Астана қаласы әкімдігінің ұйымдастыруымен өткен іс-шараға Астана қаласы Мәдениет және спорт басқармасының басшысы Болат Мажағұлов, Қазақстан Жазушылар одағы Астана қаласы филиалының директоры Дәулеткерей Кәпұлы, Мәжіліс депутаты Бекболат Тілеухан, еліміздің еңбек сіңірген қайраткерлері мен қала қонақтары, елордалықтар қатысты. Қалалық әкімдік алаңы мерекені тойлаған халыққа лық толып, өнер жұлдыздары өнерлерін көрсетті.
«Елдік пен бірліктің елордасы – Нұр-Сұлтан» мерекелік концертінде жұртшылық Қазақстанның Тұңғыш Президенті-Елбасының мемлекет құрудағы рөлі туралы пікірлерін білдірді. «Злата» болгар этномәдени бірлестігінің төрағасы Ольга Андриевская мемлекеттің барлық табысына еліміздегі тұрақтылықтың, тыныштықтың және 100-ден астам этнос өкілдері достығының арқасында қол жеткізілгенін айтады.
– Елбасымыздың халыққа жолдаған мәлімдемесін естігенде түрлі сезімге бой алдырдық. Бір жағынан қимастық билесе, екінші жағынан осы күнге жеткізген Президентіміздің еңбегіне алғысымызды білдірдік. Осындай дамыған мемлекетте өмір сүргенім үшін бақыттымын. Балалар мен аналар, ел тұрғындары, сондай-ақ әр саладағы қызметкерлер әрдайым мемлекет қамқорлығында болып келеді. Осыдан жиырма жыл бұрын астанамыздың гүлденуіне күмәнмен қарағандардың қарасы басым еді. Ал бүгінгі дамуына қараңызшы, күннен күнге құлпырып келеді. Қаланың Нұр-Сұлтан аталуы орынды деп білемін, – дейді Ольга Андриевская.
Елбасы әрдайым спортшылар мен шығармашыл жастарға, жас өнер иелеріне қолдау көрсетіп келгені мәлім. Бұл орайда Қазақстанды қуатты елге айналдыру жолындағы Елбасының елеулі еңбегіне ел жастары дән разы екенін айтады.
– Спорт – саламатты өмір салтын қалыптастырудың негізгі кепілі. Мемлекет дене тәрбиесіне ерекше көңіл бөліп, спорт саласын дамытуға жағдай жасап келе жатқанын өздеріңіз көріп отырсыздар. Тұңғыш Президент Нұрсұлтан Назарбаев республикамызда жастардың өмірден өз орнын табуына бірегей мүмкіндіктер беріп, сапалы білім алудың маңыздылығына назар аударып келеді. Халық игілігі үшін атқарылып жатқан бастамаларға қолдау көрсетуге қашанда әзірміз, – дейді Қазақстанның еңбек сіңірген спорт шебері, боксшы Ләззат Күнгейбаева.
Өзіндік қызыққа толы ойын-сауық бағдарламасында көңілде жатталған әсем әндер тарту етіліп, өнерпаздар астаналықтар мен қала қонақтарына күні бойы көтеріңкі көңіл күй сыйлады. Қала тұрғындары бір-бірін жаңа белеспен құттықтап, мерекені кең көлемде атап өтті.
Ая ӨМІРТАЙ,
«Egemen Qazaqstan»
