Астанада Шахмат академиясы ашылады

Жұма, 6 шілде 2012 8:24

Кеше Астанада Елбасы Нұрсұлтан Назарбаевтың қатысуымен жедел шахмат және блиц бойынша әлем чемпионаттарының ресми түрде ашылу салтанаты өтті.

Оның ашылу рәсіміне, сондай-ақ, Астана күнін мерекелеуге арнайы келген Қырғыз Респуб­ликасының Президенті Ал­мазбек Атамбаев, Халық­ара­лық шахмат федерациясының пре­зиденті Кирсан Илюмжинов қатысты.

 

Жұма, 6 шілде 2012 8:24

Кеше Астанада Елбасы Нұрсұлтан Назарбаевтың қатысуымен жедел шахмат және блиц бойынша әлем чемпионаттарының ресми түрде ашылу салтанаты өтті.

Оның ашылу рәсіміне, сондай-ақ, Астана күнін мерекелеуге арнайы келген Қырғыз Респуб­ликасының Президенті Ал­мазбек Атамбаев, Халық­ара­лық шахмат федерациясының пре­зиденті Кирсан Илюмжинов қатысты.

Шахматтың бұл түрлерінен әлемдік додалардың тұңғыш рет дүние жүзі бойынша Астана күні қарсаңында өткізілуі кездейсоқ таңдалып алынған жоқ, олар ала тақта ойындарының ішіндегі ең қызықты және тартымды түр­леріне жатады.

Ашылу салтанатында Мем­лекеттік әнұран ойналып болған соң, Елбасы Н.Назарбаевқа сөз берілді. Мемлекет басшысы жа­рысқа қатысушыларды Астана күнімен және әлем чемпио­нат­тары­ның ашылу рәсімімен құт­тық­тап, жарыстың мәні мен ма­ңызына қысқаша тоқталып өтті.

– Біздің елімізде Астана күні қарсаңында шахматтың жедел, яғни рапид және блиц түр­ле­рі­нен әлем чемпионаттарының өт­кі­зілуін үлкен оқиға деуге болады, – деді Н.Назарбаев. – Бұл жа­рысқа әлемнің мықты шахматшылары, гроссмейстерлері қа­тысуда. Шахмат ойынының бұл түрлері өзінің аты айтып тұр­ған­дай, адамның тез ойлап, тез жү­ріс жасауына, математикалық қабілетін көрсетуіне мүмкіндік береді. Жал­пы, біз шахматтың жедел тү­рі­нен және блицтен әлем чемпио­наттарының Астанада өтуіне ризашылығымызды білдіреміз.

Елбасы одан әрі осынау жа­рысқа, Астана күнін қарсы алуға көршілес Қырғыз Республика­сы­ның Президенті Алмазбек Атам­баев­тың арнайы келіп отырға­нын айтып, бауырлас, түбі бір түркі тілдес елдің басшысына да ризашылығын білдірді. Сонымен бірге, шараға арнайы қаты­суға келген Халықаралық шахмат фе­де­рациясының президенті Кирсан Илюмжиновтің 1 500 жыл­дық тарихы бар зияткерлік ойынды дамытуда атқарып келе жат­қан жұмысын жоғары баға­лап, қай кезде болмасын ФИДЕ пре­зидентін қызмет бабында қабыл­дағанда онымен елімізде шахматты дамытуда атқарылып жатқан жұмыстармен ой бөлі­се­ті­нін, Ас­та­нада бүгіннен бастап ресми түрде ашылатын әлем чемпио­нат­тарының сондай кездесуден бастау алғанын атап көрсетті.

