Шын жүйріктер шығандап шықты
Сейсенбі, 26 маусым 2012 7:27
Еуропа чемпионатында өткен аптаның соңғы үш күнінде ширек финалдың қалған үш ойыны ойналып, жартылай финалдық төрттіктің ұзын-ырғасы түгенделді. Осы аралықта әдепкі Португалияның қатарына Германия, Испания және Италия құрамалары келіп қосылды. Жанкүйер қауым турнирдегі шын жүйріктердің кімдер екенін енді толық білді.
Сейсенбі, 26 маусым 2012 7:27
Еуропа чемпионатында өткен аптаның соңғы үш күнінде ширек финалдың қалған үш ойыны ойналып, жартылай финалдық төрттіктің ұзын-ырғасы түгенделді. Осы аралықта әдепкі Португалияның қатарына Германия, Испания және Италия құрамалары келіп қосылды. Жанкүйер қауым турнирдегі шын жүйріктердің кімдер екенін енді толық білді.
Германия-Грекия – 4:2. Бұл матчта «неміс мәшинесінің» мерейі үстем болатынына жұрттың көбі шүбәланған жоқ. Гәп тек ойынның қандай есеппен аяқталатынында ғана болды. Айтатыны жоқ, Йоахим Левтің шәкірттері турнир басталғалы барлық құрамалардың арасында ең тәуір ойын көрсетіп келді. Ал гректердің плей-оффқа шығуының өзі олар үшін зор табыс.
Матчтың алғашқы минутынан-ақ оның қандай арнада өрбитіні белгілі болды. Допты бірден бауырының астына қарай тартып алған «бундестим» Михалис Сифакистің қақпасын жан-жақтан қыспаққа алуға кірісіп кетті. Бұл тұстары старттық құрамда күтпеген жерден көрінген Марко Ройс, Мирослав Клозе, Андре Шюррле үлкен белсенділік танытты. Бұлардың біріншісі тіпті матчтың ең үздік ойыншысы да атанды. Сол Маркода үзіліске дейін кемінде үш рет гол соғу мүмкіндігі болды. Ал осылардың бәрінің өтеуі сынды етіп, команда капитаны Филипп Ламның «тоғыздыққа» гол салуы керемет әдемі көрініс әкелді.
Екінші таймда гректер сирек те болса шыққан қарсы шабуылдарын барынша тиімді пайдаланып қалуға тырысып бақты. Бұл мақсат көп ұзамай жүзеге де асты. Құйындай ұйытқыған сондай шабуылдардың бірінде Гиоргос Самарас қақпа алдындағы аздаған абыр-сабырды тамаша пайдаланып кетті. Алайда, «Эллада жұрты жұрағаттарына» бұл тепе-теңдік жағдайды ұзақ ұстап тұрудың орайы келмеді. Бар болғаны бес минуттан кейін Сами Хедира өз командасының орасан зор басымдығын тағы бір голмен айшықтап берді. Бұдан әрі бір жақты соққылау басталды. Соның нәтижесінде чемпионат басталғалы Мирослав Клозе матчтағы жеңімпаздың кім болатынын біржола шешіп қойды. Тағы біршама мезгілден соң Марко Ройс немістер салған голдар санын төртеуге жеткізді. Кездесу осымен бітуге қараған шақта гректер жасаған соңғы қарсы шабуыл кезінде германиялықтар қорғаушысы өз айып алаңында допты ұстай алды. Пенальти. Оны бұл жолы гректер құр жібермеді.
Испания-Франция – 2:0. Матчтың басында бұл құрамалардың осыған дейінгі ресми кездесулерінің бәрінде француздардың десі басым болып келгені талай айтылды. Осы статистика екі жаққа да айтарлықтай әсер етті. Француздар үшін сол дәстүр сақталып қалатындай көрінсе, испандарға бұл сеңнің көбесін сөгу басынан жоғары секірумен бірдей болып сезілді. Бұл екі жақты да шамадан тыс толқытып жіберді.
Өздерінің мыстары басып тұрғанын сезген Лоран Блан ойын басталғаннан мұқият қорғаныс сәтіндегі жоғары прессинг пен жылдам жауап қайтаруға көбірек көңіл бөлді. Ал испандар ойын тізгінін бірден қолға алғаннан артық айланың жоқ екенін тез ұқты. Француздар көпке дейін қорғаныс жағына ыждағатты болғанымен, жылдам жауап жағын оншама көктете қоймады. Мұның есесіне, испандар барған сайын өз-өздеріне деген сенімге тереңірек ұйып, жойқын жорықты жиілетуге көшті. Мұның ақыры қарсы қақпаны алуға да жеткізді. Қорғаушы Матье Дебюши ішке қарай жарып өткен шабуылшы Жорди Альбадан көз жазып қалды. Ал анау 11 метрлікке жақындасымен допты Хаби Алонсоға дәл берді. Қақпашымен бетпе-бет келген форвард мұны мүлт жібермеді. Жіберіліп қойған осы гол Бланның барлық жоспарларын тас-талқан етті. Оның командасы бұдан кейін қарсыластардың бірінен соң бірі толқынданып келіп қалған шабуылдарын үздіксіз қайтарумен болды. Бірақ өздері ілгері қарай бара алмады. Үзілістен кейін испандар қысымды күшейтпесе, бәсеңсіткен жоқ. Мұның нәтижесі матчтың ең соңында көрінді. Кезекті жорықтары кезінде испандарды рұқсат етілмеген тәсілмен тоқтатқан француздар қақпасына 11 метрлік айып добы белгіленді. Оны тағы да Алонсо түсірді.
