Президенттің алғашқы сапары Ресей БАҚ-тарында қалай көрініс тапты

Мемлекет басшысы Қасым-Жомарт Тоқаевтың Мәскеуге жасаған ресми сапары ха­лық­аралық қоғамдастық­тың на­за­рын аударған саяси оқи­ға­лардың бірі болғаны анық. Осы орайда отандық, шетел­дік, олардың ішінде, әсіресе ресейлік бұқаралық ақпарат құралдары көптеген хабар таратты, сондай-ақ сапардың мән-маңызын ашып көрсете отырып, өзара байланыстардың бүгіні мен болашағы туралы ой-толғамдар мен пікірлерді кеңінен жариялады.

Ресейдің ықпалды әрі же­текші бұқаралық ақпарат құралдары Мемлекет басшысы Қ.Тоқаевтың Мәскеуге ресми сапары Қазақстан-Ресей қатынастары­на тың серпін беретінін жарыса жазды. Сондай-ақ олар Қасым-Жомарт Тоқаевтың Президент ретінде шетелдерге сапарларын алдымен Ресейден бастағанына маңыз берді. 

Сонымен қатар ресейлік БАҚ-тар Қазақстанның көп­векторлы саясат ұстанып, Батыс пен Шығыстың ара­сында «алтын көпір», сенімді, тең дәре­желі серіктес мемлекет ретінде таныл­ғанына, еліміздің осы бағытын халық­ара­лық қоғам­дастық ұдайы қолдап келе жат­қанына, Қазақстан мен Ресей­дің жай ғана көршілес елдер ғана емес, барлық сала­лар бойынша, әсіресе саяси-эко­но­ми­калық тұрғыда сенімді серік­тес бола біл­геніне, сондай-ақ Нұр-Сұлтан қаласының әлемдік және аймақтық қауіпсіздікті нығайтудағы рөліне баса назар аударған.

Тарқата айтар болсақ, «РИА Новости» агенттігі Қазақстан Президенті мен Ресей басшысының келіссөздері Нұрсұлтан Назарбаев қалыптастырған дәстүрге сай өткенін айта келіп, В.Путиннің: «Біз Қазақстан Президентіне өзінің шетелдік бірінші ресми сапарын біздің елге, Ресейге жасағанына ризашылығымызды білдіреміз. Түрлі мемлекеттік лауазымдарда қызмет еткен Қасым-Жомарт Тоқаев мырза бұған дейін ресейлік әріптестері­мен тығыз байланыста болғандықтан, Президент ретінде де біздің елдеріміз арасындағы өзара тиімді ынтымақтастық пен одақтастық қатынастарды одан әрі дамытуға үнемі назар аударатынына күмән жоқ», деген сөзіне екпін берген.

Аталған ақпарат агенттігі Қазақстан Прези­денті Қ.Тоқаев­тың екі ел арасын­дағы дос­тық қарым-қатынастар­ды жал­ғас­­тыру өзінің міндеті екенін айт­қаны­на назар аударған. Осы орайда агенттік Қазақстан басшысының: «Біздің қарым-қатынасымыз үнемі дамып келеді. Менің міндетім – осы стратегиялық байланыстың үздіксіз жалғасуын қамтамасыз ету. Мен біздің халықтарымыздың достық әлеуетін нығайту үшін бар күш-жігерімді саламын», деген сөзін келтіреді. Сондай-ақ «РИА Новости» Ресей Президенті Владимир Путин мен оның қазақстандық әріптесі Қасым-Жомарт Тоқаев «Астана процесі» аясында Сириядағы қақты­ғысты шешу жөніндегі күш-жігерді жалғастыруға келіскенін жазды. 

«Российская газета» (RG.RU) порталы Қазақстан Президенті Қасым-Жомарт Тоқаевтың Ресей Президенті Владимир Путинмен бұрыннан таныс екендерін айта келіп, мемлекеттер басшыларының бір-біріне айтқан жылы лебіздеріне тоқталған. Осы орайда RG.RU порталы В.Путиннің: «Сіз біздің қарым-қатынастарымыздың деңгейін білесіз. Сіз Ресей мен Қазақстан арасындағы байланыстар­ды осы деңгейге көтеру үшін көп қызмет атқардыңыз. Әрине, бұл мәселеде ең алдымен Қазақстанның Тұңғыш Президентінің еңбегі айрықша. Біз өзара ынтымақ­тастығымызды нығайту мақсатында жұмыс істедік, нәтижесінде көп жетістікке жеттік», деп қазақстандық әріптесіне айтқан сөзіне тоқталған.

