Халықаралық әскери ынтымақтастықты және әскери-техникалық серіктестікті нығайту, әскери қызметтің мәртебесін өсіру, жауынгерлік даярлықтағы бәсекелестікті арттыру және әскери-арнайы техникалардың мүмкіндіктерін көрсету мақсатындағы «Далалық асхана» байқауында әскери аспаздар шебер аспаздығын, әрі үздік әскери қабілетін көрсетуге мүмкіндік алды.
«Атыс даярлығынан жарыс» кезеңі барысында әскери аспаздардың мергендігі сыналса, «Азық-түлік өнімдерінен мәзірге сәйкес тағам мен нан дайындау», сондай-ақ «Өз қалауы бойынша берілген азық-түлік өнімдерінен тағам мен нан дайындау» кезеңдерінде олардың бірінші, екінші және үшінші тамақтардың, салқын тіскебасардың, нәрсудың рецептіге орай дайындалуы мен оның сапасы бағаланды. Дала төсінде сайысқа түскен аспаздардың мәзірінде винегрет салаты, жазғы салат, борщ, солянка, күріш ботқасы бар қуырылған горбушка, картофел қосылған лангет, мүкжидек морсы, құрғақ жемісті компот болды. Сонымен қоса, әскерилер нан мен нан-бөлішке өнімдерін бекітілген рецептіге сай дайындады. Тамақ және нан өнімдерін әзірлеу үшін әскери аспаздар мен наубайшылар далалық жағдайда ПП-40 тасымалдайтын плитасын, КП-30 тасымалданатын асханасын, КП-130 прицепті асханасын және прицепті нан әзірлеу блоктарын қолданды.
«Батыс» өңірлік қолбасшылығы командасының құрамына Ақтөбелік 30238 әскери бөлімі мен Ақтаудағы 75488 әскери бөлімінен 2 аспаз бен 2 наубайшы кірді. Бүгінгі күні команда мүшелері Қарулы Күштердің іріктеу жарысына қызу дайындалуда.
Халықаралық армиялық ойындардың азық-түлік қызметі мамандарына арасында өткізілетін ерекше қызықты конкурс болып табылатын аталмыш «Далалық асхана» сайысы Ресей Федерациясының Мәскеу облысы «Алабино» полигонында «Жақсы ауқаттансаң – ұрыста жетістікке жетесің» ұранымен өтетін болады.
Гүлайым ШЫНТЕМІРҚЫЗЫ,
«Egemen Qazaqstan»
Маңғыстау облысы
