Таңдаулылар сапқа тұрды
Сейсенбі, 20 қараша 2012 7:08
Ақмола облыстық кеден департаментінің табысты қызметі жұртшылық назарында екендігін білеміз. Мұнда белгіленген жоспар-тапсырмалар артығымен орындалады. Бұл сала қызметкерлерінің кәсіби біліктілік дәрежесінің биіктігін көрсетеді. Оны департаменттің құқық қорғау саласына жататын қызметкерлерін кезектен тыс аттестаттаудың қорытынды кезеңіне қатысу барысында өзіміз де айқын аңғардық.
Сейсенбі, 20 қараша 2012 7:08
Ақмола облыстық кеден департаментінің табысты қызметі жұртшылық назарында екендігін білеміз. Мұнда белгіленген жоспар-тапсырмалар артығымен орындалады. Бұл сала қызметкерлерінің кәсіби біліктілік дәрежесінің биіктігін көрсетеді. Оны департаменттің құқық қорғау саласына жататын қызметкерлерін кезектен тыс аттестаттаудың қорытынды кезеңіне қатысу барысында өзіміз де айқын аңғардық.
Бөлмеге бірінші болып ішкі қауіпсіздік басқармасына қарасты жедел-қызмет бөлімінің бас маманы Михаил Гаража еніп, әскери тәртіппен рапорт берді. Ол бұған дейін тест сынағынан жүз пайыздық көрсеткішті иемденіп, дене шынықтыру дайындығын «жақсы» бағаға тапсырған екен. Ұжым ардагері әкімшілік, тәртіптік жазаға тартылмаған. Оның салмақты баяндауларынан ойлау болмысының кеңдігі көрініп тұрды.
Жалпы, бүгінгі сынақта Гаража сияқты өз ісіне берілген азаматтар көп болып шықты. Олар аттестаттау комиссиясының сұрақтарына дәлме-дәл жауап қайтарып, қабылданған заңдар мен нормативті құжаттардың қолданылу аясын ашып әңгімеледі. Бұл санаттағы 18 қызметкердің ішіндегі жалғыз қыз бала Әсел Мұхаеваның дайындығы да тыңғылықты екен. Қаржы полициясы академиясын былтыр бітірген ол араға көп уақыт салмай контрабандамен күрес басқармасының аға инспекторы дәрежесіне көтеріліп, ұжым абыройына бөленген. Сондай-ақ, әскери борышын өтеген капитан Темірхан Қанафиннің сұрақтарға мүдірмей жауап бергенін атап көрсеткен жөн. Кезек аға маман-кинолог Анатолий Бочаревке келгенде бөлме ішінде жылы желпініс пайда болды. Республикаға танымал маманның ерлігі мен өнегелі істерін талай мақалаға арқау еткен біз оның ақтық сыннан ойдағыдай өткеніне қуандық.
Бірақ, аттестаттау – көңіл ауанына, қызметкердің жұмыс өтіліне, тіпті, жинақтаған абырой-беделіне қарамайтын қатал сын. Осыдан болса керек, кейбір қызметкерлердің білгенін ұмытқанын, бірқатарының қарапайым сұрақтардан жаңылғанын, енді бірінің дайындалмай келгенін де көрдік. Комиссия иіні жұмсарып иілуді, көзжұмбайлықтан ада, әділдігімен бақылаушы ретінде қатысқан біздің де көңілімізден шықты.
Аттестаттау комиссиясының төрағасы, облыстық кедендік бақылау департаменті бастығының орынбасары Жамбыл Балғабаев 14 кеденшінің атқарып жүрген қызметіне сәйкестігін, бір адамның жоғары лауазымға ұсынылатындығын мәлімдеді. Ал екі қызметкер қазіргі лауазымынан босатылып, құқық қорғау саласына жатпайтын өзге буындарға ауысатын болды. Сондай-ақ, өзге саладағы қызметкерлер де сынақтан босатылмайды. Олар үш жылда бір рет өтіп тұрады. Бұл шара кеден қызметінің сапында таңдаулылар ғана қалатынына сендіреді.
Бақберген АМАЛБЕК,
«Егемен Қазақстан».
Ақмола облысы.
