Сынаптай сырғыған сынақ

Сейсенбі, 29 мамыр 2012 7:48

Аттестаттау – құқықтық қайта құрылу қадамы

Мемлекет басшысының Жарлығына сәйкес қолға алынған кұқық қорғау қызметкерлерін кезектен тыс аттестаттау сынағы да келіп жетті. Кезектен тыс аттестаттау кестесіне сәйкес биылғы жылдың 21 мамырында ішкі істер органдарының басшылық құрамынан 23 қызметкер, оның ішінде 2-і – орталық аппараттың, 8-і – ішкі істер департаменті басшыларының орынбасарлары,

Сейсенбі, 29 мамыр 2012 7:48

Аттестаттау – құқықтық қайта құрылу қадамы

Мемлекет басшысының Жарлығына сәйкес қолға алынған кұқық қорғау қызметкерлерін кезектен тыс аттестаттау сынағы да келіп жетті. Кезектен тыс аттестаттау кестесіне сәйкес биылғы жылдың 21 мамырында ішкі істер органдарының басшылық құрамынан 23 қызметкер, оның ішінде 2-і – орталық аппараттың, 8-і – ішкі істер департаменті басшыларының орынбасарлары, 1-і – қылмыстық атқару жүйесі департа­менті­нің және 12-і – облыстардағы қылмыстық атқару жүйесі де­пар­таменті басшыларының орынбасарлары ел заңнамасын білуі туралы компьютерлік тестілеуден өтті. 22 мамырда олар мылтық ату және дене шынықтыру даярлығы бойынша нормативтер тапсырды. 23 мамыр күні Медициналық академияда олардың психологиялық тұрақтылығын тексеру үшін әңгі­мелесу жүргізілді.

Ал Жоғарғы аттестаттау комис­сия­сының мүшелерімен болатын әңгі­­­мелесу биылғы жылдың 25-28 мамыр аралығында өтті. Енді кес­те бойынша Ішкі істер органдарының 75 қыз­мет­кері, оның ішінде минис­тр­дің орынбасарлары, ІІМ орталық аппараты қызметтерінің және ішкі істер ор­гандарының аумақтық бөлімшелері мен қылмыстық-атқару жүйесінің бас­­­шылары аттестаттаудан өтеді. Сөй­тіп, біраз айлар жырлануға жүк болған аттестаттау сынағы да сынаптай сырғып барады.

Енді осы бір қызу науқанға сай еліміздің Ішкі істер министрлігі күн өткен сайын қызметін жандандыра түсуде. Құқық қорғау органдарын реформалау басталған кезеңнен бері мұнда қызмет көрсеткіші мен жұмыс сапасы артқаны анық байқалады дейді олар. Соның бірі ретінде ІІМ алынған жаңа ақпаратқа қарағанда, өткен апта ішінде 6909 қылмыс тіркелсе, соның ізі суымай 3689-ы ашылған екен. Бұ­рын жасалған 810, оның ішінде өткен жылдардағы 121 қылмыс ашыл­ған. Іздеу жарияланған 85 қылмыскер табылып, олардан 10 суық қару тәркі­ленген. Сонымен қатар, 121 есірткі қылмысы анықталса, оның ішінде 44 есірткі заттарын сату дерегі орын алған. Сөйтіп бір апта арасында ғана бір тоннадан аса есірткі заттары, оның ішінде 957 келі марихуана, 11,5 келіге жуық героин тәркіленді.

Екібастұз қаласында дүкенші әйел­ді біреу өлтіріп кеткен. Содан Павлодар облысының полицейлері жедел-іздестіру және арнайы іс-шаралар ке­шенін өткізу барысында күдіктіні ұс-тады. Ол қала дүкендерінің бірінде сатушы болып істейтін таныс әйеліне келген екен. Сөйтсе оның қасында тағы бір ер адам жүргенін көреді. Мас күйде болған күдікті сатушы әйелді әлгіден қызғанып, оған пышақ сұққан. Кеуде тұсынан қадал­ған пышақ жа­рақаты­нан жәбірленуші қайтыс болды. Қыл­мыстық іс қозғал­ды. Тергеу амалдары жүргізілуде.

Жеке меншік кәсібі дамыған сайын оған қарсы жасалған қылмыстар да арта түсуде. Бұл орайда Оңтүстік Қа­зақстан облыстық ІІД-нің криминал­дық полиция қызметкерлері қарақшы­лық шабуылмен айналысып жүрген қылмыстық топты құрықтады. Жедел-іздестіру іс-шаралары барысында Шым­кент қаласының үш тұрғыны ұсталды. Олардың біреуі ұрлық және көлікті айдап әкету қылмысы үшін бұрын сотталған. Қылмыстық топтың облыс аумағында жасалған 3 қарақ­шылық шабуылға қатысы бар екендігі анықталды. Олар «Алматы-Термез» авто­жолындағы «Машат» асуында «Скания» жүк көлігінің жүргізушісіне қарақшылық шабуыл жасаған. Жүргі­зушінің 30 мың теңгесін және жеке мүлкін қолды қылған. Бірнеше күннен кейін айқай-шу басылды-ау деген кезде қайта бас көтерген қылмыскерлер Шымкент қаласындағы бір пәтерге басып кіріп, үй иелерін қорқытып, үркі­тіп 600 мың теңге алып кеткен. Мұны да місе тұтпаған қылмыстық топ Түл­кібас ауданындағы Елтай ауылы тұр­ғы­нын қарумен қорқытып, жеке мүл­кін иеленген.

