Бейнематериалдармен танысты
Жұма, 23 қараша 2012 7:09
Талдықорған қалалық сотында әскери қызметші В.Челахтың ісі бойынша процесс жалғасуда. 22 қарашада сотталушының адвокаты С.Сәрсенов сотқа оның қорғауындағы адамның бұрынғысынша сот залына шығып, процеске қатысудан бас тартып отырғанын хабарлады. Осылайша істі қарау сотталушы Челахсыз өтуде.
Іске төрағалық етуші Е.Ахметжанов қорғаушы жаққа құпия құжаттарды қарауға құқылы адвокат Естияровтың сотталушымен бірге құпия белгісі бар іс материалдарымен таныса алатынын хабарлады. Осылайша, сот сотталушының өзінің және қорғаушысының құпия материалдармен танысуы үшін уақыт беру туралы осыған дейінгі өтінішін қанағаттандырды.
Сот процесі арнайы іс-шаралар бейнежазбаларын көрумен жалғасты. 22 қарашада қатысушыларға Челахтың өз камераластарына қызметтестері мен аңшыны қалай өлтіргенін, шекара бекетін өртеп, тауда, одан кейін қыстақта қалай жасырынғанын егжей-тегжейлі баяндағаны, туыстарымен және адвокатымен сөйлескені туралы бейнетүсірілім көрсетілді.
Осыдан кейін сот оперативті-тергеу іс-шаралары кезінде түсірілген бейнематериалдарды қарауға көшті.
