Бүгін, 15-сәуірде Атырауда тұңғыш рет көшеттердің жергілікті тұрғындарға тегін таратылу акциясы өтті. «Арнаулыавтобаза» ЖШС-нің аумағында сағат 10-нан бастап тұрғындар кезекке тұрды. Тұрғындарға ағаштың үш түрі ұсынылды - үйеңкі, шетен және қарағаш.
- Ағаштарды алу үшін тұрғындар өздерінің телефон нөмірін және мекен-жайын қалдыру керек. 5 көшет алып, одан әрі тиісті күтім мен суаруды қамтамасыз етуі қажет. Арнайы құрылған комиссия тұрғындардың іс-әрекеттерінің орындалуын бақылайды, - деді қалалық тұрғын үй-коммуналдық шаруашылық, жолаушылар көлігі және автомобиль жолдары бөлімінің өндірістік-техникалық секторының жетекшісі Акесен Ибрагимов.
Акесен Ибрагимовтың айтуынша, көшеттер Индер ауданынан әкелінген, әлеуметтік мекемелерде – балабақшалар мен мектептерде отырғызылады.
Айта кетейік, Атырауда екі айлық санитарлық тазалау жалғасуда. Сәуір сенбіліктерінің аясында облыс орталығында жасыл желек отырғызу жоспарланған.