Сонымен бірге RG.RU порталы Ресей басшы­сы­ның: «Біз жай ғана серіктес емеспіз, біз ең жақын одақтаспыз», деген сөзіне мән бере отырып, В.Путиннің мемлекеттер арасындағы қарым-қаты­нас­тар халықаралық ұйымдар аясында да, екіжақты байланыстарда да тиімді дамып келе жатқаны, бұл өз кезегінде екі мемлекет халықтарының өмір сүру деңгейіне оң әсер ететін елеулі нәтижелерге қол жеткізуге жол ашатыны туралы пікірін жеткізген. Сондай-ақ аталған портал Қ.Тоқаевтың өзара ынтымақтастықты одан әрі нығайту үшін барлық мүмкіндікті жасауға күш-жігерін аямайтыны жөнінде айтқанын келтірген. Бұған қоса, «Российская газета» Қ.Тоқаевтың «1992 жылғы шартты дайындауға қатысқаным есімде, осы келісім негізінде біздің елдеріміз одақтастық қатынастарға мүмкіндік алды. Біз одақтастық қарым-қатынастар және олардан туындайтын міндеттемелер туралы жақсы білеміз», деген сөзін жариялады.

Ал «Московский Комсомолец» («MK.ru»): «Қасым-Жомарт Тоқаев пен Влади­мир Путин бір-бірі­мен танысу үшін уақыт жұмсамады. Сарапшылар Қазақ­станның жаңа Президентінің Мәскеуге жасаған сапары барынша сыпайы өтетінін айтқанымен, президенттер өздерінің жауын­гер­лік-көшбасшылық рухын көрсетті және ынты­мақ­­тас­тықты жалғастыруға бағытталған бір­қатар келі­сімдерге қол қойды. Қасым-Жомарт Тоқаев­тың Қазақстан Президенті ретінде Мәскеуге сапар жасау үшін дайындалуға екі апта ғана уақыт кетті. Ол ант қабылдаған күні Кремльден шақыру алды. Ақор­да бірден келісті. Бұл көпвекторлы саясат ұста­на­тын Қазақстан Ресейдің алдағы уақытта басты серік­тесі әрі одақтасы болып қала беретінін көрсе­теді.

Владимир Путин Қазақстан Президенті Қасым-Жомарт Тоқаевты Кремльдің үлкен сарайында қабыл­дады. Бұл формат әдетте ең құрметті қонақтар үшін қолданылады.

Президенттер бір-бірімен арнайы танысуды қажет етпеді. Олар алғаш рет 2000 жылы танысқан. Содан бері олар түрлі алаңдарда бірнеше рет кездескен», деп жазды.

Сонымен қатар ресейлік басқа да бұқаралық ақпарат құралдары екі ел арасындағы стратегиялық әріптестікті жан-жақты нығайтуға деген ортақ ниеттің бар екенін, Қазақстан мен Ресей түрлі салалар бойынша өзара іс-қимыл жасауда мол тәжірибе жинақтағанын, тараптар үшін маңызы зор екіжақты байланыстардың құқықтық базасын құрайтын мемлекетаралық және үкіметаралық 450-ден астам құжат қабылданғанын, олардың екіжақты ынтымақтастықтың болашағына сеніммен қарауға, барлық бағыттардағы әріптестікті кеңейтуге мүмкіндік беретінін, Қазақстанда жұмыс істейтін 9 мыңнан астам бірлескен кәсіпорын арадағы сауда-экономикалық байланыстарға зор үлесін қосып отырғанын атап көрсетті. Сонымен бірге ресейлік БАҚ Президент Қасым-Жомарт Тоқаевтың Қазақстан-Ресей байланыстарын өрістете түсуге күш салатыны жөнінде айтқан сөзін жарыса жария­ла­ды.