Бұзақыларды бұғаулаған Бақытәлі
Жұма, 9 қараша 2012 7:13
Темірдей тәртіпке мойынсұнып, өзін де, өзгелерді де заңға ғана бағындырып қызмет істеу – екінің бірінің қолынан келе бермес мерейлі міндет. Өйткені, өмірдің қай саласындағы адам – кәсіпкер ме, мұғалім бе, шенеунік пе, өнер адамы ма, мейлі, кім болсын, олардың өз тіршілігін тұрақты қамтамасыз етулері үшін, ең әуелі, темірдей тәртіп қажет. Әсіресе, осы адамдардың қай-қайсысы да көліксіз қозғалмайтынын ескерсек, жолдағы аяқ аттам келеңсіздіктерге кезікпей аман жүру әркімнің-ақ арманы. Ал көшедегі, жолдағы арты апат тудырып, опық жегізер кез келген келеңсіздіктерден сақтандыруды, қауіптің алдын алуды тек жол полициясы қызметкерлері ғана жүзеге асыра алады. Сондықтан да жол сақшыларының атқаратын қызметін мұның жауапкершілігі мен қиындығына қанық адамдар жақсы түсінеді.
Жұма, 9 қараша 2012 7:13
Темірдей тәртіпке мойынсұнып, өзін де, өзгелерді де заңға ғана бағындырып қызмет істеу – екінің бірінің қолынан келе бермес мерейлі міндет. Өйткені, өмірдің қай саласындағы адам – кәсіпкер ме, мұғалім бе, шенеунік пе, өнер адамы ма, мейлі, кім болсын, олардың өз тіршілігін тұрақты қамтамасыз етулері үшін, ең әуелі, темірдей тәртіп қажет. Әсіресе, осы адамдардың қай-қайсысы да көліксіз қозғалмайтынын ескерсек, жолдағы аяқ аттам келеңсіздіктерге кезікпей аман жүру әркімнің-ақ арманы. Ал көшедегі, жолдағы арты апат тудырып, опық жегізер кез келген келеңсіздіктерден сақтандыруды, қауіптің алдын алуды тек жол полициясы қызметкерлері ғана жүзеге асыра алады. Сондықтан да жол сақшыларының атқаратын қызметін мұның жауапкершілігі мен қиындығына қанық адамдар жақсы түсінеді.
Осындай аса жауаптылығы мен қатар қиындығын қоса қиналмай арқалап адал алып жүретін жандар, жоғарыда айтқанымыздай аз десек, солардың бірі Астана қалалық ІІД ЖПБ жеке мамандандырылған батальонының аға инспекторы капитан Бақытәлі Төлегенов болып шықты. Әрине, қазіргідей арамдар мен сұмырайлар қаптаған шенеуніктер арасынан, шыны керек, міндетін заң талабына ғана сүйеніп, шынайы атқаратын атқамінерлерін табу қиынға айналған кезде, жас та болса қатарластарынан оза шауып аттестаттаудан анық алдырмай өткен аға инспектордың болашағына зор сенім артылады. Өйткені, осындай адамгершілігіне әлі қылау түспеген азаматтар ертеңгі күні билік тізгінін ұстауға ие болса ғана халықтың хақы заң үстемдігін орнатуға басымдық алады.
Ал олай болмаған жағдайда биік мінберден оқалы киімділерге жалынды сөз арнайтын, бірақ өздері жемқорлықпен сап түзеп айналысатын, сөйтіп заңға да, әдепке де, тәртіпке де мүлде қайшы теріс әрекетімен басшысынан бастап сотталатын талай оқалы шенділердің бұғып қалған ізбасарлары халыққа қиын болған екен-ау деп оп-оңай тамырын қидыра қоюлары екіталай. Сондықтан осындай тоңмойын, безбүйрек, қызметін тек пара арқылы ақша табу орны деп есептейтін екіжүзді өңділерден арылу мақсатында сынақ өтті. Онда Президент Жарлығына сәйкес аттестаттау мақсаты – құқық қорғау жүйесі қызметкерлерінің кәсіби даярлық деңгейін және олардың қазіргі заманғы талаптарға сәйкестігін анықтап, органдарды бүтіндей алғанда мемлекеттің беделіне нұқсан келтіретін моральдық-өнегелілік сапалары төмен және жемқорлық пиғылдағы біліксіз қызметкерлерден тазарту болғаны анық. Міне, осы орайда бұл талаптардың барлығынан полиция капитаны Б.Төлегенов мүдірмей өтіп және сынақтардың бәрін тек өте жақсыға ғана тапсырған.