Бүгінде ұйымдасқан қылмыс та берекені қашырып тұр. Содан оған қарсы күрес те қарқын алуда. Мә­селен, Батыс Қазақстан облыстық ІІД ұйымдасқан қылмысқа қарсы күрес басқармасының қызметкерлері облыс аумағында өткізген жедел-іздестіру іс-шаралары барысында 50 жастағы жеке кәсіпкерді тапсырыс беріп өлтір­мекші болған қылмыскердің алдын алды. ЖШС бірінің директоры алаяқтық жолмен басқа коммерциялық ұйым иесінің 38 млн. теңгеден астам қара­жаты мен пәтерін иеленген. Енді сол алаяқтық іс-әрекеттерін жасыру үшін және қылмыстық жауапкершіліктен жалтару мақсатында ол әлгі кәсіпкерді өлтіруге тапсырыс берген. Содан алаяқ күдіктіні өзі қазған көрге өзін түсіру үшін БҚО жедел уәкілдері аталған кәсіпкер ұрланып, өлтірілді деген жалған ақпарат таратады да, күдіктіге «тапсырыс орындалды» деп хабар жеткізеді. Күдікті қуанғаннан тойлап жатқанда ұсталды.

Ал Оңтүстік Қазақстан облысының полиция қызметкерлері қолдарында қарудың бірнеше түрі бар 3 күдікті адамды қолға түсірді. Шымкент қа­ласының тұрғыны Сайрам Сарыағаш ауданының Абай ауылындағы үйлер­дің біріне келіп, кек қайтару мақса­тында үйден шыққан жас жігітке мылтық атады. Бірақ оқ жас жігіттің соңынан ілесе шыққан оның әжесіне тиеді. 82 жастағы әжей ауыр жарақат алады. Сөйтсе әлгі Сайрам жас жігіт­тен кек алу үшін қолына қару алып, достарын ертіп Сонау Шымкенттен Абай ауылына арнайы қан жұтып келген. Содан олардың соңына полиция түседі. Қудалаудан құтылу үшін кекшілдер Сарыағаш қаласына бағыт алады. Жол бойында көлік нөмірлерін ауыстырады да, кек алушы таксиге отырып кетеді. «Қызыл ту» бекетінде Қазығұрт АІІб-нің жедел уәкілдері «Ауди» автомашинасын тоқтатады. Сол кезде қашып кетпек болған көлік жолаушысы, яғни, кек алушы қолға түседі. Тінту барысында одан нөмір­лері өшірілген 2 «Макаров» тапаншасы, 1 «ТТ» тапаншасы, сондай-ақ бетперде табылып, тәркіленді. Сол күні полиция қызметкерлері күдіктінің екі сыбайласын да ұстады.

Шығыс Қазақстан облысының ІІД ұйымдасқан қылмысқа қарсы күрес басқармасының қызметкерлері Мар­қакөл мемлекеттік қорығының аума­ғында өткізген «Нерест» операциясы барысында облыстың төрт тұрғынын тексерді. Олардан аулауға тыйым салынған 228 келі майқан балық пен 110 келі уылдырық тәркіленді. Төр­теуі­­нің үстінен заңды бұзғандары үшін ҚК 287-бабы 3-бөлімімен қыл­мыстық іс қозғалды.

Жамбыл облысы ІІД ұйымдасқан қылмысқа қарсы күрес басқарма­сы­ның қызметкерлері Ресейдің құқық қорғау органдары қызметкерлерімен бірлесіп, іздесуде жүрген қылмыстық топтың жетекшісін ұстады. Құрық­тал­ған азаматты есірткі заттарын және қаруды заңсыз сақтағаны үшін Қордай аудандық соты 6 жыл 6 айға бас бос­тандығынан айыру жазасына кескен болатын. Қазіргі уақытта қылмыскерді экстрадициялау мәселесі шешілуде.

Жедел-профилактикалық іс-шара­лар мәселесі де күн тәртібінен түскен емес, дейді құқық қорғаушылар. Астана қаласында тәртіпті сауықтыру мақ­сатында жедел-профилактикалық іс-шаралар өткізіліпті. Іс-шара аясында көшеде және қоғамдық орындарда құқықтық тәртіпті сақтауға, заңсыз сақталған қару мен есірткі заттарын тәркілеуге, қылмысты анықтауға және ашуға, қала аумағына заңсыз келген азаматтарға және іздестіруде жүрген қылмыскерлерді ұстауға бағытталған жұмыстар атқарылған. Шараға ішкі істер органдарының 1117 қызметкері жұмылдырылған. Көрсетілген кезеңде елорда аумағында 67 қылмыс тіркел­ген. Осы мерзім ішінде 61 қылмыс, оның ішінде 16 бұрын жасалған және өткен жылдардағы 2 қылмыс ашылды. Іздеуде жүрген 12 қылмыскер құрық­талды. Ұйымдасқан қылмысқа қарсы күрес желісі бойынша 7 қылмыс, есірткі бизнесіне қарсы күрес саласы бойынша есірткі заттарын сатудың 4 дерегі анықталды. Заңсыз айналымнан 20 келіге жуық есірткі заттары тәркіленді. Әкімшілік жауапкерші­лікке 1869 тұлға тартылған, оның ішін­де елде болу ережесін бұзғаны үшін 640, қоғамдық орындарда спирт ішімдіктерін ішкен 604, ұсақ бұза­қылық жасағаны үшін 158, мас күйде көлік жүргізгені үшін 55, есірткі заттарымен заңсыз айналысқаны үшін 20 азамат бар. Бұлар жай ғана сан емес, ол сандардың сыртында адам тұрғаны өкінішті-ақ.

Александр ТАСБОЛАТОВ,

«Егемен Қазақстан».