Нұрсұлтан Назарбаев саналы ғұмырын мемлекеттілікті қалыптастыруға арнап, халқын шуақты күндерге жеткізді. Елін шыңға шығарып, аймаққа һәм әлемге танытты. Ол 1990 жылдардан бастап әр қадамы арқылы түркі рухын асқақтатуға бағытталған жоспарлардың дәнін сеуіп, бүгінгі Түркі әлемінің ынтымағына қол жеткізген қайраткер. Тарихты да жазды, өзі де тарих жасады. Ешкімнің алдында елдің еңсесін түсірген жоқ. Ерлердің майданына ер сияқты шықты. Сөйтті де Қағанға лайық іс жасады. Ол – ұлы адам! Ол – дана! Ол – Білге! Кез келген сәтте дұрыс шешім қабылдайды. Сол себепті, бірнеше ай бұрын қазақстандықтар мен күллі Түркі әлеміне арнап «Ұлы даланың жеті қыры» атты бағдарламалық мақаласын жазып, түркі халықтарына насихат айтты.
Дана қағанымыз бұдан кейін де Түркі әлемінің бірлігі үшін еңбек етеді. Нұрсұлтан Назарбаев көк сұңқарларының байрақ ұстаушысы, Тәңірі сүйген, Тәңірін сүйген түркі әлемінің Көшбасшысы! Сізді бауырлас Әзербайжан елінің халқы да сүйеді!
Сөзімнің соңында мына бір жайды атап өткім келеді, менің тағдыр-талайыма Қазақстанда екі мәрте президент сайлауына бақылаушы болып қатысу жазылыпты. Сол кездерде халықтың шын ықыласпен дауыс беруге барғанын, сайлау учаскелерінде оған дауыс беруге асыққанын көргенмін. Халқының сүйіспеншілігіне бөлену кез келген билеушінің маңдайына жазылмайды. Нұрсұлтан Назарбаев өз есімін мыңжылдықтар тарихына алтын әріптермен жазған тұлға.
Аида ЭЙВАЗОВА,
журналист (Әзербайжан)
