Баптары жақсы-ау
Бейсенбі, 28 маусым 2012 7:11
ДҮБІР
Олимпиадаға 29 күн қалды
БАПТАРЫ ЖАҚСЫ-АУ
Ал бақтары қалай болар екен?
Төрт жылда бір айналып келетін Жазғы Олимпия ойындарының басталуына да көп уақыт қалған жоқ. Қазақтар: «Тойдың болғанынан боладысы қызық» дейді. Сірә да тауып айтқан. Қазір дүниежүзі халқы Лондонға телміре көз тігіп, тек Олимпиада тынысымен демалып отыр. Өйткені, Олимпиада – жүзден жүйрік, мыңнан тұлпар шығатын аламан дода. Он рет әлем чемпионы болғанша, бір рет Олимпиада чемпионы болу – әр спортшының арманы.
Бейсенбі, 28 маусым 2012 7:11
ДҮБІР
Олимпиадаға 29 күн қалды
БАПТАРЫ ЖАҚСЫ-АУ
Ал бақтары қалай болар екен?
Төрт жылда бір айналып келетін Жазғы Олимпия ойындарының басталуына да көп уақыт қалған жоқ. Қазақтар: «Тойдың болғанынан боладысы қызық» дейді. Сірә да тауып айтқан. Қазір дүниежүзі халқы Лондонға телміре көз тігіп, тек Олимпиада тынысымен демалып отыр. Өйткені, Олимпиада – жүзден жүйрік, мыңнан тұлпар шығатын аламан дода. Он рет әлем чемпионы болғанша, бір рет Олимпиада чемпионы болу – әр спортшының арманы.
Қазақстан құрамасы сапында ел намысын қорғайтын Батыс Қазақстан спортшылары да тастүйін дайын. Осыдан төрт жыл бұрын болған Бейжің Олимпиадасына Батыс Қазақстан облысынан төрт-ақ спортшы қатысқан болатын. Бұл жолы ел намысын батысқазақстандық алты спортшы қорғамақшы. Демек, бұл – облыс спортының алға жылжығанының белгісі.
Рас, облыс спортының басшысы Мүсілім Оңдағанов спорттың қай түрінен болмасын спортшыға барлық жағдайды жасаудан жалыққан емес. Сондықтан да біздің спортшылардың алды Америкаға барып күштерін сынауда.
1982-ші жылы Ресейде дүниеге келген Қазақстан Республикасының еңбек сіңірген спорт шебері Таймұраз Тигиев 2006-шы жылдан бері келісім-шарт бойынша облысымыздың намысын қорғауда. 2008-ші жылы өткен Бейжің Олимпиадасының күміс жүлдегері. Бұл жолғы Олимпиадаға жолдаманы былтыр қыркүйек айында Түркияның Ыстамбұл қаласында өткен әлем чемпионатында ұтып алды. Осы біріншілікте тағы бір жерлесіміз, өзі 1983-ші жылы Ресейдің Дағыстан елінде дүниеге келсе де, 2006-шы жылдан бері облысымыздың намысын ту қылып төбесіне көтеріп жүрген, Қазақстан Республикасының халықаралық дәрежедегі спорт шебері Абдулхаким Шапиев те Олимпиада жолдамасын жеңіп алды. Екеуі де еркін күрес шеберлері.
Келісім-шартпен былтырдан бері облысымыз атынан сынға түсіп жүрген тағы бір Даниал Гаджиев деген бауырымыз биылғы жылдың сәуір айында Астанада өткен грек-рим күресінен лицензиялық Азия чемпионатында Олимпиада жолдамасын жанқалтасына салды. 1986-шы жылы дүниеге келген Даниал биыл Түркияда өткен халықаралық турнирдің жүлдегері, Қазақстан Республикасының халықаралық дәрежедегі спорт шебері.
Негізі, «Бөтен елдің баласы, қашанғы жүрер дейсің» деп, оларға үрке қараудың жөні жоқ. Бөтен болса да, біріншіден, облыс спортына қаншама атақ-абырой әкелді. Сосын, осыларға еліктеп қанша қазақ баласы спортқа тартылды десеңші. Қалай десек те, облыс спортының бағына туған бұлар нандарын адал жеп жүр.
Олимпиада жолдамасын қанжығаларына байлаған қалған үшеуі өзіміздің төл тумаларымыз. 1989-шы жылы Орал қаласында дүниеге келген спорт шебері Георгий Шейко спорттық жүрістен былтырғы ел чемпионатының күміс жүлдегері, ІІІ-ші Жазғы Спартакиадасының қола жүлдегері. Биыл ақпан айында Мәскеу қаласында өткен ашық чемпионатта Олимпиада лицензиясының толыққанды иесі атанды.
1984-ші жылы Орал қаласында дүниеге келген Алексей Дергунов байдарка мен каноэ есуден халықаралық дәрежедегі спорт шебері. Спорттың осы түрімен 1996-шы жылдан бастап айналыса бастаған Алексейдің алған асулары да бір төбе. 2000-2012-ші жылдарғы Қазақстан чемпионы және жүлдегері, 2002-ші жылы жасөспірімдер арасындағы Азия чемпионы, 2009-шы жылы Қазақстанның абсолютты чемпионы, 2007-2011-ші жылдар ҚР Халық спартакиадаларының чемпионы, 2007-2011-ші жылдарғы Азия чемпионатының чемпионы және жүлдегері, 2010-шы жыл Қытайда өткен Азия ойындарының күміс жүлдегері, 2008-ші жылы Бейжің Олимпиадасына қатысушы. Лондон Олимпиадасына жолдаманы Тегеранда өткен Азия чемпионатында жеңіп алды.
1989-шы жылы Орал қаласында дүниеге келген Халықаралық дәрежедегі спорт шебері Анастасия Баннова былтыр Иран елінде өткен Азия чемпионатының және ІІІ-ші Жазғы спартакиадасының чемпионы. Биыл маусым айында АҚШ-тың Огдан қаласында өткен әлем кубогына қатысып, Олимпиадаға қатысу құқығына толық ие болды.
Бөле-жаратын ештеңесі жоқ, дүбірлі додаға қатысқалы отырған барлық дүлдүлдеріміз жүлделі орындарға ілігеді деген үміттеміз. Оның үстіне Таймұраз бен Алексей Олимпиада күлшесінің дәмін татқандар екенін ескерсек, жүлдеге жарты адым болса да жақындай түскендейміз.
Талғат БАЙСАРИН,
Қазақстан Журналистер одағының мүшесі.
Батыс Қазақстан облысы.
