«Бейбарыс» бағындырған биік
Сейсенбі, 8 мамыр 2012 7:14
Атыраудың шайбалы хоккей командасы екінші рет ел чемпионы атанды
Мұз айдынында қарсыластардан айла асырып, қарсы команданың қақпасына шайба соғу да оңай емес. Дегенмен, «Бейбарыстың» жолы болып тұр. Өткен жылдарғы жетістікті айтпағанның өзінде, биылғы маусымда «Бейбарыс» ойыншылары тағы да биік белеске баланған чемпиондық атақты жеңіп алды.
Сейсенбі, 8 мамыр 2012 7:14
Атыраудың шайбалы хоккей командасы екінші рет ел чемпионы атанды
Мұз айдынында қарсыластардан айла асырып, қарсы команданың қақпасына шайба соғу да оңай емес. Дегенмен, «Бейбарыстың» жолы болып тұр. Өткен жылдарғы жетістікті айтпағанның өзінде, биылғы маусымда «Бейбарыс» ойыншылары тағы да биік белеске баланған чемпиондық атақты жеңіп алды.
Хоккейден ел чемпионатының кезекті ойындары өткен жылғы күзден бері өткізіліп, биыл плэй-офф ойындарымен жалғасын тапты. Бұл ойын ел чемпионатының тарихында алғаш рет енгізіліп отырғандықтан, «Бейбарыс» ойыншыларына шеберлікті бұрынғыдан да шыңдай түсуге тура келді. Атырау хоккейшілеріне үміт артқан жанкүйердің сенімі ақталды деуге болады. Ширек финалдық ойындарда «Алматыдан» басым түскен «Бейбарыстың» ұпайы еселене түсті. Ал Теміртаудың «Арыстанын» таза жеңіспен ұтқан Атырау хоккейшілеріне ақтық сында қателікке ұрынбау қажеттігі жүктелді.
– Біздің хоккейшілерге, – дейді «Бейбарыстың» бас бапкері Александр Истомин, – финалдық ойында алты кездесу өткізу қажет болды. Бұл – плэй-офф ойындарының ережесі. Ал қарсыласымыз – «Ертіс-Павлодар» ең азулы командалардың бірі. Сәтті ойын өткізіп, жеңіске жету үшін бізге қателесуге болмайды. Өз ойыншыларыма осындай талап қойдым.
Сөйтіп, «Бейбарыс» қарсыласымен алғашқы екі кездесуді өз мұз айдынында кездесіп, екеуінде де жеңістің тәтті дәмін татты. Алайда, үнемі бұлай бола бермейді ғой. Кезекті екі ойын қарсыластар айдынында, Павлодарда өткенде атыраулық хоккейшілерге жеңілістің ащы дәмін татуына тура келді. Жеңіске жету жолындағы Атырауда кезекті бесінші ойында «Бейбарыс» ойыншылары тағы да жеңіске қол созды. Алайда, ең шешуші алтыншы ойынның нәтижесі қалай болары белгісіз еді.
Хоккей жанкүйерлерінің 26 сәуірде өткен шешуші ойынды асыға күткені анық. Өйткені, дәл осы ойында Қазақстанның биылғы чемпион командасы анықталатын еді. Осы матчта жеңіс 4:2 есебімен атыраулық «Бейбарыс» командасының еншісіне жазылды. Ойынның өту барысына егжей-тегжейлі тоқталмай-ақ қоялық, дегенмен, «Бейбарыс» командасы шайбалы хоккейден екінші мәрте Қазақстан чемпионы атанғаны Атырау жұртшылығын айрықша қуантқаны даусыз. Чемпионат қорытындысымен «Бейбарыстың» белді ойыншылары Михаил Паншин «Үздік шабуылшы», ал Максим Шарифьянов «Үздік ойыншы» атанды.
– Біз соңғы шешуші ойында қателікке ұрынбауды басты мақсат еттік. Сол мақсатымыз орындалды. Шешуші ойынды сәтті өткіздік. Төрешілер тарапынан да еш қателік болған жоқ. Енді қыркүйекте басталатын кезекті чемпионатқа тыңғылықты дайындықты бастаймыз, – дейді «Бейбарысты» екінші мәрте биік белесті бағындыруға жұмылдырған бас бапкер Александр Истомин.
Айтпақшы, Қазақстан чемпиондығын екі рет жеңіп алған «Бейбарыс» командасы бұдан былай тек Атыраудың ғана емес, ел намысын Еуролигада қорғау мүмкіндігіне ие болып отыр. Жақында облыс әкімдігі командаға 40 млн. теңге бөліп, құрмет көрсетті.
Жолдасбек ШӨПЕҒҰЛ.
Атырау облысы.
