– Оқу орны алдына тың жобалар мен бастамаларды қойып отыр. Мақсат – жастарға жаңаша білім беріп, заман талабына сай бәсекеге қабілетті мамандар даярлауға қол жеткізу. Бұл бағытта университет басшылығы Елбасының «Болашаққа бағдар: рухани жаңғыру» бағдарламалық мақаласын басты бағдар етіп, оны жүзеге асыру жолында жұмыс жасауда. Сондай-ақ Елбасы 2019 жылғы Жастар жылында жастарға көңіл бөліп, қолдау көрсету қажеттігін тапсырды. Дамып келе жатқан елiмiздiң болашағы жастардың еңбекқорлығына, талап-тiлегiне, арман-мұратына байланысты. Олар ата-бабаларымыздан мұра болып келе жатқан құндылықтарымызды, тарихи дәстүрлерiмiздi жаңғыртып, қатарына үлгі болуы міндетті, дейді университет ректоры Б.Ахметов.
Өткен жылдан бері өңір жастары бірнеше стартап жобаларға қатысу арқылы кәсіпкерлігін бастап, табыс әкелуде. Соның бірі – «Менің арманым» ұлттық стартап жобалар байқауы. Университетте ұйымдастырылған іріктеу кезеңінде 200-ден астам идеялар тіркелді, үздік 42 жоба жергілікті кәсіпкерлерге өз жобаларын қорғап, 30 жоба ширек финалға, соның ішінде 8 жоба жартылай финалға қатысып, 5 жоба финалға өтті. Жуырда өңірде өткен жастар форумында университет студенттері таныстырған «Ақылды таяқша» жобасы қазіргі таңда өте керекті әлеуметтік жобалардың бірі ретінде бағалануда.
Елбасының 5 әлеуметтік бастамасын жүзеге асыру және жастарды әлеуметтік қолдау мақсатында университет биылғы жылы 500 орындық студенттік жатақхана, келесі жылы тағы бір 500 орындық студенттік жатақхана салуды жоспарлап отыр.
Алдына биік жоспарларды қойып отырған университетте Амал мерекесі қарсаңында тың жаңалықтардың тұсауы кесілді. «Рухани жаңғыру» бағдарламасы аясында кәсіпкерлік білім беру бағытында Каспий өңірі жастарының, жаңа бастаушы кәсіпкерлердің және оқытушылар құрамы арасында инновациялық және кәсіпкерлік әлеуетін арттыру, келешекте стартап идеяларды табысты бизнеске айналдыру мақсатында «Каспий» кәсіпкерлік орталығы ашылды. Бұл орталықта университетке оқуға келген студент өз мамандығы бойынша білім алып қоймай, өз бизнесін дамытуына мүмкіндік алады. Сондай-ақ халық шежірешісі, қазақ халқының, оның ішінде Маңғыстау қазақтары бастан кешірген тарихи оқиғалардың ізін зерделеген өлкетанушы, Адайдың рулық генеалогиясын, шежіресін қағаз бетіне түсірген алғашқы автордың бірі Алшын Мендалиев атындағы және қоғам қайраткері, көп жылдар ауыл шаруашылығы саласында басшылық қызмет атқарған, «Парасат» қозғалысының жетекшісі, «Халықтық келісім» ҚБ бірінші төрағасы болған Жаздырхан Сейдалиев атындағы аудиториялар студенттер игілігіне ұсынылды.
