Киіктер неге қырылып жатыр?
Бейсенбі, 24 мамыр 2012 7:41
Торғай даласындағы ақбөкендер қырылып жатыр. Облыстағы орман және аң шаруашылығы аумақтық инспекциясы мамандарының мәліметі бойынша, өлген киіктің саны айналасы үш күннің ішінде 543-ке жеткен. Қазір Торғайда құрамында инспекция мен Жангелдин аудандық әкімдігі қызметкерлері, мал мамандары бар 50 адамнан тұратын арнайы комиссия жұмыс істеп жатыр. Киіктің өлекселері тексерілу үшін лабораторияға алдырылды. Оның қорытындысы екі аптадай уақыттан кейін дайын болады.
Бейсенбі, 24 мамыр 2012 7:41
Торғай даласындағы ақбөкендер қырылып жатыр. Облыстағы орман және аң шаруашылығы аумақтық инспекциясы мамандарының мәліметі бойынша, өлген киіктің саны айналасы үш күннің ішінде 543-ке жеткен. Қазір Торғайда құрамында инспекция мен Жангелдин аудандық әкімдігі қызметкерлері, мал мамандары бар 50 адамнан тұратын арнайы комиссия жұмыс істеп жатыр. Киіктің өлекселері тексерілу үшін лабораторияға алдырылды. Оның қорытындысы екі аптадай уақыттан кейін дайын болады.
– Телеарналар берген ақпараттарда киіктің жаппай қырылуына түрлі себептер айтылып жатыр. Оның барлығы да ойдан шығарылған болжам. Арнайы лабораториялық қорытынды ғана киіктің қырылу себебін анықтай алады, – дейді облыстық орман және аң шаруашылығы аумақтық инспекциясының бастығы Марат Бегімбетов.
Киік негізінен олар төлдейтін Айырқұм мен Аққұмның арасындағы ықтасында қырылған. Ақбөкеннің 4 текесі, биыл туған 31 лағы және 508 ешкісінің өлексесі табылды. Өлекселер шашырап жатыр, аралары 100-200 қадамдай болады. Қырылған киіктердің аузынан көбік аққан, іші өткен және кеуіп кеткен.
– Негізі бұл пастереллездің белгісіне келеді, бірақ нағыз жұқпалы ауру деп айтуға әлі ерте. Киіктердің ешкілері күпті болған немесе гүлдеген кезде улы болатын шытыра шөбін көп жеп қойған деген де мамандардың алдын ала болжамы бар, – дейді Марат Бегімбетов.
Қазір Айырқұмда ақбөкендер төлдеп болып қалды. Лағын өргізетін құралай салқыны да өтті. Өткен жылғы санақ бойынша Қазақстандағы Бетпақдала бөлігінде 78 мың киік болды. Биылғы санақ та жақында жүрген болатын, бірақ әлі қорытындысы шыққан жоқ.
Нәзира ЖӘРІМБЕТОВА,
«Егемен Қазақстан».
Қостанай облысы.