Англия-Италия – 0:0, пенальти – 2:4. Көпшілік күткендегідей, ойын өте тартысты да қызықты өтті. Бірақ командалар матчтың негізгі уақытында да, қосымша мезгілінде де есеп аша алмай тарқасты. Дегенмен, бүкіл кездесу бойына көрерменін еліктіріп отырды. Шайқас бірден қызу басталды. Оның алғашқы сәтінде-ақ итальяндар гол соғып кете жаздады. Шамалыдан соң осындай мүмкіндікті ағылшындар жіберіп алды. Біршамадан кейін ойын сабырлы ағысқа түсті. Бұл итальяндарға майдай жақты. Осы тұста біртіндеп матч тізгінін қолға алып алған олар сосын ақырына дейін қарсыластарына бас көтертпеді. Бұдан кейін олар есеп ашатын да мүмкіндікке де көбірек иек артты. Матчтың соңғы жиырма минуты солардың бір жақты басымдығымен өрнектелді. Осы тұрғыдан келгенде, Италия футболшыларының ойыннан кейінгі пенальтиде басым шыққандары нағыз әділеттілік болып көрінер еді.
Келесі кезеңге өткен төрт команда кеше мен бүгін тыныс алды. Ертең – жартылай финалдың бірінші ойыны. Бұл күні Португалия-Испания беттеседі. Ал ертең Германия-Италия арасындағы мықтылар анықталады. Оның арғы жағында, әрине, финал тұр.
Серік ПІРНАЗАР,
«Егемен Қазақстан».
Матч миниатюралары
* Англия-Италия матчынде негізгі және қосымша уақыттарда есепашылмай, жеңімпазды анықтау үшін бірінші рет ойыннан кейінгіпенальтиге жүгінуге тура келді.
* Осы кезеңде кездесу кезінде қақпаларға екі пенальти белгіленіп, екеуіде жүзеге асты. Оларды грек Димитрис Салпингидис пен испан ХабиАлонсо түсірді.
* Осы 4 матчты тамашалау үшін стадиондарға 205 680 адам жиналды. Албіріншіліктің басынан бері спорт ареналарына 1 330 134 көрермен келді.
* Португалия-Чехия матчында португалдық Криштиану Роналду тағы бірдоп салып, голдарының санын 3-ке жеткізді. Тап осыншама гол қазірМарио Гомес (Германия), Алан Дзагоев (Ресей), Марио Маджукич(Хорватия) секілді ойыншылардың еншілерінде де бар. Ал испан ХабиАлонсо дубль жасаған ойыншылардың қатарына қосылды.
* Төреші бұл матчтарда футболшыларға 11 рет ескерту берді. Осы жолы грек Сократес Папастопулос үшінші мәрте ескерту алды. Оның Польшамен маусымашар ойында алынған екіншісі футболшыны алаңнан қууға себеп болып еді.
* Осы кезге дейін ойыншыларға 107 рет «сары қағаз» көрсетілді.
* Үздік ойыншы атағына Криштиану Роналду (Португалия), Марк Ройс (Германия), Хаби Алонсо (Испания), Андреа Пирло (Италия) ие болды.
_________________________
Ойлар, пікірлер, көзқарастар
Михаил ГЕРШКОВИЧ, КСРО құрамасының бұрынғы ойыншысы: – Мен баяғыдан біздің құраманы өз мамандарымыздың басқарғанын қалаушы едім. Енді бұдан басқа жол қалмады. Ондай маман да бар бізде. Ол – Валерий Газзаев. Бұл отандасымыз қазір жаттықтырушы ретінде де өсіп жетілді. Өзі біраз дем алып та алды. Демек, тың күшпен кірісуі керек.
Роберто МАРТИНЕС, Англияның «Уиган» клубының бас жаттықтырушысы: – Мені Португалияның ойыны шындап таң қалдырды. Осы ретте Паолу Бинту қандай да бір мақтауға лайық. Ол жеңіске жететін құраманың пішінін жақсы жасапты. Сол жолда Криштиану Роналдуды керекті жеріне өте тамаша пайдаланып отыр.
Раймон ДОМЕНЕК, Франция құрамасының бұрынғы бас жаттықтырушысы: – Мен француз футболынан түңіліп кеттім. Әсіресе, оның соңғы екі матчынан қатты көңілім қалды. Біздің құрамада нағыз лидер жоқ. Бензема жеке ойнауға құмар. Мұның бәрі жаттықтырушының ықпалы болмағанынан орын алып отыр.
