Испания мәселені пенальтимен шешті

Жұма, 29 маусым 2012 6:40

Бұрнағы күні Португалия мен Испанияның арасында өткен бірінші жартылай финалдық ойынның негізгі және қосымша уақыттарында есеп ашылмады. Содан соң осы турнирде қатарынан екінші мәрте матчтан кейінгі пенальтиге жүгінуге тура келді. Онда «қызыл фурияның» бағы жанды.

Жұма, 29 маусым 2012 6:40

Бұрнағы күні Португалия мен Испанияның арасында өткен бірінші жартылай финалдық ойынның негізгі және қосымша уақыттарында есеп ашылмады. Содан соң осы турнирде қатарынан екінші мәрте матчтан кейінгі пенальтиге жүгінуге тура келді. Онда «қызыл фурияның» бағы жанды.

Матчқа дейін. Испания құра­масы осымен қатарынан екінші рет құрлық чемпионатының финалына шығып отыр. Егер осында тағы да жеңіске жетер болса, ол басы сонау өткен ғасырдың 1960 жылынан басталатын Еуропа біріншілігінде қатарынан екі рет чемпиондыққа қол жеткізген бірінші құрама болар еді. Ал мына кездесудің алдында екі жақ та жеңістен үмітті екендіктерін жа­сырған жоқ. Әсіресе, Паолу Бенту бастаған португалдар өліспей беріспейтіндерін әлденеше рет айтты. Оған қарағанда Висенте дель Боске сабыр сақтады.

Дерек. Испания құрамасы бұ­ған дейін екі рет – 1964 және 2008 жылдары құрлықта бірінші команда атанған. Ал Португалия 2004 жылы өз елінде өткен дода­ның финалында гректерге жол беріп қойды. Оның бұдан өзге ірі табысы жоқ. Бұл құрамалар, арғы жағын айтпағанда, XXI ғасырдың өзінде өзара бірнеше рет кездесіп қойды. Айталық, 2002 және 2003 жылдары болған жолдастық кез­десулердің біріншісінде испандар 3:0 есебімен жеңіп, екіншісінде 1:1 деген тең нәтиже тіркелді. Ал 2004 жылғы құрлық чемпионатында португалдар 1:0 есебімен басым түсті. Содан соң 2010 жылғы әлем біріншілігінде тап осындай есеппен ұтылды. Мұның есесіне, бұлардың арасындағы соңғы өткен жолдастық кездесуде Португалия 4:0 есебімен жеңіске жетті.

Ойын. Айтса айтқандай, португалдар бұл матчта испандарға біраз проблема жасап берді. Алаң­да іс жүзінде тепе-тең ойын жүрді. Мұнда командалар өте сақ ойнады деп те айта алмаймыз. Соған қарамастан, қауіпті сәттер мүлдем дерлік болған жоқ. Бірінші таймда екі жақ жабылып жүріп, екі соққы ғана жасады. Оның екеуін де португалдар ұр­ды. Жалпы, олар матчты белсенді бастады. Өздерінің оңтайлы сол қанатымен алға қарай қиқулай ұмтылған олар тез бұрыштама добын соғуға да қол жеткізді. Оны Рауль Мейрелеш қақпаның енді­гі­не туралап жеткізіп еді, Икер Касильяс қауіпті допты қақпадан асырып қана тыншу тапты. Бұдан кейін испандар үдере көтерілді. Олардың оң қанаттан өрбіткен шабуылдары алаңның ортасынан үзілді. Португалдардың орталық қорғаушысы Пепе қақпа алаңына келіп қалған форвард Альфредо Нергедоның өзі­нен сытылып кетуіне жол бермеді. Келесі кезекте қарсы шабуылға шығу мүм­кіндігін «селесау» жағы да құр жібермеді. Екі жақтың жорықта­ры осылай кезек-кезек толқын­дана өрбіген бірінші бөлік ешбір нәтижесіз аяқталды.

Екінші таймда испандар доп­қа көбірек иелік ете бастады. Олар өздеріне үйреншікті фут­бол­ға кө­шуге ұмтылып бақты. Португалдар осы тұста прес­синг­ті едәуір күшейтті. Жалпы, ой­ын­шылар­дың шаршағаны байқалған бұл кезеңде шиеленісті сәттер көбейе түсті. Солардың бірінде порту­гал­дардың екеуге төртеу болып шыққан сәтінің өзі неге тұрады. Алайда, бұл да босқа кет­ті. Бірақ ойын аяғы жа­қын­даған сайын екі жақтың да өз қақпаларының аман қалу жағын көбірек күйттей­тін­дері білініп қалды. Сол үргедек көңіл күй негізгі уақыттан кейінгі үшінші және төртінші қосымша таймдарда да аңғарылды. Бірте-бірте фут­болшылардың кездесуде же­ңілгенше, пенальтиде бақтарын сынап көруге ынталы екендіктері айқындала берді. Бұл уақыттары испан тактикасына қарсы ойында барлық күш-қуаттарын сарқып ал­ған португалдардың шаршап қал­ғаны да байқалды. Мұны ти­ім­ді пайдаланған Испания құра­масы тізгінді өз қолына алды. Бұған қоса оның ойыншылары екеулеп-үшеулеп жүріп, Ро­нал­ду­дың еркін қимылдауына мүлде мүмкіндік бермей қойды. Осының ретінде ашық қалған Нани бәрібір Криштианудей ойнай алмады. Мұның бәрі, айналып келгенде, «қызыл фурияның» де­сін арттыра түсті. Бәлкім, «футбол құдайы» сол шақтарда ерекше екпін алған басымдығын ын­та­ландырған да болар, ол матч­­­­тан кейінгі пенальтиде үстем кө­­рінді. «Селесау» сапынан добын қақпа бағанына тигізген үш­інші ойыншы – Альвеш «қызыл фурия­ны» финалға да шығарып берді.

Бір қызығы, осы жолы бірінші рет жеңілген жақтың ойыншысы матчтың үздігі болып танылды. Ол атаққа жартылай қорғаушы Рауль Мейрелеш қол жеткізді. Португалия құрамасының ұзақ уақыт бойы орталық шепке егелік ету­лерінде осы ойыншының еңбегі зор болды.

Матчтан кейін. «Португалдар керемет қорғана білді, – деді кездесуден кейін Висенте дель Боске. – Бізде де мүмкіндіктер аз болған жоқ. Сондықтан шайқас барынша тең өтті. Бізге тек ойыннан кей­інгі сәттілік көмектесті. Осыған орай турнирді тамаша етіп өткіз­гені үшін Португалия құрамасын құттықтағым келеді». Паолу Бенту де осыған ұқсас сөздер айтты. Ол бүкіл Португалия елі біздің ойынымызды мақтан тұтатынына сенім­дімін, деген мазмұндағы ойын жеткізді.

Ал кеше түнде Германия мен Италия арасындағы матчтың қо­рытындысымен екінші финалис­тің есімі белгілі болды. Ақтық айқас 1 шілде күні Киевте өтеді.

Серік ПІРНАЗАР,

«Егемен Қазақстан».