Спорт • 08 Сәуір, 2019

Доп додасының дүбірі естілді

959 рет

көрсетілді

3 мин

оқу үшін

26 сәуірде Алматыда футзалдан УЕФА Чемпиондар лигасының «Төрттік финалы» басталады. Осы жарыста Португалияның «Спортингі», Испанияның «Барселонасы» мен «Интер Мовистары» және Қазақстанның «Қайраты» күш сынасады. Алғашында жартылай финалдық сайыстар өтсе, соның қорытындысы бойынша қола медаль және бас жүлде үшін таласатын командалар анықталады.

Ғалым СҮЛЕЙМЕН

Атауы мен форматын бірнеше мәрте өзгерткен айтулы дода 2002 жылдан бері үздіксіз ұйымдастырылып келеді. Алғашқы жарыстың жалауы Португалияның астанасы – Лиссабонда желбіреген еді. Сол аралықта өткен 17 жарыстың тоғызында испаниялық командалардың мысы басым болды. Тарқатып айтсақ, Алькала-де-Энарес деп аталатын шағын ғана шаһарда жасақталған «Интер Мовистар» (бұрынғы атауы – «Бумеранг Интервью») клубы бес мәрте бас жүлдені олжалады. Бұл атаққа олар 2004, 2006, 2009, 2017 және 2018 жылдары қол жеткізді.

Кастельон-де-ла-Плананың «Плайас де Кастельоны» (2002, 2003) мен Каталонияның «Барселонасы» (2012, 2014) екі реттен топ жарды. Алматының «Қайраты» да дәл сондай көрсеткішке қол жеткізіп отыр. Жерлестеріміз 2013 және 2015 жылғы жарыстарда жеңімпазы атанды. Сондай-ақ Бельгияның «Аксьон 21» (2005), Португалияның «Бенфика» (2010), Италияның «Монтезильвано» (2011) және ресейлік «Динамо Мәскеу» (2007), «ВИЗ-Синара» (2008), «Газпром-Югра» (2016) футзалшылары бір-бір реттен дара шықты. Міне, осы санаулы ғана командалардың «Төрттік финалында» даралануға шама-шарқысы жетті.

Айтулы жарыстың шешуші сайыстары Алматыда бұған дейін екі мәрте ұйымдастырылған еді. 2011 жылы Балуан Шолақ атындағы Спорт сарайында өткен бәсекеде «Монтезильваноның» мерейі үстем болды. Апеннин түбегінен келген түлектер финалда «Спортингті» 5:2 есебімен ұтты. Бұл жарысты «Қайрат» қола медальмен қорытындылады. Жартылай финалда «Спортингтен» 2:3 есебімен жеңілген жерлестеріміз үшінші орын үшін тартыста «Бенфикадан» пенальти соғу барысында басым түсті – 5:3.

Дүбірлі доп додасы араға алты жыл салып, қайта Алатау баурайына оралды. Жаңадан бой көтеріп, заман талабына сай жабдықталған «Алматы Аренада» өткен жарыста «Қайратқа» тағы да қола жүлде бұйырды. Жартылай финалда «Интер Мовистарға» 2:3 есебімен есе жіберген қазақстандық команда үшінші орын үшін айқаста «Газпром-Юграны» жеңді. Бұл бәсекенің де тағдыры пенальти соғу арқылы шешілді.

Міне, енді осы беделі зор жарысты Алматы үшінші мәрте қабылдағалы отыр. Алдағы күндері Алаш топырағына табаны тигелі отырған командалардың барлығы да өте азулы екені еш дау туғызбаса керек. Қай-қайсысының да бас жүлдені олжалауға мүмкіндігі бар.

Биылғы жарыстың жартылай финалда «Қайрат» пен «Барселона» күш сынасады. Бұл бәсеке 26 сәуірде сағат 21.30-да «Алматы Аренада» өтеді. Келесі ойын дәл сол жерде, сол күні «Спортинг» пен «Интер Мовистар» арасында өрбиді. Жартылай финалда жеңілген командалар 28 сәуірде қола медаль үшін таласса, жеңгендері ақтық сында айқасады.

Ал осы ұжымдарды жеке-жеке таныстыратын болсақ, олардың қол жеткізген табыстары төмендегідей: