Отанның тыныштығы сақталып, берекелі елге айналды. Осындай бейбіт те, мамыражай халқымыз үшін Тұңғыш Президент – Елбасы Нұрсұлтан Әбішұлы Назарбаевтың президенттік өкілеттігін тоқтату туралы қабылдаған тарихи шешімі көңілді алаңдатып, ойға салғандай болды. Соған қарамастан биліктің бейбіт жолмен ауысып, көпке үлгі бола алғаны қаншама жас буынның рухын оятты. Президент Қасым-Жомарт Тоқаевты таңдау – елдегі саясаттың сәтті сабақтастығы іспетті болып отыр. Елбасының сенімді серігінің өзіне артылған ауыр жүкті қиналмай көтеретініне ешқандай кумән жоқ.
Сондай-ақ көп ұзамай Мемлекет басшысы Қасым-Жомарт Тоқаевтың елімізде кезектен тыс президенттік сайлау өткізу туралы қабылдаған шешімін өте орынды деп санаймын. Өйткені өтпелі кезеңде бір шешімге тоқталып, ішкі және сыртқы саясат үшін толық сенім арқалай алатындай өкілеттілікке ие Президент анықталғаны жөн. Президентке қоғам тарапынан білдірілген сенім деңгейін арттырып, халықтың өзін қауіпсіз, еркін сезінуін қалыптастыруымыз керек. Еліміздің қауіпсіздігі мен бейбіт елдің амандығы қашанда күн тәртібіндегі өзекті мәселе болып қала береді. Стратегиялық маңызы бар жобалар мен күн тәртібінде орналасқан әлеуметтік-экономикалық мәселелерді жүзеге асыру да билік ауысымына тікелей байланысты.
Абай ТАСБОЛАТОВ,
Парламент Мәжілісінің депутаты, генерал-лейтенант