«Қазіргі кезде біздің ел – Ха­лықаралық шахмат федерация­сы­­ның белсенді мүшелерінің бірі. Қазақстан тәуелсіздік алған кезден бері ФИДЕ-мен тығыз байланыста жұмыс істеп, қа­зір­дің өзін­де бірлесіп көптеген жұ­мыстар атқаруда. Бүгінде елі­міз­де көп­те­ген жарыстар өткізіліп, жастарымыз халықаралық турнирлер мен жарыстарға жиі қатысуда. Соның нәтижесінде, қыз балалар мен ер балалар арасында әлем чемпионаттарында топ жарып жүр­ген­де­рі баршы­лық», – деді Елбасы. Одан әрі Мемлекет басшысы ал­дағы уа­қыт­та елімізде шахмат мек­тебін қалыптастырып, ал Ас­тананы шахмат астанасы жасауға жұмыс істелетінін атап өтті. Осы орайда Елбасы болашақта Астанада Шахмат академиясы мен мек­те­бі, сарайы салынатынын мәлім­деді.

Елбасының сөзінен кейін ФИДЕ президенті Кирсан Илюм­жинов сөз алып, Астанада рапид пен блицтен әлем чемпионат­та­ры­ның өткізілуі мәні мен ма­ңы­зы жағынан үлкен оқиға екенін, шах­маттың осы түрлерінің бірі­нен кейін бірінің бір елде, бір қалада өтуі тарихта ешбір жерде, ешқашан болмағанын назар­ға салды. ФИДЕ басшысы қазір­гі күні Халықаралық шахмат федерациясына әлемнің 177 елінің мүше болып табылатынын, онымен 600 миллиондай адам айналысатынын айтып, енді Қазақ­стан­да болашақта Шахмат академиясы мен мектебі, сарайы ашыл­са, ала тақта ойынымен айналысушылардың бұдан да көбейетініне сенімділігін біл­дірді.

Осыдан кейін Елбасы орта­дағы шахмат тақтасына келіп,   «е 2 – е 4» жүрісін жасап, әлем чем­пионаттарын ресми түрде ашты.

Салтанатты шарада жарысқа қатысушылардың кезектілігі мен ойнайтын түстері анықталып, фи­налға шыққан шахмат­шы­лар­дың арасында жеребе тастау рә­сі­мі өтті. Ашылу рәсімі алдында аяқталған іріктеу турнирінде грос­­смейстерлерге қосылатын тағы 6 қарсылас анықталды. Блиц бойынша финалға Дмитрий Андрейкин, Ле Кван Льем және Николай Чадаев шықса, рапидте Игорь Курносов, Алексей Дреев және Владислав Ткачев жолдама алды.

Жедел шахмат және блиц бойынша әлем чемпионы атағы үшін әлемнің танымал грос­с­мейс­тер­ле­рі Магнус Карлсен, Борис Гельфанд, Сергей Карякин, Веселин Топалов, Василий Иванчук, Теймур Раджабов, Александр Грищук және басқа қатысушылар бақ сынасады. Қазақстан намысын рапид бойынша Муртас Қа­жы­ғалиев пен Әнуар Исмағам­бе­тов, блиц бойынша Павел Коцур мен Ринат Жұмабаев қорғайды.

Астанадағы жедел шахмат бой­ынша әлем чемпионатын бел­гілі төрешілер бақылайды. Аға төреші қызметі Анджей Филиповичке (Польша) жүктеліп отыр. Бас төрешінің орынбасары – қазақстандық Сергей Юровский.

Әлем чемпионаттарының жал­­пы жүлде қоры 400 мың АҚШ долларын құрайды.

Бүгінде жарыстар шахмат әуесқойлары мен кәсіпқойлары­ның назарын өзіне аударуда. Біз рапид пен блиц бойынша жаңа әлем чемпиондарының есімін 10 шілде күні білетін боламыз. Матчтың бірінші партиясы 6 шілде күні Астана уақыты бойынша 15-00-де өтеді. Жарыстар кеше «Radisson SAS» қонақ үйінде басталды.

Әлем чемпионаттарының бар­лық жаңалықтары www.worldchess.kz ар­найы сайтында жарияланатын болады

Дастан КЕНЖАЛИН,

«Егемен Қазақстан».