Иә, аға инспектордың аса қиын асудан ат шалдырмай аса алуына сенім бар. Оңтүстік Қазақстан облысының Төлеби ауданының «Қазақстан» атты елді мекенінде туып-өскен ол Шымкент қаласындағы М.Әуезов атындағы университетті бітіріп, Астанаға келіп ЖПБ-ға қызметке орналасады. Содан бері табаны күректей жеті жыл араға түсіп, жеті межеден өткен. Отбасын құрды, қызметін жақсы атқарғаны үшін жеңілдікпен екі бөлмелі пәтер алды. Қазіргі күні төрт баласы бар көп балалы отағасы. Жастайынан осы мамандықты қалағандықтан оған дайындықты ерте бастаған ол спорттың бокс, айкидо деген түрлерімен әлі күнге қол үзбей айналысады. Осы күштілік пен қуаттылықтың, асқан ептіліктің арқасында түзеу мекемесінен қашқан екі сотталғанды жанар май құю бекетінде кездейсоқ кездестіріп, суретімен салыстырып танып, ізіне түсіп қуып, қойнында оқатары, қолында жалаңдаған пышағы бар қауіпті қылмыскерлермен жан алысып, жан берісіп айқасады. Әйтеуір ақырында айкидо шығыс жекпе-жегінің әдістерімен оларды екі бүктеп, кісендеп Алматы ІІБ-ге жеткізіп, тапсырады. Айта берсе, шығыс жекпе-жегінен қара белбеу дәрежесі бар жол полициясы аға инспекторының мұндай бейбіт күндегі батылдығы, соның ішінде көлік ұрлаған қарақшыларды қалай ұстағаны туралы ерліктері ерекше-ақ. Ол кездескен қылмыскерді жалғызбын-ау немесе құрықтаушы топ керек деп уақыт оздырып кідіріп жатпайды, сол сын сәтте сақшыға тән сындарлы әрекет жасап, сәтті қимылдап үлгереді. Сондай заңға сай мәнді де орынды ісімен үнемі алдан көрінеді.
Сөйтіп ол аттестаттау сынынан да сынаптай сырғып өтіп, қатарластарынан оза шауып, ең үздік болып танылды. Әрине, ол сынақтан кімдердің қалай қалқып өтіп, ал қандай қызметкерлердің не үшін жазықты болып сүрінгені туралы әлі нақты айтыла жатар. Дегенмен, біздің бүгінгі кейіпкеріміздің ісі мен сөзі, жан дүниесінің тазалығы, адамгершілігі мен әділдік үшін атқарған ерлік істері аттестаттау комиссиясының шешімін нақтылай түсті. Енді осылайша шынайы үздіктер анықталар болса, жоғарыда айтқанымыздай, темірдей тәртіпке мойынсынып, өзін де, өзгелерді де заңға ғана бағындырып қызмет ететін, сөйтіп адал да әділ адамдардың ғана арманын жүзеге асыра алатын капитан Б.Төлегенов секілді көшбастаушылар қатары да арта береріне бек сенеміз. Ал мұндай азаматтарды қатарына тартып, заң талабына сай тәрбиеленуіне жол ашқан, әрине, ІІД ЖПБ басшылығы екендігі анықталғанда «бәрі осылардай болса игі» деген ізгі үміт көңіл тербейді.
Александр ТАСБОЛАТОВ,
«Егемен Қазақстан».
