Оның айтуынша, АӨК-ті цифрландыру шараларының аясында елімізде 20-дан астам цифрландырылған ферма, 4 мыңнан астам озық дамыған ферма пайда болады. Ауыл шаруашылығы министрлігі цифрлы ферма, дамыған ферма және базалық ферма деген үш түрлі деңгейді қарастырып отыр. Осы үш деңгейдегі фермалардың әрқайсысына тән артықшылықтары болады. Облыс әкімдіктерімен бірлесіп жүргізілген сараптама нәтижесі бойынша, қазіргі таңда Қазақстанда 114 дамыған ферма мен 10 цифрлы ферма бар.
– Бұл – жақсы бастама. Дегенмен, әкімдіктер шаруашылықтардың цифрлы дамуына мемлекеттік шаралар арқылы одан әрі қолдау көрсетуге тиіс, – деді К.Абдуллаев.
Осы жиында айтылғандай, суармалы егін алқаптарын ұлғайтуға да министрлік тарапынан ерекше маңыз беріліп отыр. Бүгінгі таңда республика бойынша суармалы алқаптардың жалпы аумағы – 1,4 миллион гектар, яғни барлық егін алқабының 7 пайызы шамасында. Алдағы уақытта оны 3,5 миллион гектарға жеткізу керек. К.Абдуллаевтың айтуынша, қазақстандық фермерлердің осы суармалы жерлерден алатын өнімінің көлемі шетелдік фермерлердің өнімінен 2,4 есе аз көрінеді. Дегенмен, тиісті инженерлік жұмыстар жүргізіліп, заманауи технологиялар енгізілгеннен кейін отандық фермерлер де Израильдегі шаруалар сияқты мол өнім алатын болады.