомарт Тоқаев ақылды, білгір, тәжірибелі дип­ломат адам. Мұның бәрін мен өте дұ­рыс деп есептеймін.

Мырзатай ЖОЛДАСБЕКОВ

Баннер
Соңғы жаңалықтар

Ұқсас жаңалықтар